Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 113: Paulu Kuna Roma

Lusansu lwa 113: Paulu Kuna Roma

TALA Paulu wakangama muna luvambu, tala mpe ekesa dia Roma okunyingilanga. Paulu osilu muna pelezo kuna Roma. Ovingilanga e nzengo za Kaisa wa nyadi a Roma. Ekolo kena muna pelezo, olenda kwandi tambula nzenza.

Vava kiavioka lumbu tatu, Paulu obokelese ana bakala se ntu muna Ayuda bazingilanga kuna Roma. Ndonga muna Ayuda bayenda kunkingula. Ubasididi kintinu kia Nzambi umbangi, yo kubalonga oma ma Yesu. Akaka bakwikidi yo kituka Akristu, akaka balembele kwikila.

Paulu muna pelezo

Paulu wasila mpe umbangi kwa makesa ma mpila mu mpila mana manyingilanga. Mvu miole miamvimba kakala pelezo mu nzo yayi. Paulu wasilanga umbangi kw’awonso. E nzo ya Kaisa mpe yawa e nsangu zambote za Kintinu, akaka muna yau bakituka se Akristu.

Kansi, nani i muntu osonekanga vana meza mama? Nga unzeye? Yandi i Timoteo. Timoteo mpe wakala muna pelezo mu kuma kia samuna sangu zambote za Kintinu. Kansi, wavaikiswa. Ozevo, wayenda kuna Roma mu sadisa Paulu. Nga ozeye mambu kesonekanga Timoteo? Yambula twazaya mo.

Nga osungamene mbanz’a Filipi ye Efeso zina twalongokele muna lusansu lwa 110? Paulu yandi waziula nkutakani muna mbanza zazina. Ozevo, ekolo kena muna pelezo wasoneka nkanda kwa ampangi zazina. E nkanda miomio, mina muna Nkand’a Nzambi, miyikwanga vo Efeso ye Filipi. O Paulu mu vovesa kena Timoteo mana kesonekena Akristu kuna Filipi.

Mpangi za esi Filipi basonga Paulu e ngemba. Bamfidila lukau muna pelezo, o Paulu ubatondele mu kuma kiaki. Epaferodito yandi watwasa lukau lwalu. Kansi, obakamene mayela, se ke fwa. Wau, osasukidi se kevutuka kuna Filipi. Yandi onata nkanda Paulu ye wa Timoteo kwa ampangi kuna Filipi.

Ekolo kakala muna pelezo, Paulu wasoneka diaka nkanda miole miakaka, emi mina muna Nkand’a Nzambi. Umosi kwa Akristu kuna Kolosai. Wakaka kwa nkundi andi Filemone ona wazingilanga mpe kuna Kolosai. Wasoneka mu kuma kia Onesemo wa ntaudi a Filemone.

Onesemo ntaudi a Filemone kakala, kansi wantina yo kwenda kuna Roma. Onesemo owidi vo o Paulu una kuna Roma nze nkangami. Wele kunkingula, o Paulu unsamunwini nsangu zambote. Ke kolo ko, Onesemo okitukidi se Nkristu. Okendalele kikilu mun’evangu kavanga, dia tina mfumu andi a salu. Ng’ozeye nkia mambu kasoneka Paulu muna nkand’andi kwa Filemone?

Paulu olombele kwa Filemone kaloloka Onesemo. Owu kasoneka: ‘Mputwidi Onesemo kwa ngeye. Wakala yandi, ke nze ntaudi aku kaka ko, kansi owau se mpangi aku muna kimwanda.’ Vava Onesemo kavutuka kuna Kolosai wanata nkanda miole miami, umosi kwa ampangi muna nkutakani ya Kolosai, wakaka kwa Filemone. Nkia mpila kiese kamona o Filemone vava kazaya vo o ntaudi andi wakituka se Nkristu?

Vava Paulu kasoneka kw’ampangi kuna Filipi ye kwa Filemone nsangu zambote kabasonekena. ‘Inutwikidi Timoteo’ i kasoneka kw’ampangi kuna Filipi, ‘ke kolo ko mono mpe ikunukingula.’ Kwa Filemone wasoneka vo: ‘Unkubikila esuku.’

Vava Paulu kavaikiswa muna pelezo, wakingula mpangi zamakala ye zamakento mu fulu yayingi. Kansi, wakoteswa diaka mu pelezo. E nkumbu wau Paulu wazaya wo vo ovondwa. Muna kuma kiaki, osonekene Timoteo keza mu nswalu, oku vo: ‘Yasikila muna kwikizi kwa Nzambi, o Nzambi okunsenda.’ Vioka mvu miakete, Paulu wavondwa. Kuna nima lufwa lwandi, e Yerusaleme yafwaswa diaka o nkumbu wau kwa esi Roma.

Kansi, Nkand’a Nzambi uyikanga mpe mambu mebwa kuna sentu. Yave wa Nzambi wasadila Yoane wa ntumwa mu soneka nkanda miansuka mia Nkand’a Nzambi, kumosi ye nkanda Lusengomono. O nkanda wau mambu ma kusentu uyikanga. Yambula twazaya mambu mebwa kuna sentu. Mavangu 28:16-31; Filipi 1:13; 2:19-30; 4:18-23;

Ayibere 13:23; Filemone 1-25; Kolosai 4:7-9; 2 Timoteo 4:7-9.



Yuvu

  • Vava Paulu kakala muna pelezo kuna Roma aki nani kasila umbangi?
  • E nzenza ndiona una vana mesa muna fwaniswa nani? Adieyi kevanganga mu kuma kia Paulu?
  • Nani i Epaferodito? Nki kanata vava kavutuka kuna Filipi?
  • Ekuma Paulu kasonekena nkanda kwa nkundi andi Filemone?
  • O Paulu adieyi kavanga vava kavaikiswa muna pelezo? Adieyi diambwila vioka fikolo?
  • Nani kasadila o Yave mu soneka nkanda mia nsuka muna Nkand’a Nzambi? E nkanda Lusengomono ameyi uyikanga?

Yuvu yakaka

  • Tanga Mavangu 28:16-31 ye Filipi 1:13.

    O Paulu aweyi kasadilanga ntangw’andi vava kakala muna pelezo kuna Roma? O lukwikilu lwandi lwasikila aweyi lwakasakesela nkutakani za Kikristu? (Mav. 28:23, 30; Fili. 1:14)

  • Tanga Filipi 2:19-30.

    Nkia mvovo mia matondo kavova Paulu mu kuma kia Timoteo yo Epaferodito? Aweyi tulenda tanginina mbandu a Paulu? (Fili. 2:20, 22, 25, 29, 30; 1 Kor. 16:18; 1 Tes. 5:12, 13)

  • Tanga Filemone 1-25.

    O Paulu nkia kuma kawondelela Filemone kavanga edi diansongi? Ediadi aweyi disadisilanga akuluntu o unu? (File. 9; 2 Kor. 8:8; Ngal. 5:13)

    E mvovo mia Paulu mina muna Filemone 13, 14, aweyi misongelanga vo wazitisanga e ngindu z’akaka muna nkutakani? (1 Kor. 8:7, 13; 10:31-33)

  • Tanga 2 Timoteo 4:7-9.

    Aweyi tulenda kadila ye vuvu vo Yave okutusambula avo tuzindalala yakuna mbaninu nze Paulu? (Mat. 24:13; Ayib. 6:10)