Tala mambu

Tala ntu mia mambu

Mbangi za Yave

Sola ndinga Kikongo

 NKUDIKA

E Lumbu kia Mfundisa i Nki?

E Lumbu kia Mfundisa i Nki?

AWEYI oyindulwilanga e lumbu kia mfundisa? Ndonga bebanzanga vo mazunda ma wantu betelama vana ndose a kunda kia Nzambi mu fundiswa. Akaka betambula nsambu za kwenda kun’ezulu, akaka batubwa kuna fulu kia mpasi zakwele mvu. Kansi, Nkand’a Nzambi diambu diakaka ulonganga mu kuma kia lumbu kiakina. Nkand’a Nzambi ke yikilanga kio nze lumbu kia mpasi ko, kansi nze lumbu kia vuvu ye luyangalalu.

Muna Lusengomono 20:11,  12, tutanganga mvovo mia Yoane mu kuma kia lumbu kia mfundisa vo: “Mbwene kunda kiampwena kiampembe, yo Ndion’ovwende kio, vana luse luandi e nza y’ezulu ditinini, yau ke imonekena fulu. Mbwene o mafwa, y’anene y’andwelo, batelamene vana ndose a kunda; e nkanda mizingumwinu: owaka nkanda uzingumwinu mpe, una vo wa moyo: vo i mafwa, mafundisilu muna mambu masonama muna nkanda, mun’owu wa mavangu mau.” Nani i mfundisi oyikwanga ovava?

Yave wa Nzambi i mfundisi anene a wantu. Kansi,  wasola muntu akaka mu kala se mfundisi. Muna Mavangu 17:31, Paulu wavova vo Nzambi ‘wasikidisa e lumbu, kina kefundisil’e nza muna nsongi muna muntu ndiona kasola.’ Yesu Kristu i muntu wasolwa se Mfundisi. (Yoane 5:22) Nkia ntangwa kiyantika e Lumbu kia Mfundisa? Kolo kwa kizingila?

Nkanda Lusengomono usonganga vo e Lumbu kia Mfundisa kiyantika kuna nima vita ya Armangedo, vava Satana ye nz’andi ifwaswa. * (Lusengomono 16:14, 16; 19:19–20:3) Kuna nima Armangedo, Satana ye nkwiya miandi besiwa muna pelezo mu zunda dia mvu. Muna ntangwa yayina, 144.000 betambula e fulu yau kun’ezulu ‘yo yala kumosi yo Kristu, muna 1.000 dia mvu.’ (Lusengomono 14:1-3; 20:1-4; Roma 8:17) Ikuma vo, e Lumbu kia mfundisa ke lumbu kia ola 24 ko. Zunda dia mvu kizingila.

Mun’ezunda dia mvu, Yesu Kristu “ofundis’ay’amoyo, yo mafwa.” (2 Timoteo 4:1) “Amoyo” i “ndong’ayingi” ivuluka muna vita ya Armangedo. (Lusengomono 7:9-17) Ntumwa Yoane wamona mpe “o mafwa, . . . batelamene vana ndose a kunda” kia lufundisu. Nze una kasia nsilu o Yesu, ‘awonso bena muna nkala bewa nding’andi [Kristu], bevaika’ muna lufuluku. (Yoane 5:28, 29; Mavangu 24:15) Kansi mu nkia kuma befundisilwa?

Muna mona-meso ya Yoane wa ntumwa, “e nkanda mizingumwinu,” “mafwa, mafundisilu muna mambu masonama muna nkanda, mun’owu wa mavangu mau.” (Lusengomono 20:12) Nga muna nkanda miami mavangu ma nkulu ma wantu masonama mo? Ve, o wantu ke befundisilwa mu kuma kia mana bavanga ko una ke bafwidi ko. Aweyi tuzayidi wo? Nkand’a Nzambi uvovanga vo: ‘On’ofwidi kala, wakutululwa mun’esumu.’ (Roma 6:7) Ozevo, awana befulwa bevutuka ye kiwuntu kia kondwa masumu. Muna kuma kiaki, nkand’a lufundisu nkanikinu miakaka mia Nzambi usonganga. Muna vwa moyo a mvu ya mvu, awana bevuluka muna Armangedo ye awana  befuluka bafwete lemvokela nsiku mia Nzambi, kumosi mpe ye nkanikinu miampa kevana Yave muna kolo kia zunda dia mvu. I kuma vo, konso muntu ofundisilwa muna mana kevanga muna Lumbu kia Lufundisu.

E Lumbu kia Lufundisu kivana elau kwa mazunda ma wantu mu longoka yo zingila e ngwizani ye luzolo lwa Nzambi. Ediadi disonganga vo vekala ye salu kia longa wantu muna nz’amvimba. Ozevo, “wantu a nza belongwa unsongi.” (Yesaya 26:9) Kansi, ke wantu awonso ko i bezola kal’e ngwizani ye luzolo lwa Nzambi. Muna Yesaya 26:10 tutanganga vo: “Kana nkenda zifwilwa kimpumbulu, kelongwa unsongi ko; muna nsi a ndungidi i kevang’oma ma vilwa, ke mu tala nene wa Yave ko.” Yimpumbulu yayi yifwaswa emvimba muna Lumbu kia Lufundisu.Yesaya 65:20.

Kuna mfoko a Lumbu kia Lufundisu, awana bevuluka bekala yo “moyo” alunga. (Lusengomono 20:5) Muna Lumbu kia Lufundisu wantu bevutulwiswa o lunga nze una wakala kuna lubantiku. (1 Korinto 15:24-28) I bosi kikwiza lutonto lwa nsuka. Satana ovaikiswa muna pelezo yo yambulwa kavukumuna wantu e nkumbu a nsuka. (Lusengomono 20:3, 7-10) Awana bezindalala bemona e ndungana ya nsilu wau wa Nkand’a Nzambi: “Asongi bevwa nza, besikila vo yakwele mvu.” (Nkunga 37:29) Elo, e Lumbu kia Lufundisu nsambu kitwasa kwa wantu awonso akwa kwikizi!

^ tini. 1 Muna zaya mambu makaka mu kuma kia Armangedo, tala nkanda Estudo Perspicaz das Escritura, Volume 1, lukaya lwa 711-712; Volume 2, lukaya lwa 286-287, ye kapu kia 20 kia nkanda Sambila Nzambi Mosi Kaka Aludi, miavaikiswa kwa Mbangi za Yave.