Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 74: Muntu Wakondwa Wonga

Lusansu lwa 74: Muntu Wakondwa Wonga

TALA nleke ndioyo osevwanga. Nga unzeye? I Yeremiya wa ngunz’a Yave.

Wantu bena seva Yeremiya

Yave wavovesa Yeremiya kakala se ngunz’andi vava Yosiya wa ntinu kayantika fwasa e teke muna nsi. O Yeremiya uyimwene vo nleke kwandi muna kala se ngunza. Kansi, Yave umvovese vo okunsadisa.

O Yeremiya ovovese Aneyisaele bayambula vanga e mbi. ‘E nzambi besambilanga azula za luvunu,’ u kabavovesa. Kansi, ndonga muna Aneyisaele basolele sambila teke ke mu Yave wa Nzambi ko. Vava Yeremiya kavovesa nkangu vo o Nzambi okubatumba mu kuma kia bi wau, seva kwandi bansevanga.

Oku kwalanda o Yosiya ofwidi. Vioka ngonde tatu, Yoyakime wa mwan’andi umvingidi e kintinu. Yeremiya wakwamanana zayisa kwa nkangu vo: ‘E Yerusaleme ifwaswa avo ke nuvilukidi muna nzila zeno zambi ko.’ Anganga bakangidi Yeremiya yo vova vo: ‘Fwa kaka ofwa, kadi osakwidi mambu mama.’ I bosi, bavovese kwa akuluntu a Isaele vo: ‘O Yeremiya kafwete fwa kadi mbanz’eto kavovel’e mbi.’

Aweyi kavanga o Yeremiya? Kamona wonga ko. Ubavovese vo: ‘O Yave untumini kwa yeno yanuvovesa mambu mama mawonso. Avo ke nusoba mavangu meno mambi ko, o Yave ofwasa Yerusaleme. Kansi, nuzaya e ludi vo, ovo nukumponda, muntu wakondwa kuma nuvonda.’

Akuluntu banyambwidi, kansi Aneyisaele ke bayambula nzila zau zambi ko. I bosi, Nebukandesa wa ntinu a Babele wizidi nwanisa Yerusaleme. Okitwidi Aneyisaele se ntaudi zandi. Onete ulolo wa mazunda muna yau kuna Babele. Se badiki, aweyi olenda mona kele vo nzenza uyalwidi mu nsi aku yo kunata ku nsi ina olembele zaya?

Yeremiya 1:1-8; 10:1-5; 26:1-16; 2 Ntinu 24:1-17.



Yuvu

  • Nani i nleke una muna fwaniswa?
  • O Yeremiya aweyi kayimwena mu kuma kia salu kia kingunza? O Yave adieyi kamvovesa?
  • O Yeremiya nkia nsangu kasamunanga kwa nkangu?
  • Anganga aweyi bavavila ningamesa salu kia Yeremiya? Aweyi kasongela vo kakala ye wonga ko?
  • Adieyi diabwa vava Aneyisaele ke bayambula nzila zau zambi ko?

Yuvu yakaka

  • Tanga Yeremiya 1:1-8.

    Nze una usonganga nona kia Yeremiya, nki kifwanisanga o muntu muna salu kia Yave? (2 Kor. 3:5, 6)

    E mbandu a Yeremiya nkia lukasakeso ivananga kwa aleke Akristu o unu? (Kim. 12:1; 1 Tim. 4:12)

  • Tanga Yeremiya 10:1-5.

    Nkia nona kiamfunu kasadila o Yeremiya mu songa vo bunda e vuvu muna teke i mpavala kwandi? (Yer. 10:5; Yes. 46:7; Kab. 2:19)

  • Tanga Yeremiya 26:1-16.

    Akristu akuswa o unu aweyi belemvokelanga nkanikinu mia Yave kwa Yeremiya mia lembi ‘kondesa diambu’ muna lulukisu bevananga kwa wantu? (Yer. 26:2; Nsi. 4:2; Mav. 20:27)

    O Yeremiya nkia mbandu ambote kavana kwa Mbangi za Yave mu samuna lulukisu lwa Yave kw’esi zula? (Yer. 26:8, 12, 14, 15; 2 Tim. 4:1-5)

  • Tanga 2 Ntinu 24:1-17.

    O kondwa kwa kwikizi kwa Yuda muna Yave nkia mfwilu kwatwasa? (2 Nti. 24:2-4, 14)