Tala mambu

Tala ntu mia mambu

Mbangi za Yave

Sola ndinga Kikongo

Nkanda wa Buka kia Selo Yambuta

Nkanda wa Buka kia Selo Yambuta

Kw’akweto Ateleki a Kintinu:

YINDULA vo u mosi muna esi Betele ya Brooklyn. Kina Kiatanu muna mene wa kia 2 Okutoba, 1914, ovwende vana fulu kiaku vana meza muna ola ya dia kwa mene, ovingilanga vo mpangi Charles T. Russell kalwaka. I bosi, omwene kielo kia seka dia dila kiziukidi, o mpangi Russell okotele. Nze una kevanganga kala, oningamene mu fikolo yo kayisa esi Betele vo: “Kiambote kieno yeno awonso.” Kansi, vana fulu kia vwanda vana kunda kiandi vana vau, osikidi makonzo mu tunta e sungididi yo zayisa kuna kiese kiawonso vo: “E Tandu ya Zula ifokokele ye ntinu miau mpe!” E kiese kiaku kiwokele, kadi se mvu miayingi ovingilanga e kolo kiaki. Kumosi ye mpangi zakaka za Betele, otomene yangalela nsangu zazi yo sika makonzo.

Mvu miayingi miviokele kala tuka mpangi Russell kavanina luzayisu  lwalu lwakiese. Nkia mambu kilungisi kala e Kintinu tuka muna mvu wauna? Mayingi kikilu! Yave osadilanga Kintinu kiaki mu velelesa yo longa nkangu andi malembe-malembe. Akete kaka bakala muna mvu wa 1914, kansi o unu se tezo kia milhão nana. Nkia nluta obakanga muna nkubika kesadilanga o Nzambi muna kutulonga?

O unu, nkumbu miayingi tuwanga ampangi bevovanga vo: “Ekalu dia zulu dia Yave mu diata dina.” Ediadi dialudi kikilu. Kansi nze una tumona ekolo tutanga nkanda wau, e ziku kisonganga vo tuka muna mvu wa 1914, ekalu diadi disunzulanga e nkubik’a Yave kuna zulu, didiatanga mu nzaki zawonso. Muna sayanesa e nsangu zambote mu nza yawonso, ateleki a Kintinu besadilanga ndekwa za mpila mu mpila, nze zulunalu, kangala muna nzila za mbanza, filme yasonganga fwaniswa, kalati ya sila umbangi, fonógrafo, radio ye Internete.

Wau vo Yave osambulanga salu kieto, owau tuvaikisanga nkanda misasilanga Bibila mu vioka 670 lwa ndinga yo kayanesa mio kwa wantu mu ngovo. Mpangi zayingi bekuyivananga kuna mvevo muna salu kia tunga Maseka ma Kintinu, Maseka ma Tukutakanu twampwena ye mavula, kiakala mu nsi za umvwama yovo za usukami. Vava vebwanga sumbula, mpangi z’akala ye z’akento bekubamanga mu nzaki mu kwenda sadisa awana babwidilu sumbula mu songa kieleka vo ampangi ana ‘bawutukila muna ntangw’a mpasi.’—Nga. 17:17.

Nkumbu miayingi, e mfumu za mabundu ye atantu akaka ‘besadilanga nsiku muna soka mambu ma nsoki.’ Kansi, dialukasakeso mu mona vo e makani mau mambi mesadisanga nkutu mu ‘nungununa e nsangu zambote.’—Nku. 94:20; Fili. 1:12.

Dia nsambu kikilu mu sala yeno entwadi, akweto ‘selo ya nzo’ a Ntinu. Nuzaya wo vo tutoma kunuzolanga yeno awonso. Tusamba kwa Yave kimana oma mena mu nkanda wau manusadisa mu wokesa luyangalalu lweno muna vwa dieto dia mwanda.—Mat. 24:45.

Tunutwikidi mavimpi,

Mpangi zeno,

Buka kia Selo Yambuta ya Mbangi za Yave