Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 43: Yosua Okitukidi se Mfidi

Lusansu lwa 43: Yosua Okitukidi se Mfidi

MOSE ozolele kota muna nsi a Kenani yo Aneyisaele. Olombele kwa Nzambi vo: ‘E Yave yambula yasauka Nkoko a Yodani yamona nsi ambote.’ O Yave umvovese vo: “Sia wowo; kungikila diaka diambu diodio ko.” Ng’ozeye ekuma Yave kavovela e mpila yayi?

Mu kuma kia dina diavangama vava Mose kawanda etadi. Sungamena vo yandi yo Arone ke bakembesa Yave ko. Ke bavova kwa nkangu ko vo Yave ovaikisa maza mun’etadi. Muna kuma kiaki, o Yave wavova vo ke kubayambula ko bakota muna nsi a Kenani.

Ozevo, vioka fikolo tuka kiafwila Arone, Yave ovovese Mose vo: ‘Bonga Yosua wantelamesa vana vena Elaza wa nganga yo nkangu. Vova kwa yau awonso vo o Yosua i mfidi ampa.’ O Mose ovangidi una kankanikina o Yave nze una omwene muna fwaniswa kiaki.

Mose una sunzula Yosua se mfidi

O Yave ovovese Yosua vo: ‘Kumama, kumoni wonga ko. Ofila Aneyisaele yamuna nsi a Kenani yina yabasila o nsilu, nkala yaku.’

I bosi, Yave ovovese Mose katomboka kuna ntandu a Mongo a Nebo muna nsi a Moabe. Vana ntandu a mongo o Mose omwene esimu dia Nkoko a Yodani yo mona nsi ambote a Kenani. Yave umvovese vo: ‘Eyayi i nsi ina yadila wan’a Abarayama e ndofi, Isaki yo Yakobo, ya kubavana yo. Isongele yo, kansi kukota mo ko.’

O Mose ofwidi vana ntandu a Mongo a Nebo. Mvu 120 kakala. Ngolo zandi ke zamana ko ngatu fwa o meso. Nkangu ukendalele yo didila Mose. Kansi, bayangalel’o kala yo Yosua wa mfidi au ampa.

Ntalu 27:12-23; Nsiku 3:23-29; 31:1-8, 14-23; 32:45-52; 34:1-12.



Yuvu

  • Aki nani awaya yau ewole batelamene vana ndambu a Mose?
  • O Yave adieyi kavovesa Yosua?
  • O Mose nkia kuma katombokela vana ntandu a Mongo a Nebo? Adieyi kamvovesa o Yave?
  • O Mose mvu nkwa kakala vava kafwa?
  • O nkangu adieyi bamwena e nkenda? Kansi adieyi bayangalela?

Yuvu yakaka

  • Tanga Ntalu 27:12-23.

    O Yave nkia mbebe ampwena kavana kwa Yosua? E mpila Yave kelunga-lunganga nkangu andi o unu aweyi imonekenanga? (Nta. 27:15-19; Mav. 20:28; Ayib. 13:7)

  • Tanga Nsiku 3:23-29.

    Ekuma o Yave kayambulwila ko vo Mose yo Arone bakota muna nsi a nsilu? Nki’elongi tulenda longoka muna diadi? (Nsi. 3:25-27; Nta. 20:12, 13)

  • Tanga Nsiku 31:1-8, 14-23.

    E mvovo mia lukananu mia Mose aweyi misongelanga vo watambulwila elongi dia Yave kuna lulembamu lwawonso? (Nsi. 31:6-8, 23)

  • Tanga Nsiku 32:45-52.

    E Diambu dia Nzambi aweyi difwete vanga muna zingu kieto? (Nsi. 32:47; Fuka 18:5; Ayib. 4:12)

  • Tanga Nsiku 34:1-12.

    Kanele vo Mose kamona Nzambi ko, aweyi e sono kia Nsiku 34:10 kisongelanga e ngwizani kakala yau yo Yave? (Luv. 33:11, 20; Nta. 12:8)