Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 110: Timoteo wa Nsadisi a Paulu

Lusansu lwa 110: Timoteo wa Nsadisi a Paulu

NLEKE una vava yo Paulu i Tomoteo. Timoteo wazinganga y’esi nzo andi kuna Luseta. O ngw’andi nkumbu andi Yuniki, e nkak’andi ankento nkumbu andi Loi.

Owau i nkumbu etatu o Paulu kekingulanga Luseta. Mvu mosi wavioka tuka Paulu yo Banaba bayiza samunwina nsangu zambote kuna Luseta mu nkumbu antete, owau, Paulu ovutukidi ko ye Sila wa nkundi andi.

Timoteo ye Paulu

Nga ozeye nkia diambu kevovanga Paulu kwa Timoteo? Oyuvwidi Timoteo vo: ‘Ng’ozolele kangala yame yo Sila? Lusadisu lwaku tuvava muna samuna nsangu zambote ku fulu yakaka.’

Timoteo umvutwidi vo: ‘Elo, nkwenda yeno.’ Ke kolo ko, Timoteo osisidi esi nzo andi yo kwenda yo Paulu yo Sila. Kansi, una ke tulongokele ko oma ma nkangalu wau, yambula twateka zaya mana mabwila Paulu. Mvu 17 miavioka tuka Yesu kamonekena kwa Paulu muna nzil’a Dameseke.

Sungamena vo o Paulu wayenda kuna Dameseke mu kanga alongoki a Yesu. Oku kwalanda, yandi kibeni owau okitukidi se nlongoki a Yesu. Ke kolo ko, atantu bavavidi vonda Paulu kadi ke bazolanga malongi mandi ko, wau vo oma ma Yesu kalonganga. Kansi, alongoki batinisa Paulu. Bansidi muna mbangu, bankulumwinini muna yaka, kuna mbazi a mbanza.

I bosi, Paulu wele sila umbangi kuna Antiokia. Muna Antiokia alongoki a Yesu mu bateka yikilwa vo Akristu. Tuka kwakuna, o Paulu yo Banaba bafilwa benda samuna nsangu zambote muna nsi zakaka. Imosi muna mbanza bakingula i Luseta, mbanza kawutukila o Timoteo.

Owau, vioka mvu mosi, Paulu ovutukidi kuna Luseta, muna nkangalu andi wezole. O Timoteo vava kayenda yo Paulu ye Sila nga ozeye kuna bayenda? Tala muna mapa mu zaya eyaka fulu ina bayenda.

Entete bayenda kuna mbanza Ikonio, i bosi, kuna mbanza yakaka yayikilwanga vo Antiokia. I bosi bayenda kuna Troa, Filipi, Tesalonika ye kuna Beroya. Nga omwene Atenai muna mapa? Paulu wasamuna nsangu zambote muna mbanza yayi. I bosi, bayenda samuna nsangu zambote kuna Korinto, mvu mosi ye ndambu. Olandila bayenda kuna Efeso. I bosi, bavutuka kuna Kaisaria, yo kwenda kuna Antiokia, o Paulu osidi muna mbanza yayi.

Ozevo, o Timoteo wakangala mazunda ye mazunda ma kilometa mu sadisa Paulu muna salu kia samuna “nsangu zambote” yo ziula nkutakani zayingi za Akristu. Vava onungunuka e ntela nga okala selo kiakwikizi kia Nzambi nze Timoteo?

Mavangu 9:19-30; 11:19-26; kapu kia 13 yaku 17; 18:1-22.

Mapa (nenga)

1. Roma; 2. Melita; 3. Beroya; 4. Tesalonika; 5. Korinto; 6. Filipi; 7. Atenai; 8. Kerete; 9. Troa; 10. Efeso; 11. Miletu; 12. Kolosai; 13. Antiokia; 14. Ikonio; 15. Luseta; 16. Kupero; 17. Antiokia; 18. Kaisaria; 19. Yafo; 20. Damaseke; 21. Yerusaleme; 22. Mbu Anene (Mediterrâneo)



Yuvu

  • Nani i toko diodio muna fwaniswa, akweyi kazingilanga? O ngw’andi ye nkak’andi ankento nani?
  • O Timoteo adieyi kavova vava Paulu kanyuvula kana ozolele kubayikama yo Sila mu kwenda samuni e nsangu zambote mwakaka?
  • Alongoki a Yesu akweyi bayikilwa mu nkumbu antete vo Akristu?
  • Vava Paulu, Sila ye Banaba bakatuka muna Antiokia nkia mbanza zakaka bayenda?
  • O Timoteo nkia mpila kasadisila Paulu? O unu aleke nkia yuvu bafwete kiyuvula?

Yuvu yakaka

  • Tanga Mavangu 9:19-30.

    O Paulu aweyi kasongela lulungalalu vava kabangikwanga mu kuma kia nsangu zambote? (Mav. 9:22-25, 29, 30; Mat. 10:16)

  • Tanga Mavangu 11:19-26.

    E nsangu zina muna Mavangu 11:19-21, 26 aweyi zisongelanga vo mwand’a Yave ufilanga yo sikidisa e salu kia umbangi?

  • Tanga Mavangu 13:13-16, 42-52.

    E sono kina muna Mavangu 13:51, 52 aweyi kisongelanga vo alongoki ke bayambulanga ko vo kitantu kiabayoyesa? (Mat. 10:14; Mav. 18:6; 1 Pet. 4:14)

  • Tanga Mavangu 14:1-6, 19-28.

    E mvovo miami ‘babayekekele kwa Yave’ nkia mpila milenda kutusadisila twalembi telekanga moyo vava tusadisanga alongoki ampa? (Mav. 14:21-23; 20:32; Yoa. 6:44)

  • Tanga Mavangu 16:1-5.

    O lusakalalu lwa Timoteo muna yambula vo kazengwa nkia mpila lusongelanga o mfunu wa vangila ‘mawonso muna diambu dia nsangu zambote’? (Mav. 16:3; 1 Kor. 9:23; 1 Tes. 2:8)

  • Tanga Mavangu 18:1-11, 18-22.

    Edi diasonama muna Mavangu 18:9, 10, aweyi disongelanga vo Yesu yandi kibeni ofilanga e salu kia umbangi? Ediadi nkia vuvu dikutuvananga o unu? (Mat. 28:20)