LUMBU yole yavioka, owau se kia Nya, mu fuku. Yesu ye ntumwa zandi 12 bezidi mun’esuku diantandu mu dia e Nduta. Ndiona ovaikanga i Yuda mwisi Kereote. Wele samuna kwa anganga una balenda bakila Yesu.

Nlekelo a Mfumu

Yuda wakiyendela kala kwa anganga yo kubayuvula vo: ‘Nki nukumpana ovo inuyekolwele Yesu?’ Bamvutwidi vo, “palata makumatatu.” Ozevo, o Yuda wele wanana yau mu kubanata kuna kena o Yesu. Nkia mpil’evangu?

Bamene dia e Nduta. Kansi, o Yesu oyantikidi dia kwakaka kwamfunu. Ovene mbolo kw’alongoki andi, oku vo: ‘Nudia yo; ekiaki i to kiame kivaninwa muna kuma kieno.’ I bosi, ubavene mpe e mbungwa a vinyo oku vo: ‘Nunua yo, kadi i menga mame mama mana mebungukila muna kuma kieno.’ Nkand’a Nzambi uyikilanga wo vo ‘Nlekelo a Mfumu.’

Aneyisaele badianga e Nduta muna kubasungamesa vo o mbasi a Nzambi “walut’e” nzo zau muna Engipito kansi, wavonda mwan’antete muna nzo za Angipito. Kansi, o Yesu wazola vo alongoki andi basungamena evangu kevanga, dia vana moyo andi mu kuma kiau. Muna kuma kiaki, wabakanikina badianga elambu diadi diamfunu konso mvu.

Vava bamana dia Nlekelo a Mfumu Yesu wavovesa alongoki andi bakala yo unkabu ye lukwikilu lwasikila. Bayimbidi nkunga, bavaikidi. Se fuku kikilu, nanga tezo kia dingidingi. Yambula twatala kuna bayenda.

Matai 26:14-30; Luka 22:1-39; Yoane kapu kia 13 yaku 17; 1 Korinto 11:20.



Yuvu

  • Ekuma Yesu ye alongoki andi benena mun’esuku diantandu, nze una usongwanga muna fwaniswa?
  • Nani ndiona ovaikidi? Adieyi kele vanga?
  • Vava bamana dia Nduta o Yesu nki’elambu diamfunu kayantika?
  • Nkia diambu basungamenanga Aneyisaele vava badianga Nduta? O nlekelo a mfumu nkia diambu usungamesanga alongoki a Yesu?
  • Vava bamana dia Nlekelo a Mfumu, o Yesu adieyi kavovesa alongoki andi? Adieyi bavanga?

Yuvu yakaka

  • Matai 26:14-30.

    Dina tutanganga muna Matai 26:15 aweyi disongelanga vo Yuda mu lukanu kayekolwela Yesu?

    Nkia kuma yole yamfunu mabungukila menga ma Yesu? (Mat. 26:27, 28; Yer. 31:31-33; Ef. 1:7; Ayib. 9:19, 20)

  • Tanga Luka 22:1-39.

    O Satana aweyi kakotela muna Yuda? (Luka 22:3; Yoa. 13:2; Mav. 1:24, 25)

  • Tanga Yoane 13:1-20.

    Mun’owu tutanganga muna Yoane 13:2, nga Yuda wafwana tumbwa mu dina kavanga? Nki’elongi balenda longoka Selo ya Nzambi mu diambu diadi? (Etu. 4:7; 2 Kor. 2:11; Ngal. 6:1; Yak. 1:13, 14)

    Nki’elongi diamfunu kalonga Yesu? (Yoa. 13:15; Mat. 23:11; 1 Pet. 2:21)

  • Tanga Yoane 17:1-26.

    O Yesu nkia nsasa kalombela muna sambu vo alongoki andi “bakal’amosi”? (Yoa. 17:11, 21-23; Roma 13:8; 14:19; Kol. 3:14)