NKAND’a Nzambi ke ukutuzayisanga ko e lumbu kawutuka o Yesu. Kansi, vena ye mambu uyikanga mesonganga vo Yesu kawutuka mu ngonde ya Desemba ko.

Yindula e nsungi ikalanga muna ngonde ya Desemba kuna Beteleme kawutukila o Yesu. E ngonde Ayuda ya Kisileu (ina betela ye ngonde ya Novemba ye Desemba) nsungi a kiozi ye mvula kuna Beteleme. E Tebete (Desemba/Yanuali) i ngonde yilandilanga e nsungi yoyo. Muna ngonde zazi miongo mizalanga ye mbungezi. Yambula twatala dina kevovanga Nkand’a Nzambi mu kuma kia nsungi za zunga kia Beteleme.

O Nkand’a Nzambi muna Ezera usonganga vo e Kiseleu ngonde a kiozi ye mvula. O Ezera wavova vo o nkangu vava wakutakana muna Yerusaleme “e ngonde ina yevwa, [Kiseleu] e lumbu kia 20 kia ngonde, bazakamene mu kuma kia . . . mvul’ayingi.” Muna kuma kiaki, o nkangu wavova vo: “Ke  tulendi kala va mbazi ko.” (Ezera 10:9, 13; Yeremiya 36:22) Ozevo, avungudi ana bazingilanga muna zunga kia Beteleme ke balendi kala mu nzanza ko yo mameme mau muna fuku muna ngonde ya Desemba.

Kansi, Nkand’a Nzambi usonganga vo muna fuku kawutuka o Yesu, avungudi mu nzanza bakala yo mameme mau. O Luka wa nsoneki a Nkand’a Nzambi osonganga vo muna fuku diadina, avungudi ‘bayingilang’ekambi diau’ muna nzanza miafinama ye Beteleme. (Luka 2:8-12) Avungudi bayenda muna nzanza yo mameme mau, ke mu mwini ko kansi mu fuku. Nga dilendakana vo bakala muna nzanza muna ngonde ya Desemba wau vo nsungi akiozi ye mvula kuna Beteleme? Ve kikilu. Ozevo, o mambu mabwa muna lumbu kia luwutuku lwa Yesu mesonganga vo kawutuka mu ngonde ya Desemba ko. *

Nkand’a Nzambi ukutuzayisanga e lumbu kiafwa Yesu, kansi mambu makete kaka keyikanga malenda kutusadisa muna zaya lumbu kina kawutuka. Ediadi dikutusungamesanga mvovo mia Solomo wa ntinu vo: ‘Nkumbu ambote isundidi mazi mantalu o mfunu; e lumbu kia lufwa kilutidi kina kia ngutuka.’ (Kimpovi 7:1) Muna kuma kiaki, o Nkand’a Nzambi ulutidi vova mambu mayingi mu kuma kia salu ye lufwa lwa Yesu, kansi makete kaka keyikanga mu kuma kia ngutuka andi.

Muna fuku kawutuka o Yesu, avungudi mu nzanza bakala ye mameme mau

^ tini. 1 Muna zaya diaka makaka, tala nkanda Raciocínios à Base das Escrituras, muna lukaya lwa 167-169, wavayikiswa kwa Mbangi za Yave.