Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 85: Yesu Owutukidi Muna Mpak’a Twelezi

Lusansu lwa 85: Yesu Owutukidi Muna Mpak’a Twelezi

NGA ozeye nani i nsedia ndioyo? I Yesu. Owutukidi muna mpak’a twelezi. O Maria unlekese muna dikilwa kia twelezi. Ekuma Maria yo Yosefe benena vamosi ye bulu? Nga kiaki i fulu kia wutila?

Ve. Ke fulu kia wutila ko. Bayiza okwaku mu kum’eki: O Kaisa Auguseto wa nyadi a Roma wavaikisa nsiku vo konso muntu kavutuka kuna diandi’vata mu sonama mu nkanda luyalu. O Yosefe mwisi Beteleme. Kansi, vava balwaka ko, ke mwasala diaka fulu kia leka ko kadi nzo zawonso zazala yo wantu. I dianu bayendela muna mpak’a twelezi. Muna lumbu kiaki mpe o Maria i kawuta Yesu. Nze una omwene o nsedia otomene wutuka kwandi.

Yosefe, Maria, yo nsedia Yesu

Nga omwene avungudi bezedi kingula Yesu? Mameme mau bayingilanga muna nzanza mu fuku. O mbasi otelamene vana bakala, o ntemo ubatemene. Avungudi bamwene wonga wayingi. Kansi, o mbasi ubavovese vo: ‘Ke numoni wonga ko; tala, nsangu zambote inutwasidi, kadi o unu kun’evata dia Beteleme nuwutukìlu Kristu wa Mfumu. Ovuluza nkangu. Numona kimwana-mwana kizingilu nlele, kilekeso muna dikilwa kia twelezi.’ Vana vau vezidi mbasi zayingi zisanisini Nzambi. Avungudi bele avavi Yesu, bansolwele.

Nga ozeye ekuma o Yesu kenena muntu ampwena kikilu? Nga ozeye kieleka nani i Yesu? Sungamena dio vo muna lusansu lwantete lwa nkanda wau twalongoka mu kuma kia Mwan’antete a Nzambi. Mwana ndioyo wasala ntwadi yo Yave mu vanga ezulu ye ntoto ye lekwa yakaka. Ondioyo i Yesu.

Elo, o Yave obongele moyo a Mwan’andi kun’ezulu yo sia wo muna vumu kia Maria. Vana vau, o nsedia oyantikidi o nungunuka muna vumu kia Maria nze una benungunukinanga e nsedia miakaka muna vumu ya ngudi zau. Kansi, o nsedia ndioyo,  Mwan’a Nzambi. Ozevo, o Yesu wawutuka muna Beteleme muna mpak’a twelezi. Nga obakwidi ekuma ambasi bayangalela mu zayisa kwa wantu vo o Yesu owutukidi?

Luka 2:1-20.



Yuvu

  • Nani i nsedia muna fwaniswa? O Maria aveyi kanlekesa?
  • O Yesu nkia kuma kawutukila mu mpak’a twelezi?
  • Muna fwaniswa, aki nani bekotanga muna mpak’a twelezi? O mbasi adieyi kabavovesa?
  • Ekuma o Yesu kenena muntu ampwena?
  • Ekuma o Yesu keyikilwanga vo Mwan’a Nzambi?

Yuvu yakaka

  • Tanga Luka 2:1-20.

    O Kaisa Auguseto aweyi kasadisila muna ndungana ya ungunza wa ngutuk’a Yesu? (Luka 2:1-4; Mika 5:2)

    O muntu aweyi kalenda kitukila mosi muna awana beyikilwanga vo “wantu akw’edienga”? (Luka 2:14; Mat. 16:24; Yoa. 17:3; Mav. 3:19; Ayib. 11:6)

    Avo avungudi a mameme esi Yuda bayangalela e ngutuk’a Mvuluzi, nkia kuma kiampwena bavwidi selo ya Yave mu yangalalanga o unu? (Luka 2:10, 11; Ef. 3:8, 9; Lus. 11:15; 14:6)