UNA Davidi kafwidi ko ovene Solomo mbandu ya tempelo a Yave ina kamvana o Nzambi. Muna mvu weya wa luyalu lwandi, Solomo oyantikidi tunga e tempelo. Mvu nsambwadi ye ndambu yatungwa. Yazi kumi ya mazunda ma wantu basadilanga muna tempelo. Nzimbu zayingi yadia, kadi ulolo wa wolo ye palata yakota mo.

E tempelo yakala ye masuku mole manene, nze una wakala saba. Kansi, omama masundidi mana ma saba o vonga. Solomo otumini basia nkele ekangu muna suku diakati ye lekwa yakaka muna masuku makaka.

Vava yamana tungwa, basambwidi e tempelo. O Solomo ofukamene osambidi nze una omwene muna fwaniswa kiaki. Ovovele kwa Yave vo, ‘ezulu di’ezulu ke dikufwana ko; e nzo yayi ntungidi ozevo aweyi! E Nzambi ame do wila nkangu aku vava besambil’oku fulu kiaki.’

Ntinu Solomo una samba

O Solomo vava kamana samba, o tiya tukulumukini kun’ezulu. Tuyokele bulu yawonso yakelwa yimenga. E tempelo izele yo nkembo a Yave. Ediadi diasonga vo o Yave wawa e sambu kia Solomo yo yangalela e tempelo katunga. Owau, e tempelo ikitukidi se fulu kia nsambila ke mu saba diaka ko.

O Solomo oyadidi ye ngangu mvu miayingi, o nkangu wazinganga ye kiese. Kansi, o Solomo osompele akento ayingi a nsi za kinzenza ana ke basambilanga Yave ko. Nga omwene mosi muna yau osambilanga e teke? Oku kwakwiziwa, bamvukumuna mu sambila nzambi zakaka. Nga ozeye dina diabwa wau Solomo kavanga wo? Kayala diaka nkangu kuna ngemba ko. Okitukidi se muntu ambi, o nkangu ke wazinganga diaka ye kiese ko.

Ntinu Solomo una sambila teke

O Yave ofungidi Solomo o makasi umvovese vo: ‘Nkatula e kintinu kiaku, yavana kio kwa muntu akaka. Kivangila wo muna zingu kiaku ko, kansi nkatula kio vana koko kwa mwan’aku. Kikatula kintinu kiawonso ko kwa mwan’aku.’ Tutala una diavangamena ediadi.

1 Tusansu 28:9-21; 29:1-9; 1 Ntinu 5:1-18; 2 Tusansu 6:12-42; 7:1-5; 1 Ntinu 11:9-13.



Yuvu

  • O Solomo mvu kwa katunga tempelo a Yave? Ekuma yadila nzimbu zayingi?
  • Masuku kwa makala muna tempelo? Nki kiasiwa muna suku diakati?
  • Nkia sambu kasamba o Solomo vava e tempelo yamanisa o tungwa?
  • O Yave aweyi kasongela vo wayangalela e sambu kia Solomo?
  • Akento a Solomo nkia diambu bamfila mu vanga? Adieyi diabwila Solomo?
  • Ekuma Yave kafungila Solomo makasi? Adieyi kamvovesa?

Yuvu yakaka

  • Tanga 1 Tusansu 28:9, 10.

    E mvovo mia Davidi muna 1 Tusansu 28:9, 10 nkia diambu mifwete kutufila mu vanga muna zingu kieto kia lumbu ke lumbu? (Nku. 19:14; Fili. 4:8, 9)

  • Tanga 2 Tusansu 6:12-21, 32-42.

    O Solomo aweyi kasongela vo o Nzambi wa Mpungu-ngolo kefwana mu nzo yatungwa kwa muntu ko? (2 Tus. 6:18; Mav. 17:24, 25)

    E mvovo mia Solomo muna 2 Tusansu 6:32, 33 adieyi misonganga mu kuma kia Yave? (Mav. 10:34, 35; Ngal. 2:6)

  • Tanga 2 Tusansu 7:1-5.

    Nze Aneyisaele, adieyi tufwete vanga vava tumonanga e nsambu za Yave kwa nkangu andi o unu? (2 Tus. 7:3; Nku. 22:22; 34:1; 96:2)

  • Tanga 1 Ntinu 11:9-13.

    Mana mabwa muna zingu kia Solomo aweyi mesongelanga o mfunu wa sikila ye kwikizi kwa Nzambi yakuna mbaninu? (1 Nti. 11:4, 9; Mat. 10:22; Lus. 2:10)