Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 23:

Lusansu lwa 23:

VIOKA mvu miole o Yosefe wakinu muna pelezo. O nembungwa kansungamena ko. Fuku dimosi, o Faro olotele ndozi zole. Wavava zo zaya e nsasa. Nga umwene olele vava? Muna mene, o Faro otumisi aludiki andi, ubazingulwidi ndozi zandi. Kansi ke balenda zo kunsasila ko.

I bosi, o nembungwa osungamene Yosefe. Ovovese Faro vo: ‘Vava yakala muna pelezo, mwakala y’etoko wasasilanga e ndozi.’ Vana vau o Faro otumisi Yosefe, ovaikisu muna pelezo.

O Faro ozayisi Yosefe e ndozi zandi: ‘Mbwene ngombe nsambwadi zamazi. I bosi mbwene ngombe nsambwadi zavwa tanda. E ngombe zatanda, zididi e ngombe zamazi.

Faro una lota e ndozi

‘Muna ndozi y’ezole mbwene ntu nsambwadi mia masa miambote muna ntayi mosi. I bosi, mbwene ntu nsambwadi mia masa mialengela. E ntu mialengela miminini ntu nsambwadi miambote.’

O Yosefe ovovese Faro vo: ‘E ndozi zau zole imosi kwandi. E ngombe nsambwadi zambote ye ntu nsambwadi mia masa miambote i mvu nsambwadi. E ngombe nsambwadi zatanda ye ntu nsambwadi mia masa mialengela i mvu nsambwadi miakaka. Mvu nsambwadi mikwiza, mukala yo ulolo wa madia muna Engipito. I bosi mvu nsambwadi mia mvengele milanda.’

O Yosefe ovovese Faro vo: ‘Sola nkwa ngangu wamvana kiyekwa kia salu kia kutika yo lunda madia mawonso ma mvu nsambwadi miami mia ulolo. O nkangu walembi fwa ye nzala muna mvu nsambwadi mia mvengele vav’o ntoto ke uyima madia mayingi ko.’

E diambu diadi diayangidika Faro. Osolele Yosefe mu kutika yo lunda madia. Katula Faro, o Yosefe okitukidi se muntu a tunda kikilu muna Engipito.

Vioka mvu nana, o mvengele vava wasiama, o Yosefe olwakilu kwa wantu. Ng’ozeye aki nani? Mpangi zandi 10. O Yakobo w’es’au ubatumini kuna Engipito kadi ke kwakala diaka madia ko kuna Kenani. O Yosefe obakwidi mpangi zandi, kansi oyau ke bambakula ko. Ng’ozeye ekuma? Ekuma kadi o Yosefe se mbuta ye mvwatu kavwatanga miaswaswana.

O Yosefe osungamene ndozi kalota muna kitoko kiandi vava mpangi zandi bamvumbamena. Nga osungamene yo? Ozevo, o Yosefe wabakula vo mu luzolo lwa Nzambi kwandi kayendela kuna Engipito. Adieyi obenze kavanga o Yosefe? Yambula twatala.

Etuku 41:1-57; 42:1-8; 50:20.



Yuvu

  • Adieyi diabwila Faro mu fuku dimosi?
  • O nembungwa aweyi kasungamena Yosefe?
  • Nze una usonganga e fwaniswa, azeyi e ndozi zole kalota o Faro?
  • O Yosefe aweyi kasasila e ndozi zozo?
  • O Yosefe aweyi kakitukila se muntu atunda muna Engipito?
  • Ekuma ampangi za Yosefe bayizila muna Engipito? Ekuma balembi kunzayila diaka?
  • O Yosefe nkia ndozi kasungamena? Adieyi zambakulwisa?

Yuvu yakaka

  • Tanga Etuku 41:1-57.

    O Yosefe aweyi kafidilanga e ngindu kwa Yave? Akristu aweyi balenda kuntanginina o unu? (Etu. 41:16, 25, 28; Mat. 5:16; 1 Pet. 2:12)

    E mvu mia ulolo wa madia muna Engipito ye mvu mia mvengele mialanda aweyi misongelanga e nswaswani ya nkal’a kimwanda ya nkangu a Yave ye ya Kikristu kia Kimpangila? (Etu. 41:29, 30; Am. 8:11, 12)

  • Tanga Etuku 42:1-8 ye 50:20.

    O vumbamena muntu avo fu kia luzitu muna nsi ozingilanga nga diambi kwa asambidi a Yave mu vanga wo? (Etu. 42:6)