Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 49: E Ntangwa Iningamene

Lusansu lwa 49: E Ntangwa Iningamene

TALA Yosua. Ovovele vo: ‘E ntangwa, ningama.’ E ntangwa mpe iningamene. E ntangwa iningamene muna kati kw’ezulu, lumbu kiamvimba. Yave wavanga wo. Kansi, yambula twazaya ekuma o Yosua kazolela vo e ntangwa yaningama.

E ntangwa

Vava e ntinu ntanu miambi mia nsi a Kenani bayantika nwanisa esi Ngibone, Angibone batumini muntu kenda lomba lusadisu kwa Yosua. Ovovele vo: ‘Wiza nswalu, watuvuluza, kadi, e ntinu miawonso mia nsi mizidi nwanisa e ntaudi zaku.’

Vana vau o Yosua yo makesa mandi bele kubasadisa. Fuku wamvimba badiata. Vava baluaka kuna Ngibone makesa ma ntinu ntanu bamwene o wonga yo tina. I bosi, Yave ubasotolwele matadi mampwena matuka kun’ezulu. Makesa mafwila mu mvul’a matadi mengi ke mu awaya bavondwa kwa makesa ma Yosua ko.

Yosua

O Yosua omwene vo e ntangwa se idimuka. Okuma se kufwa, ozevo ulolo wa makesa ma ntinu ntanu balenda tina. Muna kuma kiaki o Yosua osambidi kwa Yave vo: ‘E ntangwa, ningama.’ O kuma ke kwafwa nzaki ko, Aneyisaele bakala ye ntangwa ya sunda e vita.

Vena mpe ye ntinu miayingi miambi muna Kenani miamenganga nkangu a Nzambi. O Yosua yo makesa mandi mvu sambanu banwana mu fwasa ntinu 31 miayalanga muna nsi a Kenani. I bosi, o Yosua wakayanesa e nsi a Kenani kwa makanda ma Isaele.

Mvu miayingi miavioka, i bosi o Yosua ofwidi ye kimbuta kia mvu 110. Ekolo kazinganga ye akw’andi o nkangu walemvokelanga Yave. Kansi, vava wantu awaya ambote bafwa, o nkangu bayantika vang’o bi yo kuyisia mu mpasi. Eyayi i ntangwa bavwanga lusadisu lwa Nzambi o mfunu.

Yosua 10:6-15; 12:7-24; 14:1-5; Afundisi 2:8-13.



Yuvu

  • Muna fwaniswa, adieyi kevovanga o Yosua, ekuma?
  • O Yave aweyi kasadisila Yosua yo makesa mandi?
  • O Yosua ntinu nkwa mi’atantu kavonda muna vita? Mvu nkwa kanwana?
  • Ekuma Yosua kekayilang’e nsi a Kenani?
  • O Yosua mvu nkwa kakala vava kafwa? Adieyi diabwila nkangu kuna nima mfw’andi?

Yuvu yakaka

  • Tanga Yosua 10:6-15.

    Ozaya vo o Yave waningamesa e ntangwa ye ngonde mu kuma kia Isaele, nkia vuvu dikutuvananga o unu? (Yos. 10:8, 10, 12, 13; Nku. 18:3; Nga. 18:10)

  • Tanga Yosua 12:7-24.

    Nani kieleka wafwasa atinu 31 mia nsi a Kenani? Ekuma dinina diamfunu kwa yeto o unu? (Yos. 12:7; 24:11-13; Nsi. 31:8; Luka 21:9, 25-28)

  • Tanga Yosua 14:1-5.

    E nsi aweyi yakayilwa kwa makanda ma Isaele? Aweyi disonganga ediadi mu kuma ki’efwa dia ntoto tuvwa muna Paradiso? (Yos. 14:2; Yes. 65:21; Yez. 47:21-23; 1 Kor. 14:33)

  • Tanga Afundisi 2:8-13.

    Nze Yosua muna Isaele, o unu nani okakidilanga evangu dia vengomoka? (Afu. 2:8, 10, 11; Mat. 24:45-47; 2 Tes. 2:3-6; Tito 1:7-9; Lus. 1:1; 2:1, 2)