Tala mambu

Tala ntu mia mambu

Mbangi za Yave

Sola ndinga Kikongo

 ELONGI DIA 9

Aweyi esi nzo aku Balenda Kadila ye Kiese?

Aweyi esi nzo aku Balenda Kadila ye Kiese?

1. Ekuma o kazala kwinina o mfunu muna kala ye zingu kia nzo kiakiese?

E nsangu zambote kwa Yave wa Nzambi a kiese zitukanga, ona ozolele vo esi nzo bakala ye kiese. (1 Timoteo 1:11) Yave i tuku dia longo. O kazala mfunu kwina muna kala ye zingu kia nzo kiakiese kadi kusadisanga akazi bazinga vamosi yo sansa o wana mu mpila yambote.

O Nzambi aweyi kebadikilanga longo? Ozolanga vo yakala yo nkento basikila muna longo. Akristu bafwete landa e nsiku mia nsi au muna sonekesa longo lwau kwa luyalu. (Luka 2:1, 4, 5) Yave ozolanga vo akazi basonganga kwikizi kwa muntu yo nkw’andi. (Ayibere 13:4) Omenganga evangu dia vonda longo. (Malaki 2:16) Kansi otondanga vo Nkristu kavonda longo yo sompa diaka wakaka, avo nkaz’andi otele zumba.—Tanga Matai 19:3-6, 9.

2. Yakala yo nkento aweyi bafwete kadilanga muntu yo nkw’andi?

Yave wasema yakala yo nkento muna salaziana muna longo. (Etuku 2:18) Wau vo yakala i ntu, kafwete vitang’o ntu mu lungisa nsatu za nitu za esi nzo andi yo kubalonga oma ma Nzambi. Kafwete toma zolanga nkaz’andi. Yakala yo nkento bafwete zolananga yo zitisa muntu yo nkw’andi. Wau vo yakala yo nkento wantu alembi lunga, o zaya loloka i nsabi muna kala ye longo lwakiese.—Tanga Efeso 4:31, 32; 5:22-25, 33; 1 Petelo 3:7.

 3. Nga ofwete vambana yo nkaz’aku avo kuna ye longo lwakiese ko?

Avo ntantani luna zau muna longo lweno, yeno awole nufwete sia e ngolo za vangila mawonso kuna zola. (1 Korinto 13:4, 5) Diambu dia Nzambi ke dilonganga ko vo vambana i nzil’a fokolwela e ntantani muna longo.—Tanga 1 Korinto 7:10-13.

4. Wana, adieyi Nzambi kevavanga kwa yeno?

Yave ozolele vo nwakala ye kiese. Okunuvananga malongi mambote kimana nwakala ye kiese muna kileke kieno. Ozolanga vo nwabak’e nluta muna ngangu ye mambu mayingi mana mase meno bazeye. (Kolosai 3:20) Yave ozolanga mpe vo nwamona e kiese kitukanga muna vanga mambu meyangidikanga Nsemi eno ye Mwan’andi.—Tanga Kimpovi 11:9–12:1; Matai 19:13-15; 21:15, 16.

5. Mase, aweyi wan’eno balenda kadila ye kiese?

Nufwete sia ngolo za vavila wan’eno madia, fulu kia leka ye mvwatu. (1 Timoteo 5:8) Kansi, o wan’eno muna kala ye kiese, nufwete mpe kubalonga bazola Nzambi yo longoka mambu mandi. (Efeso 6:4) E mbandu nusonganga ya zola Nzambi ilenda simba ntima mia wan’eno. Avo nusadidi Nkand’a Nzambi, malongi meno malenda soba e ngindu za wan’eno.—Tanga Nsiku 6:4-7; Ngana 22:6.

Wana beyangalalanga vava mase mau bekubakasakesanga yo kubasanisina. Elongi ye tumbu mpe bevwang’o mfunu. O vanga wo disadisa wana balembi landa nzila zikubatwasila mpasi muna zingu. (Ngana 22:15) Kansi, ke diambote ko mu kubabangika yovo kubafungisa makasi.—Tanga Kolosai 3:21.

Mbangi za Yave bevaikisanga nkanda mia mpila mu mpila mu sadisa mase yo wana. Malongi mena mu nkanda miami mu Nkand’a Nzambi metukanga.—Tanga Nkunga 19:7, 11.