LOTI ye nzo andi vamosi bazingilanga yo Abarayama kuna nsi a Kenani. Lumbu kimosi, Abarayama wavova kwa Loti vo: ‘E fulu kiaki ke kiafwana ko muna vungula bulu yeto yawonso. Wiyivambul’oku ngina do. Ovo okwenda kuna lunene, omono ngyele kuna lumonso.’

O Loti otadidi nsi yawonso. Omwene fulu kiambote kia ndimb’a Yodani kiazala yo maza ye titi mu dikila e bulu. Ozevo, o Loti wayaluka ye nzo ye bulu yandi. Kuna kwalanda batunga nzo au muna mbanz’a Sodomo.

Esi Sodomo ambi kikilu. Ediadi diakendeleka Loti, kadi muntu ambote kakala. Diakendeleka mpe Nzambi. O Nzambi wafila mbasi zole mu vovesa Loti vo ofwasa Sodomo ye Ngomora mu kuma kia bi wau.

Ambasi bavovesa Loti vo: ‘Telama, bonga nkaz’aku, yo wan’aku wole amakento bena mo nuvaika.’ Loti ye nzo andi bakala ye fuki muna vaika. Ikuma, ambasi babasimba muna moko yo kubavaikisa ku mbazi a mbanza. Mbasi mosi wavova vo: ‘Nutina mu kuma kia mioyo mieno; ke nutadi ku nima ko; nutinina kuna mongo, ke nwafwa.’

Loti yo wan’andi amakento balemvokela mbasi yo sisa Sodomo. Ke baningama ko ngatu tala ku nima. Kansi, nkaz’a Loti wakolamena nsiku. Vava baluaka va la ye Sodomo waningama yo tala ku nima. Wakituka s’etadi dia mungwa.

Tulenda longoka diambu diamfunu mun’elongi diadi. Disongele vo o Nzambi ovuluzanga awana bekunlemvokelanga. Kansi, awana balembi kunlemvokela bevidisa mioyo miau.

Etuku 13:5-13; 18:20-33; 19:1-29; Luka 17:28-32; 2 Petelo 2:6-8.

Loti ovaikidi muna mbanz’a Sodomo


Yuvu

  • Ekuma Abarayama yo Loti bavambanena?
  • Ekuma o Loti kasolela kala muna Sodomo?
  • Esi Sodomo nkia mpila wantu bakala?
  • Ambasi zau ezole nkia lulukisu bavana kwa Loti?
  • Ekuma nkaz’a Loti kakitukila s’etadi dia mungwa?
  • Adieyi tulenda longoka muna dina diabwila nkaz’a Loti?

Yuvu yakaka

  • Tanga Etuku 13:5-13.

    Nkia mbandu ya singika diambu yo nkw’aku katuvana Abarayama? (Etu. 13:8, 9; Roma 12:10; Fili. 2:3, 4)

  • Tanga Etuku 18:20-33.

    Aweyi e nkal’a Yave yo Abarayama yikutusongelanga eziku vo o Yave yo Yesu mu unsongi befundisila? (Etu. 18:25, 26; Mat. 25:31-33)

  • Tanga Etuku 19:1-29.

    Nkand’a Nzambi aweyi usongelanga e nyindu a Nzambi mu kuma ki’evangu dia yakala oleka yo yakala? (Etu. 19:5, 13; Fuka 20:13)

    Nkia nswaswani tumwene muna Loti ye Abarayama mu lunda nkanikinu a Nzambi? Adieyi ditulongele? (Etu. 19:15, 16, 19, 20; 22:3)

  • Tanga Luka 17:28-32.

    O nkaz’a Loti aweyi kabadikilanga mavwa? Ediadi aweyi dilenda kadila se lulukisu kwa yeto? (Luka 12:15; 17:31, 32; Mat. 6:19-21, 25)

  • Tanga 2 Petelo 2:6-8.

    Muna tanginina Loti, aweyi tufwete badikilanga e nza yambi ituzungidi? (Yez. 9:4; 1 Yoa. 2:15-17)