Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 93: Yesu Odikidi Ndong’ayingi

Lusansu lwa 93: Yesu Odikidi Ndong’ayingi

DIAMBU diankenda dibwidi ovava. O Yoane wa mvubi ovondelo. Erodia wa nkaz’a ntinu kanzolanga ko. Wafilakesa ntinu mu zenga ntu a Yoane.

Vava Yesu kawa e diambu diadi, okendalele kikilu. Wele va fulu kia yandi kaka. Kansi, nkangu unlende. Vava Yesu kamona o nkangu, ubafwidi e nkenda. Ubalongele oma ma kintinu kia Nzambi yo wuka mbevo zau.

Oku masika, alongoki bezidi kwa yandi, oku vo: “Ovava vekanga, e ntangwa isakidi; sindik’e ndonga benda muna mpata-vata benda sumba madia.”

Yesu una dikila nkangu wayingi

O Yesu ubavovese vo: “Ke ven’edi bendela ko; nubavana dia.” Oyuvwidi Filipo vo: “Akweyi tusumbila mbolo badi’awaya?”

O Filipo umvutwidi vo: ‘Nzimbu zayingi zivava muna sumba ulolo wa madia mefwana awonso. Andere ovovele vo: ‘Nleke ndioyo onatanga madia meto, una ye mbolo tanu, ye mbizi zole za maza: se nki kiokio vana vena ndonga yayi?’

O Yesu ovovele vo: ‘Nufongesa wantu vana titi.’ I bosi, otondele Nzambi mu madia. Obukunwini mbolo ye mbizi, ovene zo kw’alongoki. Alongoki bakayanese zo kwa wantu awonso. Awana badidi, tezo kia mazunda matanu m’akala ye ulolo w’akento yo wana. Awonso badidi, bayukwiti. Bakutikidi e nsadisw’a nkesona, mbangu kumi ye zole zazala.

O Yesu ovovese alongoki andi babonga nzaza benda kun’esimu dia mbu a Ngalili. Muna fuku wauna tembwa kiangolo kibalwakidi, o mavuku manengomwene nzaza yakuku yakuna. Alongoki bamwene kikilu o wonga. Muna ngingil’a fuku bamwene muntu odiatilanga vana ntandu a maza. Bakazìdi kuna wonga kadi ke bazaya ko nani ndioyo.

Yesu ubavovese vo: ‘Ke numoni wonga ko, i mono yuyu.’ Ke bankwikidi ko. O Petelo ovovele vo: “E Mfumu, ovo i ngeye yoyo, ungika ngiza kwa ngeye vana maza.” O Yesu vo: “Wiza.” O Petelo ovaikidi muna nzaza, odiete vana maza, kenda kwa Yesu. I bosi wonga umbakidi; oyantikidi odimuka, kansi o Yesu umvulwizi.

Oku kwalanda o Yesu wadikila mpe mazunda ma wantu. E nkumbu wau mu mbolo nsambwadi ye finzonzi kabadikila. Awonso mpe badia yo yukuta. Nga kediasivi ko e mpila in’o Yesu kalunga-lunganga o wantu? Vava keyala nze ntinu a Nzambi ke tutokanena nkutu ma ko.

Matai 14:1-32; 15:29-38; Yoane 6:1-21.



Yuvu

  • Nkia diambu diabwila Yoane wa Mvubi? O Yesu aweyi kamona?
  • O Yesu aweyi kadikila ndonga ina yanlandanga? Mbangu kwa za madia za sala?
  • Ekuma alongoki bamwena wonga muna fuku? Adieyi diabwila Petelo?
  • Aweyi Yesu kadikila mazunda ma wantu mu nkumbu ezole?
  • Ekuma dikadila diambote vava Yesu keyala ova ntoto nze Ntinu a Nzambi?

Yuvu yakaka

  • Tanga Matai 14:1-32.

    E nsangu zina muna Matai 14:23-32 aweyi zikieseselanga kiwuntu kia Petelo?

    O Nkand’a Nzambi aweyi usongelanga lunungunuku lwa Petelo? Nkia mpila kasundila e fu kia vova lembi yindula? (Mat. 14:27-30; Yoa. 18:10; 21:7; Mav. 2:14, 37-40; 1 Pet. 5:6, 10)

  • Tanga Matai 15:29-38.

    O Yesu aweyi kazitisila e nkubik’a madia kavanga o S’andi? (Mat. 15:37; Yoa. 6:12; Kol. 3:15)

  • Tanga Yoane 6:1-21.

    Akristu aweyi balenda tanginina mbandu a Yesu ya zitisa ayadi? (Yoa. 6:15; Mat. 22:21; Roma 12:2; 13:1-4)