NGA kufwila mbevo ndioyo nkenda ko? Nkumbu andi Yobi. O nkento ndioyo i nkaz’andi. Ng’ozeye nkia diambu kevovesanga kwa Yobi? “Yambula Nzambi, wafwa.” Tusinga zaya ekuma kavovela e mpova zazi, y’ekuma Yobi kamwena e mpasi.

Yobi ye mavumbu mu nitu

O Yobi nkwa kwikizi kakala, wavuminanga Yave. Muna nsi a Usi yafinama ye Kenani kazingilanga. O Yave wazolanga kikilu Yobi, kansi vena ye muntu wamenganga. Ng’ozeye kana nani?

Satana wa Nkadi Ampemba. Sungamena dio vo, Satana mbasi ambi. Ntantu a Yave. Wafilakesa Adami yo Eva mu kolamena Yave. Edi kebanzanga vo olenda filakesa mpe wantu awonso mu kolamena Yave. Nga olenda dio vanga? Ve. Yindula ulolo wa akala y’akento akwikizi ana olongokele kala. Nkumbu kwa muna yau olenda sungamena?

Vava Yakobo yo Yosefe bafwa muna Engipito, o Yobi i nkwa ziku wazinganga ova nza. O Yave wasonga kwa Satana vo kalendi filakesa wantu awonso ko mu vanga bi. Ikuma, wamvovesa vo: ‘Tala Yobi. Nkwa ziku kuna kwa mono.’

O Satana ovutwidi Nzambi vo: ‘Oyandi nkwa ziku kadi unsambwidi, ye wamvana ulolo wa lekwa yambote. Kansi, katula yawonso kena yau, ozevo okuyambula vana ndose aku.’

O Yave ovovese Satana vo: ‘Wenda, katula yawonso kena yau. Vanga mbi yawonso ozolele kwa Yobi, twatala kana vo okumbembola. Kansi, kumvondi ko.’

Diantete, o Satana oyiyisi ngombe ye samo zawonso za Yobi. Ovondese mameme mandi. I bosi, otwikidi kimbongela kiampwena kivondele wana 10 a Yobi, amakala y’amakento. Kuna kwalanda, oyelese Yobi kimbevo kiampasi. O Yobi mpasi kikilu kamona. Ekiaki, ikuma nkaz’andi kamvovesela vo: “Yambula Nzambi, wafwa.” Kansi, Yobi kayambula Nzambi ko. Akundi atatu a Yobi mpe bezidi. Bamvovese vo esumu kanata, i kuma e mpasi zazi zanlwakila. Kansi, o Yobi wakwamanan’o songa e kwikizi kwa Nzambi.

E kwikizi kia Yobi kiayangidika kikilu Yave. Muna kuma kiaki, wansambula, nze una omwene muna fwaniswa kiaki. Wasasula kimbevo kiandi. O Yobi wawuta diaka miote mia wana 10. O Yave wavana kwa Yobi ngombe, samu ye mameme mayingi vioka mana kateka kala mau.

Nga olenda songa e kwikizi kwa Yave nze Yobi? Avo i wau, o Nzambi okusambula mpe. Ozinga yakwele mvu vava nza yawonso ikitulwa se fulu kiambote nze mpatu a Edene.

Yobi 1:1-22; 2:1-13; 42:10-17.

Yobi ye esi nzo andi


Yuvu

  • O Yobi nani kakala?
  • O Satana adieyi kateza vanga? Nga wasunda?
  • O Yave nkia diambu kavanina Satana o nswa avanga? Ekuma?
  • Ekuma nkaz’a Yobi kamvovesela vo “yambula Nzambi, wafwa”? (Tala e fwaniswa.)
  • Nze una omwene muna fwaniswa kiezole, Yave aweyi kasambulwila Yobi, ekuma?
  • Nkia nsambu tutambula avo tuzindalala ye kwikizi muna Yave nze Yobi?

Yuvu yakaka

  • Tanga Yobi 1:1-22.

    Akristu aweyi balenda tanginina Yobi o unu? (Yobi 1:1; Fili. 2:15; 2 Pet. 3:14)

  • Tanga Yobi 2:1-13.

    Yobi yo nkaz’andi aweyi baswaswanena muna mpila babadikilanga e ntonta za Satana? (Yobi 2:9, 10; Nga. 19:3; Mika 7:7; Mal. 3:14)

  • Tanga Yobi 42:10-17.

    E nsambu katambula Yobi aweyi zifwananene ye zina katambula Yesu mu kuma kia kwikizi kiandi kwa Nzambi? (Yobi 42:12; Fili.2:9-11)

    E nsambu katambula Yobi muna kwikizi kiandi kwa Nzambi aweyi zikutukasakeselanga? (Yobi 42:10, 12; Ayib. 6:10; Yak. 1:2-4, 12; 5:11)