Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 29: Ekuma Mose Ketininanga?

Lusansu lwa 29: Ekuma Mose Ketininanga?

TALA Mose otinini tuka muna Engipito. Ng’omwene wantu benkulandanga? Ng’ozeye ekuma bazolele kumvondela? Yambula twatala.

Mose otinini muna Ngipito

O Mose mu nzo a Faro wa ntinu a Engipito kasansukila. Okitukidi se nkwa ngangu kikilu. O Mose wazaya wo vo ke mwisi Ngipito ko, amase mandi abundu, Aneyisaele.

Lumbu kimosi, vava kalungisa mvu 40, o Mose wele tala una wazingilanga yitu yandi. Funtunwa kikilu bafuntunwanga. Omwene Ngipito owandanga Nyisaele. Otadidi y’oku y’oku, vava kamona vo ke vena muntu ko, owende o Ngipito, ofwidi. Unswekele mun’esenge.

E lumbu kiezole wele tala diaka nkangu andi. Edi kabanzanga vo olenda kubavevola muna ubundu. Kansi, omwene Aneyisaele wole benwananga. Ovovese ndiona wavang’edi diambi vo: “Adieyi owandila nkw’aku?”

Oyandi umvutwidi vo: ‘Nani utumbidi e kinkuluntu ye kimfundisi kieto? Ng’ozolele kumponda una wavondèle o Ngipito e?’

O Mose omwene o wonga. Obakwidi vo e diambu kavanga kwa Ngipito dizayakene. O Faro mpe owidi dio. Otumini wantu bavonda Mose. Ekiaki i kuma Mose ketininanga tuka muna Engipito.

Wele zingila muna nsi a Midiani. Ozayidi nzo a Yitero, osompele mwan’andi mosi ankento, nkumbu andi Sipora. O Mose okitukidi se mvungudi a mameme ma Yitero. Ozingidi mvu 40 muna nsi a Midiani. Owau, 80 lwa mvu se kena. Lumbu kimosi, vava Mose kalunga-lunganga mameme ma Yitero, wamona diambu diasivi diasoba zingu kiandi kiawonso. Ziula lukaya lulende wamona diambu diadi diasivi.

Luvaiku 2:11-25; Mavangu 7:22-29.



Yuvu

  • O Mose akweyi kasansukila? Kansi, adieyi kazaya mu kuma kia mase mandi?
  • Adieyi kavanga o Mose vava kakala ye kimbuta kia mvu 40?
  • O Mose adieyi kavovesa kwa mwisi Isaele ona wanwanisanga nkw’andi ye nkia mvutu kamvutula?
  • Ekuma Mose katinina tuka muna Engipito?
  • Akweyi katinina ye nani kawana ko?
  • Nkia salu kasalanga o Mose muna mvu 40 kazingila muna nsi a Midiani?

Yuvu yakaka

  • Tanga Luvaiku 2:11-25.

    Kana una vo walongwa muna ngangu za Engipito o Mose aweyi kasongela e kwikizi kiandi kwa Yave ye kwa nkangu andi? (Luv. 2:11, 12; Ayib. 11:24)

  • Tanga Mavangu 7:22-29.

    Adieyi tulenda longoka mu mpila in’o Mose kavavila kula Aneyisaele muna ubundu kuna Engipito muna ngolo za yandi kibeni? (Mav. 7:23-25; 1 Pet. 5:6, 10)