NGA ozeye mana kevovanga dumbelele kiaki? Mu vova kena kwa nkento ndioyo o masivi kevanganga Elesa wa ngunz’a Yave muna lusadisu lwa Nzambi. O nkento kazeye Yave ko, kadi ke Nyisaele ko. Yambula twazaya ekuma kayiza zingila muna nzo a nkento ndioyo.

O nkento ndioyo Nsuria kwandi. O Namani wa nkaz’andi mfumu a makesa ma Suria. Asuria babaka dumbelele kiaki muna nsi a Isaele yo kuntwasa kwa nkaz’a Namani, kansadila.

Nkento a Namani ye ntaudi andi wankento

Namani kimbevo kia wazi kayelanga. E kimbevo kiaki kilenda sotola nkutu nsuni mia nitu a muntu. Muna kuma kiaki o dumbelele ovovese nkaz’a Namani vo: ‘O mfumu ame kele vo kenda kwa ngunz’a Yave kuna Isaele nga okunsasula muna wazi.’ I bosi, e diambu disamwinu kwa nkaz’andi.

O Namani wazola vo kawukwa muna kimbevo kiaki; ozevo, wele kuna Isaele. Vava kaluaka wele kuna nzo a Elesa. O Elesa otumini ntaudi andi kenda vova kwa Namani vo: Nda yowela muna Nkoko a Yodani ngyowela nsambwadi. O Namani ofungidi makasi yo vova vo: ‘Nkoko mia nsi ame misundidi nkoko miawonso mia Isaele.’ Okatukidi, kenda kwandi.

E ntaudi andi umfinamene, umvovese vo: ‘E tata, avo Elesa uvovese wavanga diambu diampasi, nga wavanga dio. Ekuma olembi yowela nze una kavovese?’ Namani owidi ndinga ntaudi andi, okulumukini, wiyivubidi muna Nkoko a Yodani mvuba nsambwadi. Vava kavangidi wo e nitu andi ivelele.

Namani oyangalele kikilu. Ovutukidi kwa Elesa ovovele vo: “Owaù tu nzeye kwame vo ova nza yawonso ke vena Nzambi ko, nangu mu Isaele kaka. Dianu vo tambula lukau lua ntaudi aku.” O Elesa vo: “Kitambula ma ko.” Elesa wazaya wo vo diambi dia tambula lukau lwandi, kadi ke yandi ko wanwuka, Yave kaka. Kansi, o Ngekazi wa ntaudi a Elesa wazola tambula lukau lolo.

I wau kavanga Ngekazi: Vava Namani kayenda mu vutuka kuna nsi andi, o Ngekazi unlende. Umvovese vo: ‘O Elesa untumini yavovesa vo olwakilu kwa nzenza, ozevo lukau kevava.’ Maluvunu kwandi. O Namani kazaya wo ko vo maluvunu. Umvene o lukau.

O Elesa wazaya mana kavanga Ngekazi kadi Yave unzayisi mo. Ozevo, vava Ngekazi kavutuka o Elesa wamvovesa vo: ‘Wau vo ovangidi e diambu diadi diambi, o wazi wa Namani ukulama.’ Vana vau obakamene wazi.

Adieyi tulongokele mu mama mawonso? Entete, tufwete kala nze dumbelele kiaki, mu vova oma ma Yave kw’akaka. Dilenda twasa ndandu zambote. Dianzole, ke tufwete kala akwa lulendo ko nze Namani. Tufwete lemvokelanga ntaudi za Nzambi. Diatatu, ka tufwete vuna ko nze Ngekazi. Tulenda longoka mayingi muna tanganga Nkand’a Nzambi.

2 Ntinu 5:1-27.



Yuvu

  • Nani i dumbelele ovovananga yo nkento muna fwaniswa?
  • Nani i nkento ndioyo? O dumbelele nki kevanganga muna nzo a nkento ndioyo?
  • O Elesa adieyi katuma kwa ntaudi andi kenda vova kwa Namani? Ekuma Namani kafungila makasi?
  • Adieyi diabwa vava Namani kawila ntaudi andi?
  • O Elesa nkia kuma kamengena lukau lwa Namani? O Ngekazi adieyi kavanga?
  • Adieyi diabwila Ngekazi? Adieyi tulongokele muna diadi?

Yuvu yakaka

  • Tanga 2 Ntinu 5:1-27.

    E dumbelele kia Isaele nkia mbandu kasonga kwa aleke a unu? (2 Nti. 5:3; Nku. 8:2; 148:12, 13)

    Ekuma dinina diamfunu dia sungamenanga e nona kia Namani vava tuvewanga malongi metukanga muna Nkand’a Nzambi? (2 Nti. 5:15; Ayib. 12:5, 6; Yak. 4:6)

    Nki’elongi tulongokele muna mbandu a Elesa ye Ngekazi? (2 Nti. 5:9, 10, 14-16, 20; Mat. 10:8; Mav. 5:1-5; 2 Kor. 2:17)