E FWANISWA kiaki paradiso kisonganga nze una Nzambi kasonga kwa Yesaya wa ngunz’andi. Yesaya wazinga kunima Yona.

Wantu muna Paradiso

Paradiso in’e nsasa vo “mpatu.” Nga ke dikusungamesanga fwaniswa twateka mona mu nkanda wau ko? Ina nze mpatu ambote yina Yave wa Nzambi kakunina Adami yo Eva, nga ke wau ko? E nza nga ikituka kieleka se paradiso?

O Yave wavovesa Yesaya wa ngunz’andi mu soneka oma ma paradiso ampa eyi ikwiza, ikalwa kwa nkangu a Nzambi. Wavova vo: ‘E dievwa dinangina yo mwan’ememe kuna luvuvamu. Mwan’a ngombe yo mwan’a nkosi bedila vamosi, e kingyanangyana kikubafila. O nsedia osakanina nioka lembi tatikwa.’

Akaka nanga bevova vo, ‘ediadi ke dilenda vangama ko. Mpasi kala kaka zikala ova nza.’ Kansi, yindula edi: Nkia mpila mpatu kavana Nzambi kwa Adami yo Eva?

Nzambi mu paradiso kabasia. Muna kolamena Nzambi i bavidisila mpatu au ambote, banuna yo fwa. Nzambi osidi nsilu a vana elekwa ina yavidisa Adami yo Eva kwa ana bekunzolanga.

Muna paradiso ikwiza ke mukala muntu ko omwesa akaka e mpasi ngatu fwasa e nza. Luvuvamu lwakieleka lukala mo. Wantu awonso bekala yo vimpi wambote yo zinga mu kiese. Ikala nze una kazola o Nzambi kuna lubantiku. Tusinga longoka una Nzambi ketwasila paradiso.

Yesaya 11:6-9; Lusengomono 21:3, 4.



Yuvu

  • O Yesaya nani kakala? Mu nkia ntangwa kazinganga ye nki kansonga o Yave?
  • Nki i nsasa “paradiso”? Adieyi dikusungamesanga ediadi?
  • O Yave nkia mambu kavovesa Yesaya mu soneka mu kuma kia Paradiso ampa eyi ikwiza?
  • Ekuma Adami yo Eva bavidisila mpatu au ambote?
  • O Yave nkia nsilu kevananga kw’awana bekunzolanga?

Yuvu yakaka

  • Tanga Yesaya 11:6-9.

    O Nkand’a Nzambi aweyi usongelanga luvuvamu lukala vana vena wantu ye bulu muna nz’ampa? (Nku. 148:10, 13; Yes. 65:25; Yez. 34:25)

    E mvovo mia Yesaya aweyi milunganenanga muna mwanda kwa nkangu a Yave o unu? (Roma 12:2; Ef. 4:23, 24)

    Nani ofwene tambula o zitu muna nsobani bevangang’o wantu o unu ye yina bevanga muna nz’ampa? (Yes. 48:17, 18; Ngal. 5:22, 23; Fili. 4:7)

  • Tanga Lusengomono 21:3, 4.

    O Nkand’a Nzambi aweyi usongelanga vo Nzambi okala yo wantu ova ntoto ke mu nitu ko, kansi mu mwanda? (Fuka 26:11, 12; 2 Tus. 6:18; Yes. 66:1; Lus. 21:2, 3, 22-24)

    Mansanga ye mpasi nkia mpila zisukila? (Luka 8:49-52; Roma 8:21, 22; Lus. 21:4)