Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 45: Nsauk’a Nkoko a Yodani

Lusansu lwa 45: Nsauk’a Nkoko a Yodani

TALA! Aneyisaele mu sauka bena o Nkoko a Yodani. O maza akweyi mele, wau vo nsungi a mvula yakala? Vava ke basaukidi ko o nkoko wazala wakala. Kansi owau o maza mayumini. Aneyisaele mu sauka bena vana ntoto ayuma nze una bavanga muna Mbu Ambwaki. Akweyi kwayenda maza mama mawonso? Yambula twatala.

Aneyisaele bena sauka Nkoko a Yodani

Vava yafwana e ntangwa kwa Aneyisaele mu sauka Nkoko a Yodani o Yave watuma Yosua kavovesa nkangu vo: ‘Anganga banata nkele ekangu, yo vit’o ntu. Vava anganga bekotesa tambi yau muna maza ma Yodani, o maza meningama.’

Ozevo, anganga bazangwidi nkele ekangu yo nata yo kuna ntwala a nkangu. Vava baluaka muna Yodani anganga bakotele muna maza. Maza mu ngolo makukwilanga ye mansini makala. Kansi, vava e tambi yau yakota muna maza, o maza mayambwidi o kukula. Diakala se diambu diasivi. O Yave wakanga e nto za maza. Vana vau maza mayumini muna nkoko.

Anganga, anati a nkele ekangu bakotele muna kati kwa nkoko ayuma. Nga ubamwene muna fwaniswa kiaki? Ekolo batelamene, Aneyisaele awonso basaukidi Nkoko a Yodani vana ntoto ayuma.

Vava bamana sauka o Yave ovovese Yosua kasola makesa 12 kabavovesa vo: ‘Nwenda muna nkoko vana fulu kianingamena anganga ye nkele ekangu, nubonga matadi 12 nukundika mo vana nuleka. Kuna sentu vava o wan’eno bekunuyuvula e nsas’a matadi mama nubavutula vo: O maza mayambula kukula vava nkele ekangu dia Yave yasauka Yodani. Matadi mama i luyindwilu lw’esivi diadi.’ O Yosua mpe okundikidi matadi 12 vana vatelama anganga muna nkoko.

Yosua

I bosi, o Yosua wavova kwa anganga anati a nkele ekangu vo: ‘Nutomboka muna Yodani.’ Una batomboka vana vau o maza mavutukidi o kukula.

Yosua 3:1-17; 4:1-18.



Yuvu

  • Nki’esivi kavanga o Yave kimana Aneyisaele basauka Nkoko a Yodani?
  • Nki’evangu dia lukwikilu bafwana vanga Aneyisaele muna sauka Nkoko a Yodani?
  • Ekuma o Yave kavovesela Yosua kakundika matadi 12 muna nkoko?
  • Adieyi diabwa vava anganga batomboka muna Yodani?

Yuvu yakaka

  • Tanga Yosua 3:1-17.

    Nze una usongwanga muna lusansu lwalu, adieyi tufwete vanga muna tambula nsambu ye lusadisu lwa Yave? (Yos. 3:13, 15; Nga. 3:5; Yak. 2:22, 26)

    Aweyi wakala Nkoko a Yodani vava Aneyisaele basauka wo mu kwenda kuna Nsi a Nsilu? Ediadi aweyi diatundidikila nkumbu a Yave? (Yos. 3:15; 4:18; Nku. 66:5-7)

  • Tanga Yosua 4:1-18.

    O matadi 12 mabongwa muna Yodani yo kundikwa kuna Ngilengale nki mayindulwisanga? (Yos. 4:4-7)