• Nki i zola kwa Nzambi?

  • Aweyi tulenda kadila wasikila muna zola kwa Nzambi?

  • O Yave aweyi kesambulwilanga awana besikilanga muna zola kwandi?

Nga okitula Yave s’etininu diaku mu lumbu yayi yampasi

1, 2. Akweyi tulenda sololwela etininu o unu?

YINDULA vo ekolo okangalanga e tembwa kia ngolo kiyantikidi. E zulu dilombokele. E miandazi ye nsemo miyantikidi kezima. Vana vau e mvula yiyantikidi o noka. Wele nswalu mu solola e fulu kia swamina. Ke kolo ko omwene fulu kiambote ke kikotanga maza ko vana ndambu a nzila. Nkia mfunu kina e fulu kiaki kwa ngeye?

2 Mu ntangw’ampasi tuzingilanga. E zingu ova nza mu yiva kaka kina. Kansi vena ye fulu kia luvuvamu tulenda tinina e mpasi zazi. Nkia fulu? Tala dina kevovanga Nkand’a Nzambi: “Muna Yave mvova vo, etininu diame, e fika kiame; Nzambi ame, ona mbundidi e vuvu.”—Nkunga 91:2.

3. Aweyi tulenda kitulwila Yave s’etininu dieto?

3 Yindula e diambu diadi! Yave wa Mvangi, wa Mfumu a nsema wawonso, olenda kala se fika kieto kia tinina. Olenda kututanina, kadi osundidi e ngolo za konso muntu yovo lekwa kilenda kutubangika.  Kanele vo tumweswanga e mpasi, o Yave osukisa mpasi zazi zawonso. Aweyi tulenda kitulwila Yave s’etininu dieto? Muna kumbundang’e vuvu. O Nkand’a Nzambi ukutuvovesanga mpe vo: ‘Nusikila muna zola kwa Nzambi.’ (Yuda 21) Ozevo, muna sikila muna zola kwa Nzambi, tufwete siamisa o zola ye S’eto ezulu. Tulenda bunda e vuvu vo yandi i tininu dieto. Kansi aweyi tulenda siamisina o zola kwaku?

ZAYA YO TAMBULWILA ZOLA KWA NZAMBI

4, 5. O Yave nkia mpila zakaka kesongelanga zola kwa wantu?

4 Muna sikila muna zola kwa Nzambi, tufwete zaya una o Yave kekutusongelanga o zola. Yindula malongi makaka ma Nkand’a Nzambi olongokele muna lusadisu lwa nkanda wau. Wau vo yandi i Mvangi, o Yave watuvana ntoto tuzingilanga. Wazadisa wo ye madia mambote, maza, tusalu, mbizi ye nzanza miambote. Muna Nkand’andi, o Nzambi watusengomwena fu yandi ye nkumbu andi. Vana ntandu, wafila Mwan’andi anzolwa ova ntoto yo yambula vo kamona mpasi yo fwa mu kuma kieto. (Yoane 3:16) O lukau lwalu nkia nsasa luna kwa yeto? Vuvu kiambote kia kusentu lukutuvananga.

5 E vuvu kieto kia kusentu kina mpe muna diambu diakaka kavang’o Nzambi. O Yave wasikidisa luyalu lw’ezulu muna Kintinu kia Masia. Ke kolo ko kisukisa mpasi zawonso yo kitula ntoto se paradiso. Yindula e kiese kikala ova ntoto! Tulenda vo zingila muna luvuvamu yakwele mvu. (Nkunga 37:29) O Nzambi okutuvananga malongi ma mpila ina tulenda zingila mu mpila yambote tuk’owau. Watuvana mpe lukau lwa sambu kimana twamokenanga yandi. O mama i mambu makete kaka mesonganga mpila Yave kesongelanga zola kwa wantu ye kwa ngeye mpe.

6. Aweyi olenda tambulwila o zola kesonganga Yave kwa ngeye?

 6 E kiuvu kiamfunu ofwete fimpa i kiaki: Aweyi olenda tambulwila o zola kwa Yave? Wantu ayingi balenda vova vo: “Muna tambulwila zola kwa Yave omono mpe mfwete kunzola.” Nga i wau mpe oyindulanga? Yesu wavova vo: “Zola Yave wa Nzambi aku yamuna nsi a ntim’aku wawonso, yo muna fulumwinu kiaku kiawonso, yo muna nyindu aku wawonso” owau i nkanikinu usundidi muna nsiku miawonso. (Matai 22:37) Vena ye kuma yayingi ofwete zolela Yave wa Nzambi. Kansi o vova kwa nkatu vo una ye zola kwaku, nga i diau disonganga vo ozolanga Yave muna nsi a ntim’aku wawonso, yo muna fulumwinu kiaku kiawonso yo muna nyindu aku wawonso?

7. Ovova kwa nkatu vo una ye nzol’a Nzambi, nga i diau kaka divavwanga? Sasila dio.

7 Nze una keyikanga Nkand’a Nzambi, mayingi mevavwanga muna zola Nzambi, ke mu mvovo kaka ko. Kana una vo ovova vo una ye nzol’a Yave mfunu dina, o lwalu i lubantiku lwa zola kwakieleka. E disu dia maçã yovo di’elala mfunu dina muna kuna nti uyimanga malala. Kansi, avo ozolele dia elala, nga oyangalala kele vo bavene e disu di’elala? Ve kikilu! Diau adimosi mpe, ovovanga vo ovwidi e nzol’a Yave wa Nzambi i lubantiku lwa zola kwakieleka. Nkand’a Nzambi uvovanga vo: “I yau yiyi e nzol’a Nzambi, tulunda nkanikinu miandi: e nkanikinu miandi ke miampasi ko.” (1 Yoane 5:3) O zola kwakieleka kwa Nzambi kufwete yima mbongo ambote. Mu mavangu kusongelwanga.—Tanga Matai 7:16-20.

8, 9. Aweyi tulenda songela zola ye luyangalalu lweto kwa Nzambi?

8 Muna songa vo tuzolanga Nzambi, tufwete lundanga nkanikinu ye nsiku miandi. Ke diampasi ko muna lunda nsiku mia Nzambi. Nsiku mia Yave miasikidiswa muna  kutusadisa twakala ye fu yambote ye zingu kiakiese. (Yesaya 48:17, 18) Muna lemvokelanga luludiku lwa Yave tusonganga kwa S’eto ezulu vo tuyangalelanga mawonso kevanganga muna wete dieto. Diankenda kikilu, kadi akete kaka bevanganga wo ova nza. Katuzolele kala wantu balembi tondanga ko, nze una bakala akaka vava Yesu kakala ova ntoto. Lumbu kimosi, o Yesu wawuka wantu kumi bakala yo wazi, kansi mosi kaka wavutuka mu kumvutula matondo. (Luka 17:12-17) Tufwete kala nze ndiona wavutuka, ke mu kala ko nze wantu vwa balembi vutuka!

9 Nkia nsiku mia Yave tufwete lundanga? Miayingi tulongele mu nkanda wau. Kansi yambula twafimpulula miakaka. Olunda nsiku mia Nzambi dikutusadisa mu sikila muna zola kwa Nzambi.

FINAMA YAVE

10. Sasila o mfunu wa kwamanana longoka mu kuma kia Yave wa Nzambi.

10 Longoka mu kuma kia Yave, i diambu  diamfunu muna kumfinama. I diambu ke difwete yambulwa ko. Kele vo oyotelanga e tiya muna fuku wa kiozi vana mbazi, nga oyambula sia nkuni zayingi vana ziku? Ve. Okudikila e nkuni mpasi vo e tiya twatoma lema. E zingu kiaku mu vonza kina. Nze nkuni zilemesanga e tiya, o “zaya Nzambi” kukumikanga o zola kweto muna Yave.—Ngana 2:1-5.

Nze tiya tuvavanga e nkuni muna lema, mayingi mevavwanga muna sikila muna zola kwa Yave

11. O Yesu mana kalonga kw’alongoki andi adieyi mavanga?

11 Yesu wazola vo o zola kw’alandi andi muna Yave ye muna Diambu diandi dia ludi kwasikila. Vava kafuluka, Yesu walonga alongoki andi wole mu bakula ungunza wa Sono ya Kiyibere walungana muna yandi kibeni. Nkia nluta diatwasa? Basoneka vo: “Nga mioyo mieto ke mizinininge ko, una katumokesenge muna nzila, yo kututendwel’e sono?”—Luka 24:32.

12, 13. (a) Adieyi dibwanga muna zola kwa wantu ayingi o unu? (b) Aweyi tulenda vanga kimana ozola kweto kwalembi vola?

12 Vava wayantika longoka Nkand’a Nzambi nga ntim’aku wazala ye kiese, vema ye zola kwa Nzambi? Ka lukadikisu ko vo i wau. Ayingi mpe bemonanga wo. O mambu mampasi mebwanga owau mekumikanga yo wokesa o zola. Ka tufwete landanga mambu ma nza ya unu ko. Yesu wavova vo: “O zola kwa wantu ayingi kuvola.” (Matai 24:12) Aweyi olenda vanga kimana o zola kwaku muna Yave ye muna ludi kia Nkand’a Nzambi kwalembi vola?

13 Kwamanana longoka mu kuma kia Yave wa Nzambi yo Yesu Kristu. (Yoane 17:3) Badika yovo yindula mana olongokanga muna Nkand’a Nzambi. I bosi ukiyuvula: ‘O mama adieyi mandongele mu kuma kia Yave wa Nzambi? Nkia kuma kiakaka mekumpananga mu kunzola yo ntim’ame wawonso, nyindu ye fulumwinu?’ (Tanga 1 Timoteo 4:15.) O yindula kwa mpila yayi kuwokesa o zola kwaku muna Yave.

14. E sambu aweyi kilenda kutusadisila mu kumika o zola kweto kwa Yave?

 14 E mpila yakaka tulenda sikidila muna zola kwa Yave i sambanga ntangwa zawonso. (1 Tesalonika 5:17) Muna Kapu kia 17 kia nkanda wau, twalongokele vo e sambu i lukau lwantalu lwa Nzambi. Nze una e mbokena zikumikanga kikundi kia wantu, o samba ntangwa zawonso kwa Yave kusiamisa kikundi kieto. Diamfunu twalembi yambula vo e sambu yeto yakala ya vovololanga kaka diambu dimosi diakondwa nsasa. Tufwete mokenanga yo Yave nze una mwana kemokenanga yo s’andi. Tufwete mokenanga yandi kuna luzitu, ziku, unsongi yo ntima wawonso. (Nkunga 62:8) Elongi dia Nkand’a Nzambi ye sambu kia ntima wawonso i diambu diamfunu muna nsambila eto yo kutusadisa mu sikila muna zola kwa Nzambi.

KALA YE KIESE MUNA NSAMBIL’AKU

15, 16. Ekuma tufwete badikilanga e salu kia samuna Kintinu se lusâlu lwantalu?

15 E sambu y’elongi dia Nkand’a Nzambi dia yeto kibeni va fulu kia yeto kaka divangilwanga. Kansi, yambula twafimpa e mpila ya nsambila yivangilwanga vana vena ndonga. Samuna kw’akaka mana tukwikilanga. Nga ozayisanga e ludi kia Nkand’a Nzambi olongokanga kw’akaka? Avo i wau, salu kia mfunu osalanga. (Luka 1:74) Vava tuzayisanga mana tulongokanga mu kuma kia Yave wa Nzambi kw’akaka, salu kisundidi o mfunu kia Kintinu kia Nzambi kiavewa kwa Akristu awonso tusalanga.—Tanga Matai 24:14; 28:19, 20.

16 Ntumwa Paulu wabadikilanga e salu kiaki nze lusâlu lwantalu. (2 Korinto 4:7) O samuna kw’akaka e ludi mu kuma kia Yave wa Nzambi ye makani mandi, i salu kisundidi o mfunu olenda sala. Kadi i salu kia Mfumu ambote, ye nluta miambote kitwasanga. Avo ukivene mvimba mu  salu kiaki, osadisa akwa ntima miansongi mu finama S’eto ezulu yo yantika kangalela muna nzila moyo a mvu ya mvu. Nga kukwikidi ko vo e kiaki i salu kisundidi o mfunu? Vana ntandu, osia umbangi wa Yave ye Diambu diandi disiamisa lukwikilu ye nzol’aku. Yave oyangalela e  ngolo ovanga mu sala e salu kiaki. (Ayibere 6:10) Kuyivana emvimba mu salu kiaki dikusadisa mu sikila muna zola kwa Nzambi.—Tanga 1 Korinto 15:58.

17. Ekuma salu kia Akristu kifwete sadilwa mu nzaki o unu?

17 Diamfunu mpe mu sungamenanga vo e salu kia samuna nsangu za Kintinu nzaki kifwete salwa. O Nkand’a Nzambi uvovanga vo: ‘Samunang’e diambu mu nzaki.’ (2 Timoteo 4:2) Ekuma kifwete sadilwa mu nzaki o unu? Nkand’a Nzambi ukutuzayisanga vo: ‘E lumbu kianene kia Yave kifinamene, kifinamene ye nzaki kikwizilanga.’ (Sefania 1:14) Dialudi, e lumbu kefwasa e nza yayi yambi o Yave mu kwiza kina ye nzaki zawonso. O wantu bafwete lukiswa! Bafwete zaya vo e yayi i ntangwa ya sola Yave se Mfumu au. E mbaninu ‘ke yivekama ko.’—Kabakuke 2:3.

18. Ekuma tufwete sambilanga Yave entwadi ye ampangi zeto z’Akristu akieleka?

18 Yave ozolanga vo twansambilanga entwadi ye ampangi zeto z’Akristu akieleka. Muna kuma kiaki, o Nkand’a Nzambi uvovanga vo: “Mbula twabadikaziana mpe twapalanina muna zola yo mavangu mambote; ke tuvunz’o lungana ko, nze fu kia wantu akaka, tuwonzaziana kaka; yo siamisa wo o vanga, wau tumwene vo e lumbu se kifinamene.” (Ayibere 10:24, 25) Vava tukutakananga ye ampangi zeto za Akristu, tukalanga y’elau diambote mu sambila yo kembela Nzambi eto a nzodi. Muna tukutakanu twatu tusiamisanga yo kasakesa muntu yo nkw’andi.

19. Aweyi tulenda siamisina o zola muna nkutakani y’Akristu?

19 Vava tukalanga entwadi ye asambidi akaka a Yave, tusiamisanga o zola ye kikundi muna nkutakani. Diamfunu mu vavanga edi diambote dina muna konso muntu, nze una Yave kevavanga edi diambote dina mu yeto. Yambula vava o lunga kw’ampangi zaku z’Akristu. Sungamena dio vo lunungunuku lwa kimwanda lwa konso muntu lwaswaswana. Yeto awonso tu asumuki, vilwa tuvanganga.  (Tanga Kolosai 3:13.) O kalanga kikundi ye awana bezolanga Yave dikusadisa mu nungunuka muna kimwanda. Dialudi, o sambila Yave kumosi ye mpangi zaku z’Akristu dikusadisa mu sikila muna zola kwa Nzambi. O Yave aweyi kesambulwilanga awana bekunsambilanga ye kwikizi kiawonso? Aweyi kekubasadisilanga mu sikila muna zola kwandi?

VAVANGA ‘MOYO WAKIELEKA’

20, 21. Nki i ‘moyo wakieleka,’ ekuma unina se vuvu kiambote?

20 Yave osambulanga zingu kia selo yandi ya kwikizi, kansi nkia zingu? Nga i kiaki tuzinganga owau? Ndonga mu yeto balenda vova vo elo. Dialudi, yeto awonso tufulumunanga, tudianga yo nua. Tuvanganga mawonso mama mu kala moyo. Muna ntangwa a kiese nanga tulenda vova vo: “Wau i moyo wakieleka!” Kansi, Nkand’a Nzambi usonganga vo, o unu ke vena muntu ko una ye moyo wakieleka.

O Yave ozolele vo wavwa ‘moyo wakieleka.’ Nga osinga wo vwa?

21 Nkand’a Nzambi okutuwondelelanga ‘twavwa moyo wakieleka.’ (1 Timoteo 6:19) E mvovo wau usonganga vo ‘moyo wakieleka’ kusentu tuvwila wo vava tukituka wantu alunga. Tuvwa zingu nze kina kakana o Nzambi kuna lubantiku. Vava tuzingila muna paradiso ova ntoto ye mavimpi malunga, luvuvamu ye kiese, tuvwa ‘moyo a mvu ya mvu una vo i ‘moyo wakieleka.’ (1 Timoteo 6:12) Ekiaki i vuvu kiambote kikilu.

22. Aweyi olenda ‘vwila moyo una vo moyo wakieleka’?

22 Aweyi tulenda ‘vwila moyo wina vo moyo wakieleka’? Muna tini kia kaka kia kapu kiaki, Paulu wakasakesa Akristu “bavanga mawete, bavwamina muna mavangu mambote.” (1 Timoteo 6:18) Ediadi disonganga vo muna vwa moyo wau tufwete sadilanga mana tulongokanga muna Nkand’a Nzambi. Nga Paulu ukavova vo mu vanga mawete tuvwila ‘moyo wakieleka’? Ve, kadi o moyo wau mu nkenda za Nzambi kaka tuvwila wo. (Roma 5: 15) Ozevo, o Yave osambula awana bekunsadilanga ye kwikizi kiawonso. Ozolele kuvana ‘moyo wakieleka.’ Awana basikila muna zola kwa Nzambi bena ye vuvu kia zinga yakwele mvu mu luvuvamu ye kiese.

23. Ekuma dinina mfunu dia sikila muna zola kwa Nzambi?

23 Konso muntu mu yeto kafwete kiyuvula: ‘Nga isambilanga Nzambi mu mpila kasikidisa muna Nkand’a Nzambi?’ Avo tusambilanga Nzambi mu mpila yayi lumbu ke lumbu, mu nzil’ansongi tuna. Tulenda kala ye vuvu vo Yave i tininu dieto. O tanina selo yandi yakwikizi mu mpasi za lumbu yayi ya mbaninu. I bosi o Yave okutukotesa muna nz’ampa ifinamanga. Ekwe kiese kikala vava ilwaka ntangwa yayina! Diakiese dikala mpe mu zaya vo nsola yambote twasola mu lumbu yayi yambaninu. Avo osola e nsola yayi owau, osinga vwa ‘moyo wakieleka,’ moyo a mvu ya mvu una kakana o Yave wa Nzambi.