ADIEYI omwene ovava? Elo, makesa vana mvalu miampembe. Akweyi betuka? Kun’ezulu, muna matuti bediatilanga. Nga kuna kieleka ye mvalu kun’ezulu?

Yesu se Ntinu kun’ezulu

Ve. E mvalu ke milendi diatila muna matuti ko. Kansi, Nkand’a Nzambi uyikanga vo kuna ye mvalu kun’ezulu. Nga ozeye ekuma?

E kuma kadi, kuna nz’ankulu wantu mvalu basadilanga muna nwana e vita. Ozevo, Nkand’a Nzambi usonganga vo wantu bamente mu mvalu yo kulumuka tuka kun’ezulu mu songa vo Nzambi onwana vita yo wantu ova ntoto. Nga ozeye nkumbu a vita yayi? Armangedo. E vita yayi isukisa e mbi yawonso ova ntoto.

Yesu okala se ntu muna vita ya Armangedo. Sungamena vo Yesu wasolwa kwa Nzambi mu yala se ntinu muna luyalu lwandi. Ekiaki i kuma o Yesu kavwatidi kolowa a kintinu. E nsosolo vana koko kwandi, usonganga vo ofwasa atantu a Nzambi awonso. Nga difwene kutusivikisa vo Nzambi ofwasa yimpumbulu yawonso?

Tala muna Lusansu lwa 10. Adieyi omwene? Elo, Kizalu kiampwena kiafwasa wantu ambi. Nani watwasa Kizalu kiaki? Yave wa Nzambi. Owau, tala Lusansu lwa 15. Nkia diambu disongwanga mo? Sodomo ye Ngomora ifwasilu muna tiya katwika o Nzambi.

Ziula Lusansu lwa 33. Tala dina diabwila mvalu ye akwa mvalu mia Angipito. Nani wabadimunwisa muna maza? Yave. Wavanga wo muna tanina nkangu andi. Tala Lusansu lwa 76. O Yave wayambula nkangu andi, Aneyisaele bavondwa mu kuma kia bi wau.

Ozevo, ka tufwete sivika ko vo o Yave ofila makesa mandi m’ezulu mu sukisa mbi yawonso ova ntoto. Aweyi disongele ediadi? Tala lukaya lulende.

Lusengomono 16:16; 19:11-16.



Yuvu

  • Ekuma Nkand’a Nzambi keyikilanga mvalu kun’ezulu?
  • Nga ozeye nkumbu a vita ketwasa o Nzambi kwa yimpumbulu ova ntoto? Nkia kuma ketwasila e vita yayi?
  • Nani okala se ntu muna vita yayi nze una usongwanga muna fwaniswa? Ekuma kavwatidi kolowa? E nsosolo andi nkia nsasa una?
  • Avo tutadidi muna Lusansu lwa 10, 15 ye 33, ekuma ka tufwete sivikila ko vo Nzambi ofwasa yimpumbulu yawonso?
  • O lusansu lwa 36 ye 76 aweyi lusongelanga vo Nzambi ofwasa wantu ambi kana nkutu bevovanga vo yandi besambilanga?

Yuvu yakaka

  • Tanga Lusengomono 19:11-16.

    O Nkand’a Nzambi aweyi ukieseselanga vo Yesu Kristu yandi wafonga vana mvalu ampembe? (Lus. 1:5; 3:14; 19:11; Yes. 11:4)

    O menga mazazwa muna mvwatu mia Yesu aweyi mesongelanga vo e nsundidi andi yasikila yo lunga? (Lus. 14:18-20; 19:13; Yes. 63:1-6)

    Aki nani i makesa melandanga Yesu vana mvalu miampembe? (Lus. 12:7; 19:14; Mat. 25:31, 32)