Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 100: Yesu Muna Mpatu

Lusansu lwa 100: Yesu Muna Mpatu

VAVA bavaika mun’esuku diantandu, Yesu ye alongoki andi bele kuna mpatu ya Ngetesemane. Owau ke nkumbu antete ko bezidi mu mpatu yayi. Yesu ovovese alongoki andi vo bayingila yo samba. Ovaukidi fiakete mu samba.

I bosi, Yesu ovutukidi kuna kwakala alongoki. Adieyi bevanganga? Balele kwau. Yesu ubasusumwini nkumbu ntatu vo bafwete yingila, kansi konso ntangwa kavutukanga wabawananga kunsi a tulu. Muna nkumbu ansuka o Yesu wabayuvula: ‘Nga yayi i ntangw’a leka? E ntangwa nyekolwa kw’atantu ame ifwene.’

Wau kevovanga kaka, bawidi mazu ma ndong’ayingi. Bezidi ye nsosolo, bota ye mini. Vava balwaka vana bakala mosi ofinamene wele kuna kakala Yesu. Umfibidi nze una omwene muna fwaniswa kiaki. Yandi i Yuda mwisi Kereote. Ekuma kafibila Yesu?

Yuda oyekwele Yesu

Yesu umvovese vo: ‘E Yuda nga muna mfibu okungyekwela?’ Elo, o fiba kwakala se sinsu. O Yuda i wau kasongela Yesu kwa wantu bayiza kunkanga. Atantu a Yesu bambakidi. Kansi, o Petelo kayambula ko vo banata Yesu lembi nwana. Olambwidi o koko, ovolele nsosolo andi, osakidi kutu kwa muntu vana ndambu andi. Kansi, Yesu oviakene kutu kwandi, unsaswidi.

Ovovese Petelo vo: ‘Vutula nsosolo vana fulu kiandi, nga obenze vo kilendi dodokel’o S’ame ko kampaikisila mazunda ma mbasi muna kumpuluza?’ Elo, olenda wo vanga. Kansi, Yesu kalomba lusadisu lwa mbasi ko kwa Nzambi kadi wazaya wo vo e ntangwa ya bakwa kw’atantu andi yafwana. Ikuma, wayambula vo bambaka. Owau tutala dina dibwila Yesu.

Matai 26:36-56; Luka 22:39-53; Yoane 18:1-12.



Yuvu

  • Akweyi bayenda o Yesu ye alongoki andi vava bavaika mun’esuku diantandu? Adieyi kabavovesa?
  • O Yesu vava kavutuka vana vasala alongoki andi aweyi kabawana? Ediadi nkumbu kwa diabwa?
  • Aki nani bakota muna mpatu? Nze una usongwanga muna fwaniswa o Yuda mwisi Kereote adieyi kavanga?
  • Ekuma o Yuda kafibila Yesu? O Petelo adieyi kavanga?
  • O Yesu aweyi kavovesa Petelo? Kansi ekuma Yesu kalembi lombela Nzambi katuma mbasi muna kunwanina?

Yuvu yakaka

  • Tanga Matai 26:36-56.

    E mpila Yesu kalongelanga alongoki andi aweyi yinina se mbandu ambote kw’akuluntu a Akristu o unu? (Mat. 20:25-28; 26:40, 41; Ngal. 5:17; Ef. 4:29, 31, 32)

    O Yesu aweyi kabadikilanga osadila nsosolo ye nkele mu nwana ye akaka wantu? (Mat. 26:52; Luka 6:27, 28; Yoa. 18:36)

  • Tanga Luka 22:39-53.

    Vava mbasi kamoneka kwa Yesu muna kunkumika muna mpatu a Ngetesemane, nga disonganga vo lukwikilu lwa Yesu lwayoya? Sasila dio. (Luka 22:41-43; Yes. 49:8; Mat. 4:10, 11; Ayib. 5:7)

  • Tanga Yoane 18:1-12.

    O Yesu aweyi katanina alongoki andi kuna kw’atantu andi? Adieyi tulenda longoka muna nona kiaki? (Yoa. 10:11, 12; 18:1, 6-9; Ayib. 13:6; Yak. 2:25)