Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 72: Nzambi Osadisi Kizekeya wa Ntinu

Lusansu lwa 72: Nzambi Osadisi Kizekeya wa Ntinu

NGA ozeye ekuma muntu ndioyo kesambilanga kwa Yave? Ekuma kayalumwini nkanda miami vana ndambu eziku dia Yave? Kizekeya wa ntinu a makanda mole ma sude, ma Isaele. Mu mpasi zayingi kena. Ekuma?

Ntinu Kizekeya una samba

Makesa m’Asuri bafwasidi makanda 10 ma node. Yave wayambula vo ediadi diababwila kadi nkangu mambi bavanganga. Owau, makesa ma Asuri mezidi nwanisa kintinu kia makanda mole.

O ntinu a Asuri osonekene Kizekeya wa ntinu e nkanda. I miau kayalumwini Kizekeya vana vena Nzambi. Batiangwini Yave yo vova kwa Kizekeya vo kayiyekola. Muna kuma kiaki o Kizekeya osambidi vo: ‘E Yave utuvuluza vana koko kwa ntinu a Asuri. E zula yawonso ya nza yazaya wo vo, ngeye kaka u Nzambi.’ O Yave nga wawila Kizekeya?

Kizekeya ntinu ambote kakala. Kakala nze ntinu miambi ko miayalanga makanda 10 ma Isaele, ngatu kala nze s’andi Akazi wa ntinu ambi. O Kizekeya walemvokelanga nsiku miawonso mia Yave. Ozevo, vava kamana samba, o Yesaya wa ngunza ozayisi diambu dia Yave kwa Kizekeya, oku vo: ‘Ntinu a Asuri, keluaka mu mbanza Yerusaleme ko. Ke vena kesa diandi ko ofinama yo, ngatu nonga e mbanza.’

Tala e fwaniswa kiaki. Nga ozeye makesa mama mawonso mafwa? Makesa ma Asuri. O Yave otwikidi mbasi andi, muna fuku wauna ovondele makesa 185.000 ma Asuri. O ntinu a Asuri ovutukidi kuna nzo andi.

Soladi dia mwisi Asuri ofwidi

Kintinu kia makanda mole kiavuluzwa. O nkangu ukedi ye luvuvamu mu fikolo. Kansi, vava Kizekeya kafwa, Manase wa mwan’andi umvingidi e kintinu. Manase ye Amone wa mwan’andi wamvingila e kintinu, ntinu miambi kikilu bakala. E nsi izele diaka yo nsoki ye umpumbulu. Amone wa ntinu wavondwa kwa ntaudi zandi. O Yosiya wa mwan’andi oyadidi se ntinu a kintinu kia makanda mole.

2 Ntinu 18:1-36; 19:1-37; 21:1-25.



Yuvu

  • Nani i muntu una muna fwaniswa? Ekuma kenena mu mpasi zayingi?
  • Nani wasoneka nkanda kayalumwini Kizekeya vana vena Nzambi? O Kizekeya aweyi kasamba?
  • Nkia mpila ntinu kakala o Kizekeya? O Yesaya wa ngunza nkia diambu dia Yave kazayisa kwa Kizekeya?
  • Nze una usongwanga muna fwaniswa, o mbasi a Yave adieyi kavanga kwa makesa ma Asuri?
  • Kana una vo kintinu kia makanda mole kiakala ye luvuvamu mu fikolo, adieyi diabwa vava Kizekeya kafwa?

Yuvu yakaka

  • Tanga 2 Ntinu 18:1-36.

    O Rabeseka wa nkunzi a Asuri aweyi kavavila yoyesa lukwikilu lwa Aneyisaele? (2 Nti. 18:19, 21; Luv. 5:2; Nku. 64:3)

    Aweyi Mbangi za Yave betangininanga mbandu a Kizekeya vava besiwanga e kitantu? (2 Nti. 18:36; Nku. 39:1; Nga. 26:4; 2 Tim. 2:24)

  • Tanga 2 Ntinu 19:1-37.

    O nkangu a Yave o unu aweyi betangininanga Kizekeya muna ntangw’a mpasi? (2 Nti. 19:1, 2; Nga. 3:5, 6; Ayib. 10:24, 25; Yak. 5:14, 15)

    Nkia mfwilu ntatu kabaka o Sankerebe wa Ntinu a Asuri? Nani kesunzulanga? (2 Nti. 19:32, 35, 37; Lus. 20:2, 3)

  • Tanga 2 Ntinu 21:1-6, 16.

    Ekuma difwene vovelwa vo o Manase wakala se mosi muna ntinu miambi miayala muna Yerusaleme? (2 Tus. 33:4-6, 9)