Afimpi a ntetembwa

NGA omwene ntetembwa yayi ikezimanga kesongang’o nlembo o muntu ndioyo? E ntetembwa yasoloka vava bavaika muna Yerusaleme. Wantu awaya kuna Este batuka, alongoki a ntetembwa. Bakwikila vo e ntetembwa yayi yampa ikubafila kwa muntu amfunu.

Vava baluaka kuna Yerusaleme bayuvwidi vo: ‘Akweyi kena o mwana on’okala se ntinu Ayuda?’ E “Yuda” i nkumbu yakaka ya Aneyisaele. ‘Tumwene ntetembwa a mwana kuna Este, twizidi kunkunda.’

O Erodi wa ntinu a Yerusaleme, ova kawa wo, o ntima untelamene. Kazolele ntinu akaka ko vana fulu kiandi. Ozevo, o Erodi obokele mbuta za nganga ubayuvwidi vo: ‘Akweyi kewutukila o ntinu ona wasilw’o nsilu?’ Bamvutwidi vo: ‘Nkand’a Nzambi uvovanga vo muna Beteleme.’

O Erodi obokele wantu batuka kuna Este ubavovese vo: ‘Nwenda, nwatoma fimp’owu wa kingyanangyana; ovo nunsolwele, nwiza kunsamunwina, omono mpe ngyenda kunkunda.’ Kansi, o Erodi wazola solola mwana mu kumvonda.

E ntetembwa ibavitidi o ntu yakuna Beteleme, itelamene vana vakedi o nsedia. Bakotele muna nzo, bamwene o nsedia yo Maria wa ngw’andi. Babongele tukau batambikidi to kwa Yesu. Kansi, Yave okanikini kwa wantu kuna ndozi vo ke bavutuki kwa Erodi ko. Ikuma, bavutukìdi nzil’akaka kuna nsi au.

O Erodi, vava kamwene vo wantu batuka kuna Este bavutuka kuna nsi au, ofungidi kikilu makasi. Osidi nkanikinu vo wana amakala awonso bena muna Beteleme, tuka mvu miole y’ana ke balueke mo ko, bavondwa. Kansi, o Yave wakilukisila Yosefe kuna ndozi, o Yosefe watina ye nzo andi kuna Engipito. Vava Yosefe kazaya vo o Erodi wafwa obongele Maria yo Yesu ovutukidi kuna Nazarete. I kuna kasansukila o Yesu.

Nga nani obenze watemesa e ntetembwa yayina yampa? Sungamena dio vo wantu awaya, muna mona e ntetembwa yayina i bayendela kuna Yerusaleme. O Nkadi Ampemba wa Satana wazola vonda Mwan’a Nzambi, ye wazaya wo vo o Erodi wa ntinu a Yerusaleme ovava kumvonda. Ozevo, Satana yandi watemesa e ntetembwa yayina.

Matai 2:1-23; Mika 5:2.



Yuvu

  • O wantu bena muna fwaniswa aki nani? Ekuma mosi mu yau kesongelanga ntetembwa o nlembo?
  • O Erodi wa Ntinu nkia kuma kafungila makasi? Adieyi kavanga?
  • E ntetembwa akweyi yafila o wantu? Ekuma bavutukila nzil’akaka kuna nsi au?
  • O Erodi nkia nkanikinu kasia, ekuma?
  • O Yave adieyi kavovesa Yosefe kavanga?
  • Nani watemesa e ntetembwa yayina yampa, ekuma?

Kiuvu kiakaka

  • Tanga Matai 2:1-23.

    Mvu kwa kakala o Yesu? Akweyi kazingilanga vava kakingulwa kw’afimpi a ntetembwa? (Mat. 2:1, 11, 16)