Tala mambu

Tala ntu mia mambu

Mbangi za Yave

Sola ndinga Kikongo

 ELONGI DIA 10

Aweyi Olenda Zayila e Nsambila Aludi?

Aweyi Olenda Zayila e Nsambila Aludi?

1. Nga vena ye nsambila mosi kaka aludi?

“Nuluka kweno ye ngunza zaluvunu.”—MATAI 7:15.

Yesu nsambila mosi kaka kalonga kwa alongoki andi: I nsambila aludi. Ina nze nzila ifilanga ku moyo a mvu ya mvu. Yesu wavova vo: “Ke bengi ko ana besolola” nzila yayi. (Matai 7:14) Nzambi nsambila mosi kaka ketondanga ina ngwizani ye Diambu diandi. Asambidi awonso aludi bayikakiana muna lukwikilu lumosi.—Tanga Yoane 4:23, 24; 14:6; Efeso 4:4, 5.

2. Yesu adieyi kavova mu kuma kia Akristu aluvunu?

“Bekusanang’o zaya Nzambi; kansi muna mavangu mau nkalu bekumvananga.”—TITO 1:16.

Yesu walukisa vo ngunza zaluvunu beyivisa mabundu ma Kikristu. Balenda moneka nze asambidi aludi. Bekuyikilanga vo Akristu. Kansi olenda kubazayila mu mana bevanganga. Mu nkia mpila? Nsambila aludi kaka ivaikisanga Akristu akieleka ana balenda zayakena muna mavangu ye mpila zingu kiau.—Tanga Matai 7:13-23.

3. Aweyi olenda zayila asambidi akieleka?

Badika sinsu tanu ikubaswanesanga:

  • Asambidi akieleka bezitisanga o Nkand’a Nzambi. Besianga e ngolo za zingila e ngwizani ye nkanikinu mina mo. Muna kuma kiaki, e nsambila aludi yaswaswana kikilu ye nsambila zilonganga ngindu za wantu.  (Matai 15:7-9) Asambidi akieleka bezingilanga e ngwizani ye mana belonganga.—Tanga Yoane 17:17; 2 Timoteo 3:16, 17.

  • Alandi akieleka a Yesu bezitisanga e nkumbu a Nzambi, Yave. Yesu wazitisanga e nkumbu a Nzambi muna zayisa yo kw’akaka. Wasadisa wantu bazaya Nzambi yo kubalonga basambanga vo e nkumbu a Nzambi yazitiswa. (Matai 6:9) Muna zunga kiaku, aki nani belonganga wantu e nkumbu a Nzambi?—Tanga Yoane 17:26; Roma 10:13, 14.

  • Akristu akieleka besamunanga Kintinu kia Nzambi. Nzambi watuma Yesu muna samuna nsangu zambote za Kintinu. Kintinu kia Nzambi kaka kifokola e mpasi za wantu. Yesu wakwamanana samuna e nsangu zazi yamuna lumbu kia lufwa lwandi. (Luka 4:43; 8:1; 23:42, 43) Wavova vo alandi andi besamuna e nsangu za Kintinu kia Nzambi. Avo muntu wizidi ku nzo aku mu kusamunwina e nsangu za Kintinu kia Nzambi, mu nkia dibundu obenze kesambidilanga?—Tanga Matai 24:14.

  • Alandi a Yesu ke ba nza yayi yambi ko. Olenda kubazaya wau vo ke bekuyisianga mu mambu ma tuyalu ko, ngatu mu ntantani za yintwadi ya nza. (Yoane 17:16; 18:36) Vana ntandu, ke betangininanga mavangu mambi ko ye fu ya nza yayi.—Tanga Yakobo 4:4.

  • Akristu akieleka besonganga kikilu o zola kwa muntu yo nkw’andi. Belongokanga muna Nkand’a Nzambi vo bazitisanga wantu a makanda mawonso. Kana una vo esi mabundu maluvunu beyikamanga e vita za wantu a nza, Akristu akieleka ke bevanganga wo ko. (Mika 4:1-3) Kuna mvevo wawonso, besadilanga ntangwa ye mavwa mau muna sadisa yo kasakesa akaka.—Tanga Yoane 13:34, 35; 1 Yoane 4:20.

4. Nga olenda solola e nsambila aludi?

Nkia dibundu besadilanga Nkand’a Nzambi muna mawonso belonganga, bezitisanga nkumbu a Nzambi yo samuna vo Kintinu kiandi kaka kifokola e mpasi zawonso za wantu? Aki nani besonganga o zola yo lembi yikama e vita? Adieyi obenze?—Tanga 1 Yoane 3:10-12.