Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 82: Modekai yo Esete

Lusansu lwa 82: Modekai yo Esete

YAMBULA twateka zaya mana mabwa una Ezera kayele ko kuna Yerusaleme. Modekai yo Esete Aneyisaele bakala yetunda muna kintinu kia Parasa. O Esete okedi se ntinu ankento, Modekai wa mpangi andi, i muntu wezole walandilanga ntinu. Yambula twazaya una diavangamena ediadi.

O se yo ngudi a Esete bafwa una kakala mwan’akete, ozevo Modekai yandi wasansa Esete. O Akasurose wa ntinu a Parasa wakala yo lumbu muna mbanz’a Susani, o Modekai i mosi muna asadi andi. Lumbu kimosi o Vasiti wa nkaz’a ntinu wankolamena. Ozevo, o ntinu osolele nkento akaka mu kala se ntinu ankento. Nga ozeye o nkento kasola? Esete wa mote a ndumba.

Namani ofungidi Modekai makasi

Nga omwene nkwa lulendo ndioyo ofukamenwanga kw’akaka? I Amani. Muntu anene kikilu muna Parasa. O Amani ozolele vo o Modekai ndiona omwene wafonga ovava kamfukamena mpe. Kansi, Modekai kavanga dio ko. Wazaya wo vo ke diansongi ko diafukamena muntu ndioyo ambi. Ediadi diafungisa Amani makasi. Edi kavanga:

Ovovese Akasurose wa ntinu o luvunu mu kuma kia Aneyisaele vo: ‘Nkangu ambi, ke belundanga nsiku miaku ko, yambula bafwaswa.’ O Akasurose kazaya wo ko vo o Esete wa nkaz’andi mpe mwisi Isaele. Ozevo, owididi Amani, osidi nkanikinu vo Aneyisaele awonso bavondwa.

Modekai vava kawa nsiku wau, otokanene kikilu. Ovovese Esete vo: ‘Vova kwa ntinu katuvuluza.’ Muna nsiku wa Aparasa ke vena muntu ko ofwete kota muna nzo a ntinu lembi bokelwa. Kansi, Esete wayenda mo kota lembi bokelwa. O ntinu otambidi Esete e mvwal’awolo ina vana koko, mu songa vo kevondwa ko. O Esete obokelese ntinu yo Amani beza dia madia kakubika. Ekolo badianga o ntinu oyuvwidi Esete vo, adieyi ozolele? O Esete ovutwidi ntinu vo okunzayisa wo vava bekwiza dia madia kelamba muna lumbu kilanda.

Muna lumbu kialanda, wau badianga, o Esete ovovese ntinu vo: ‘Mono yo nkangu ame vondwa tuvondwa.’ O ntinu ofungidi makasi. Oyuvwidi vo: ‘Nani ndioyo wakabuk’o vanga e diambu diadi?’

‘O Esete vo, o Amani ndioyo i ntantu ye mbeni.’

Esete wa Ntinu Ankento ofundidi Namani

O ntinu ofungidi kikilu makasi. Ovondese Amani. I bosi, otumbidi Modekai se muntu wezole muna kintinu kiandi. O Modekai osonekese nsiku ampa muna nkumbu a ntinu wavovanga vo Aneyisaele banwanina mioyo miau muna lumbu kina badi vondwa. Wau vo Modekai se muntu atunda, ndonga yasadisa Aneyisaele, mu vuluzwa vana moko m’atantu au.

Nkand’a Esete.



Yuvu

  • Nani i Modekai yo Esete?
  • Ekuma Akasurose wa Ntinu kavavila sompa nkento akaka? Nkia nkento kasola?
  • Nani i Amani? Ekuma kafungila makasi?
  • Nkia nkanikinu kasia? O Esete adieyi kavanga vava kawa e nsangu zatuka kwa Modekai?
  • Adieyi diabwila Amani yo Modekai?
  • O Aneyisaele aweyi bavuluzilwa vana moko m’atantu au?

Yuvu yakaka

  • Tanga Esete 2:12-18.

    O Esete aweyi kasongela o mfunu wa “ntim’anleka, yo lembama”? (Ese. 2:15; 1 Pet. 3:1-5)

  • Tanga Esete 4:1-17.

    Nze Esete nki’elau tuvewanga o unu mu songa vumi ye kwikizi kieto kwa Yave? (Ese. 4:13, 14; Mat. 5:14-16; 24:14)

  • Tanga Esete 7:1-6.

    Aweyi e selo ya Nzambi o unu besilanga mioyo miau vana moko nze una wavanga Esete? (Ese. 7:4; Mat. 10:16-22; 1 Pet. 2:12)