Alangi esi Isaele banete bundu

TALA e bundu banete wantu awaya. Tala o vonga kwa ntayi kimosi kia uva, kineto kwa wantu wole muna nti. Batwese mpe nsanda ye bundu yakaka. E bundu yayi yambote akweyi itukidi? Kuna nsi a Kenani. Sungamena vo e Kenani i nsi bazingidinge Abarayama, Isaki yo Yakobo. Kansi, mu kuma kia mvengele o Yakobo ye nzo andi bayaluka kuna Engipito. Owau, vioka mvu 216, o Mose ofilanga Aneyisaele mu vutuka kuna Kenani. Balueke va fulu kiayikilwanga vo Kadese.

Wantu ambi bazingilanga muna nsi a Kenani. Ikuma, o Mose otumini alangi 12 ubavovese vo: ‘Numona lutangu lwa nkangu uzingilanga mo, kana bakumama yovo batovoka, yo konso owu una ntoto, kana wa mbongo. Nutwasa bundu.’

Vava alangi bavutuka kuna Kadese bavovese Mose vo: ‘Kieleka, e nsi yambote.’ Basongele e bundu banata kwa Mose mu kwikanisa mvovo miau. Kansi alangi 10 bavova vo: ‘Nkangu uzingilanga mo wanene ye ngolo. Vondwa tuvondwa avo tutezele tambula nsi.’

Aneyisaele bamwene o wonga vava bawidi mvovo miami. “Ekwe! kele vo twafwila kweto muna Engipito! yovo twafwila muna makanga mama!” Ubavova. ‘Tufwila muna nsosolo. Akazi eto ye yingyana-ngyana bekala s’esanzu. Mbula twasola mfidi ampa katuvutula kuna Engipito.’

Kansi alangi wole Yosua yo Kalebe babunda Yave e vuvu, badingidikidi o nkangu. Bavovele vo: ‘Ke numoni wonga ko. O Yave wina yeto. Ke dikala diampasi ko muna baka nsi.’ Kansi, o nkangu ke babawila ko. Bavavidi nkutu vonda Yosua yo Kalebe.

O Yave ofungidi makasi. Ovovese Mose vo: ‘Ke vena mosi ko mun’akwa mvu 20 yo sunda okota muna nsi a Kenani. Bamwene masivi yavanga muna Engipito ye mu makanga, kansi, ke bambundidi e vuvu ko. Muna kuma kiaki, nuvumvula muna makanga mvu 40 yavana numana fwa. Yosua kaka yo Kalebe bekota muna nsi a Kenani.’

Ntalu 13:1-33; 14:1-38.



Yuvu

  • Adieyi olenda vova mu kuma kia ntayi kia uva kina muna fwaniswa? Akweyi kiatuka?
  • Ekuma Mose katumina alangi 12 kuna nsi a Kenani?
  • Adieyi diavova alangi kumi kwa Mose vava bavutuka?
  • Aweyi alangi wole babundila e vuvu kwa Yave? Nkumbu zau nani?
  • Ekum’o Yave kafungila makasi? Adieyi kavovesa kwa Mose?

Yuvu yakaka

  • Tanga Ntalu 13:1-33.

    Aki nani basolwa mu langa nsi? Nki’elau diampwena bakala diau? (Nta. 13:2, 3, 18-20)

    Ekuma e ngindu za Yosua yo Kalebe zaswaswanena ye za alangi akaka? Aweyi ditulongele ediadi? (Nta. 13:28-30; Mat. 17:20; 2 Kor. 5:7)

  • Tanga Ntalu 14:1-38.

    Nkia lulukisu lwa lembi yidiminina selo ya Yave tufwete lemvokela? (Nta. 14:2, 3, 27; Mat. 25:40, 45; 1 Kor. 10:10)

    Mana tutanganga muna Ntalu 14:24 aweyi mesongelanga vo o Yave ovwanga konso selo kiandi o mfunu? (1 Nti. 19:18; Nga. 15:3)