Tala mambu

Tala ntu mia mambu

Mbangi za Yave

Sola ndinga Kikongo

 ELONGI DIA 3

E Nsangu Zambote nga kwa Nzambi Kikilu Zatuka?

E Nsangu Zambote nga kwa Nzambi Kikilu Zatuka?

1. Nani i Nsonekesi a Nkand’a Nzambi?

E nsangu zambote za sia vo wantu besinga zinga yakwele mvu ova ntoto mu Nkand’a Nzambi zasonama. (Nkunga 37:29) Nkand’a Nzambi uvwidi nkanda 66 miakete. Nzambi wasadila tezo kia 40 ma wantu akwa kwikizi mu soneka nkanda miami. E nkanda tanu miantete miasonekwa kwa Mose se vioka tezo kia 3.500 za mvu. O nkanda wansuka wasonekwa kwa Yoane wa ntumwa se vioka tezo kia 1.900 za mvu. Asoneki a Nkand’a Nzambi ngindu za nani basoneka? Nzambi wasadila mwand’andi avelela mu zayisa nsangu zandi kw’asoneki a Nkand’a Nzambi. (2 Samuele 23:2) Ngindu za Nzambi basoneka, ke za yau kibeni ko. Muna kuma kiaki, Yave i nsonekesi a Nkand’a Nzambi.—Tanga 2 Timoteo 3:16; 2 Petelo 1:20, 21.

2. Aweyi tulenda kadila ye ziku vo Nkand’a Nzambi ludi uvovanga?

Tuzeye wo vo Nkand’a Nzambi kwa Nzambi watuka kadi uyikanga ye sikididi kiawonso e mambu mebwa kuna sentu. Ka vena muntu ko lenda wo vanga. (Yosua 23:14) Nzambi wa Mpungu-ngolo kaka lenda zaya mana mebwila wantu kuna sentu.—Tanga Yesaya 42:9; 46:10.

Nkand’a Nzambi waswaswana ye nkanda miakaka. Mazunda ye mazunda ma Nkand’a Nzambi mikayaneswanga mu ulolo wa ndinga. Kana una vo se wankulu, Nkand’a Nzambi ngwizani wina ye ngangu za nza. Mana mpe asoneki 40 a Nkand’a Nzambi basoneka ngwizani mena. * Vana ntandu, mana masonama muna Nkand’a Nzambi mu kuma kia zola mesonganga vo kwa Nzambi kikilu watuka una vo Nzambi a zola. Nkand’a Nzambi wakinu ye nkuma wa soba zingu kia wantu. E ziku yayi yawonso ikwikidisanga wantu ayingi vo nkanda wau Diambu dia Nzambi kikilu.—Tanga 1 Tesalonika 2:13.

 3. Nkia mambu mena muna Nkand’a Nzambi?

Dimosi muna mambu masina mena muna Nkand’a Nzambi i nsangu zambote za sia vo, Nzambi ovwidi ekani diambote mu kuma kia wantu. Nkand’a Nzambi usonganga una muntu kavidisila elau dia zingila muna paradiso ova ntoto, kuna lubantiku lwa lusansu lwa wantu. Usonganga mpe una ntoto usinga kitukila diaka se paradiso.—Tanga Lusengomono 21:4, 5.

Muna Diambu dia Nzambi muvwidi mpe nsiku, nkanikinu ye tuludiku. Vana ntandu, Nkand’a Nzambi uyikanga nona isonganga una Nzambi kekadilanga yo wantu. Nona yayi ikutulonganga kiwuntu kia Nzambi. Muna kuma kiaki, Nkand’a Nzambi ulenda kusadisa mu zaya Nzambi. Usonganga una lenda kadila se nkundi andi.—Tanga Nkunga 19:7, 11; Yakobo 2:23; 4:8.

4. Aweyi olenda bakulwila Nkand’a Nzambi?

Finkanda fiafi fikusadisa mu bakula Nkand’a Nzambi, kadi usadilanga e ndekwa zina kasadilanga o Yesu. Uyikanga sono yayingi ya Nkand’a Nzambi yo van’e ‘nsas’a sono.’—Tanga Luka 24:27, 45.

Ka vena diambu ko diluta vananga kiese avo ke nsangu zambote za Nzambi ko. Kana una vo i wau, wantu ayingi ke beyangalelanga zo ko. Akaka nkutu makasi zikubafungisanga. Kuyambula ko vo ediadi diayoyesa. Kadi muna kala ye vuvu kia zinga yakwele mvu, divavanga vo watoma zaya Nzambi.—Tanga Yoane 17:3.

 

^ tini. 3 Tala muna finkanda Um Livro Para Todas as Pessoas.