Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 79: Daniele Mun’ewulu dia Nkosi

Lusansu lwa 79: Daniele Mun’ewulu dia Nkosi

EKWE Daniele! Mu mpasi kena. Kansi, e nkosi ke zindidi ko. Nga ozeye ekuma? Nani otubidi Daniele mun’ewulu dia nkosi? Yambula twa wa.

Dareyuse yandi oyalanga Babele owau. Wazolanga kikilu Daniele, kadi muntu ambote ye nkwa ngangu kakala. Untumbidi kimfumu muna kintinu kiandi. Ediadi diafila wantu akaka mu mwena Daniele e kimpala.

Dareyuse

Bele kwa Dareyuse wa ntinu bamvovese vo: ‘Sikidisa nkanikinu vo konso ona olomba ndomba kwa konso nzambi yovo muntu muna lumbu 30, vo ke kwa ngeye ntinu ko, katubwa mun’ewulu dia nkosi.’ Dareyuse kazaya ko ekuma wantu awaya bazolele nsiku wau. Kansi, omwene vo e ngindu zambote, osonekene nsiku wau. O nsiku wau ke ulendi sobwa ko.

O Daniele vava kazeye o nsiku wau wele kota muna nzo andi yo samba nze una kavanganga. Wantu awaya bazeye wo vo o Daniele keyambula sambila Yave ko. Bayangalala kikilu kadi diamoneka vo ekani diau dia bwisa Daniele diasikila.

O ntinu vava kazaya mambu mama, omwene kikilu e ntantu. Kansi kalendi soba diaka nsiku ko. Oyikidi vo batuba Daniele mun’ewulu dia nkosi. O ntinu ovovese Daniele vo: ‘O Nzambi aku ona osadilanga, yandi okutanina.’

Dareyuse watokana kikilu, o tulu tunkatukidi muna fuku wauna. Muna menemene wele-wele kun’ewulu dia nkosi. Nga umwene muna fwaniswa kiaki? Okazidi muna nding’a dilu vo: ‘E Daniele, wa ntaudi a Nzambi amoyo, o Nzambi aku ona osadilanga, nga olendele kutanina muna nkosi e?’

Daniele mun’ewulu dia nkosi

O Daniele ovovese ntinu vo: ‘O Nzambi otumini mbasi andi, ozikidi nua mia nkosi, ke zimpangidi mpasi ko.’

O ntinu oyangalele kikilu. Oyikidi vo batombola Daniele mun’ewulu. I bosi, oyikidi vo batwasa wantu ana bafundidi Daniele, babatubidi mun’ewulu dia nkosi. E nkosi bavwa kosomona visi yau yawonso, una ke balueke muna nsi ewulu ko.

O ntinu osonekene kuna kwa nkangu wawonso wa kintinu kiandi vo: ‘Nsidi nkanikinu vo wantu awonso bazitisa Nzambi a Daniele. Ovangidi masivi mampwena. Ovulwizi Daniele mun’ewulu dia nkosi.’

Daniele 6:1-28.



Yuvu

  • Nani i Dareyuse? Aweyi kabadikilanga Daniele?
  • Akwa kimpala adieyi bafila Dareyuse mu vanga?
  • O Daniele adieyi kavanga vava kazaya o nsiku wau wampa?
  • Ekuma Dareyuse katokanena kikilu yo lembi mona tulu? Adieyi kavanga muna mene-mene?
  • O Daniele aweyi kavutula kwa Dareyuse?
  • Adieyi diabwila wantu ambi ana bavava vonda Daniele? O Dareyuse adieyi kasoneka kuna kwa nkangu wawonso wa kintinu kiandi?

Yuvu yakaka

  • Tanga Daniele 6:1-28.

    Mana mabwila Daniele adieyi mekutusungamesanga mana bevanganga atantu mu ningamesa e salu kia Yave mu tandu kieto? (Dan. 6:7; Nku. 94:20; Yes. 10:1; Roma 8:31)

    E selo ya Nzambi o unu aweyi balenda tanginina Daniele muna sakalelanga ‘ayadi’? (Dan. 6:5, 10; Roma 13:1; Mav. 5:29)

    Aweyi tulenda tanginina mbandu a Daniele muna ‘kwamanana sadila’ Yave? (Dan. 6:16, 20; Fili. 3:16; Lus. 7:15)