Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 50: Makesa Mole M’akento

Lusansu lwa 50: Makesa Mole M’akento

VAVA Aneyisaele bayisianga mu mpasi basambanga kwa Yave. O Yave wawanga sambu kiau yo kubavana afidi ambote mu kubasadisa. Muna Nkand’a Nzambi beyikilwanga vo afundisi. O Yosua i mfundisi antete. Aya banlandila Oteniele, Eude yo Sanga. Kansi, muna aya basadisa nkangu a Isaele o nwole akento, e nkumbu zau Debora yo Yaele.

Debora una vovesa Baraki

Debora ngunza ankento kakala. O Yave wanzayisanga mambu mevangama, oyandi wasamunanga mo kwa nkangu. Mfundisi mpe kakala. Debora kunansi eya kafonganga vana kundubulu. O nkangu wayizanga kwa yandi mu lomba lusadisu.

Muna kolo kiakina Yabini wakala ntinu a Kenani. Nkama vwa za makalu ma vita kakala mau. Makesa mandi mangolo makala, ikuma vo ndonga muna Aneyisaele bakitulwa se ntaudi za Yabini. O mfumu a makesa ma Yabini i Sisera.

Lumbu kimosi, o Debora wabokelesa Baraki wa mfundisi umvovese vo: ‘O Yave ovovele vo: Nata wantu 10.000 kuna Mongo a Tabo, i kuna ngyekolwela Sisera vana koko kwaku. Okunsunda yo makesa mandi.’

Baraki ovovese Debora vo: “Ovo okwenda yame, nkwenda.” O Debora wele yo Baraki, kansi umvovese vo: ‘Ke ngeye ko otambula o zitu wa nsundidi, kadi o Yave oteka Sisera vana koko kwa nkento.’ I diau mpe diavangama.

O Baraki okulumukini kuna Mongo a Tabo mu wanana yo makesa ma Sisera. Vana vau o Yave otwese kizalu, ndonga muna makesa m’atantu banwini nkaki. Kansi, o Sisera okulumukini mun’ekalu diandi dia vita, otinini.

Baraki, Yaele yo Sisera

I bosi, o Sisera watinina kuna saba kia Yaele. Unkotese muna saba kiandi, umvene kimvumina kanua. Kimvene o tulu, olele. O Yaele obongele elunzi dia saba owende dio muna ntu a Sisera, ofwidi. Vava Baraki kalwaka unsongele e vimbu dia Sisera. Ng’omwene una mvovo mia Debora mialunganena?

Oku kwalanda, o Yabini wa ntinu mpe wavondwa. Aneyisaele bavuvamene mu fikolo.

Afundisi 2:14-22; 4:1-24; 5:1-31.



Yuvu

  • Aki nani bakala se afundisi muna Isaele? Nani i mfundisi antete?
  • O Debora nki’elau diampwena kakala diau? Nkia salu kasalanga?
  • Nkia diambu dia Yave kazayisa o Debora kwa Baraki vava Isaele kavumiswa kwa Ntinu Yabini yo Sisera wa mfumu a makesa mandi? Nani kayika otambula o zitu wa nsundidi?
  • O Yaele aweyi kasongela vo nkento a unkabu?
  • Adieyi diabwa vava Yabini wa ntinu kafwa?

Yuvu yakaka

  • Tanga Afundisi 2:14-22.

    Aneyisaele aweyi bafungisila Yave o makasi? Nki’elongi ditulongele ediadi? (Afu. 2:20; Nga. 3:1, 2; Yez. 18:21-23)

  • Tanga Afundisi 4:1-24.

    Nkia mpila lukwikilu ye unkabu balenda longoka akento a Akristu muna mbandu a Debora yo Yaele? (Afu. 4:4, 8, 9, 14, 21, 22; Nga. 31:30; 1 Kor. 16:13)

  • Tanga Afundisi 5:1-31.

    E nkung’a nsundidi ya Baraki ye Debora aweyi uyimbidilwa muna vita ya Armangedo? (Afu. 5:3, 31; 1 Tus. 16:8-10; Lus. 7:9, 10; 16:16; 19:19-21)