Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 30: Nti Ulemanga

Lusansu lwa 30: Nti Ulemanga

O MOSE wele avungula mameme. Olweke kuna mongo a Korebe. Omwene nti ukweme yo tiya, vo i nti ke ubomokanga ko.

Mose ofinamene o nti ulemanga

O Mose vo: ‘Diasivi e diambu diadi. Yambula yafinama, yamon’e mbona yayi yanene.’ Vava kafinama e ndinga itukidi muna kati kwa nti yivovele vo: ‘Kufinam’oko ko: vula nsampatu omo malu, kadi e fulu kiaki otelamene, ntoto avauka.’ Nzambi wavovanga muna mbasi. O Mose wiyifukidi o lose.

Nzambi umvovese vo: ‘Mbwene mpasi za nkangu ame wina muna Engipito. Ikubakôla. Wiza wau, yatuma kwa Faro, wavaikisa nkangu ame, muna Engipito.’ Yave ofila nkangu andi muna nsi ambote ya Kenani.

O Mose ovutwidi Nzambi vo: ‘Omono i nani? Aweyi mvangila e diambu diadi?’ Vava nluaka kwa wan’a Isaele, oyau ovo bekumpovesa vo, “Nani utumini” ‘Aweyi ikubavovesa?’

Nzambi umvutwidi vo: “I wau wuwu voves’o wan’a Isaele vo, o YAVE wa Nzambi a mase meno, o Nzambi a Abarayama, wa Nzambi a Isaki, wa Nzambi a Yakobo untumini kwa yeno.” O Yave umvovese mpe vo: “Eyayi i nkumbu ame yamu mvu ya mvu.”

O Mose ovutwidi vo: ‘Ovo ke bekunkwikila ko vava mvova vo ngeye umfididi,’ aweyi mvanga?

O Nzambi unyuvwidi vo: “Nki kiokio vovo koko kwaku?”

O Mose ovutwidi vo: “Nkau.”

O Nzambi vo: “Tuba wo ova ntoto.” Otubidi wo vana ntoto, ukitukidi se nioka. O Yave osongele Mose esivi diakaka. Umvovese vo: ‘Kotesa koko kwaku ku nsi a kinkutu.’ Vava kakatwidi ko, o koko kupembele nga mvul’ampembe. Kukitukidi nze kimbevo kia wazi. I bosi, o Yave wavana Mose e wisa kia vanga esivi dietatu. Umvovese vo: ‘Vava ovanga masivi mama Aneyisaele bekwikila vo mono itumini.’

O Mose ovutukidi kuna nzo, ovovese Yitero vo: ‘Unsindika, do, yavutuka kwa yitu yame ina muna Engipito, yamona una bena.’ O Yitero, osindikidi Mose, ovutukidi kuna Engipito.

Luvaiku 3:1-22; 4:1-20.



Yuvu

  • O mongo una muna fwaniswa aweyi uyikilwanga?
  • Yika diambu diasivi kamona o Mose muna mongo vava kavungulanga mameme.
  • Ndinga nani kawa muna nti walemanga ye adieyi yamvovesa?
  • Aweyi kavutula o Mose vava Nzambi kamvovesa vo yandi ovaikisa nkangu a Nzambi muna Engipito?
  • O Nzambi adieyi kavovesa Mose mu vutula avo banyuvwidi nani untumini?
  • O Mose aweyi kesongela vo Nzambi untumini?

Yuvu yakaka

  • Tanga Luvaiku 3:1-22.

    E nona kia Mose aweyi kisongelanga vo o Yave okutusadisa vava tukuyimwenanga vo ke twafwana ko mu sala e salu kiandi? (Luv. 3:11, 13; 2 Kor. 3:5, 6)

  • Tanga Luvaiku 4:1-20.

    O Mose aweyi kasobela e fu yandi muna mvu 40 kazingila muna nsi a Midiani? Adieyi balenda longoka muna nona kiaki awana bevavanga kala ye mbebe muna nkutakani? (Luv. 2:11, 12; 4:10, 13; Mika 6:8; 1 Tim. 3:1, 6, 10)

    Kana nkutu Yave utusembele muna nkubik’andi, e nona kia Mose nkia vuvu kikutuvananga? (Luv. 4:12-14; Nku. 103:14; Ayib. 12:4-11)