Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 11: Nkongolo Antete

Lusansu lwa 11: Nkongolo Antete

NG’OZEYE diambu diantete kavanga Noa vava kavaika muna nzaza y’esi nzo andi? Wavana lukau kwa Nzambi. Olenda kumona muna fwaniswa kin’ova yanda. Noa wavana lukau lwalu lwa bulu muna vutula matondo kwa Nzambi wavuluza nzo andi mu kizalu kiampwena.

Nzaza ye nkongolo

Nga Yave wayangalela lukau lolo? Elo, wayangalela lo. Muna kuma kiaki, wakanikina Noa vo kefwasa diaka nza mu kizalu ko.

Ke kolo ko, o ntoto wayuma. Noa ye nzo andi bayantika zingu kiampa kuna mbazi a nzaza. O Nzambi wabasambula yo kubavovesa vo: “Nuwutana, nusayana, nulungil’e nza.”

Kansi, oku sentu vava wantu bewa oma ma kizalu kiampwena nanga balenda kala yo wonga vo kizalu kilenda kala diaka ova ntoto. Ozevo, Nzambi wavana sinsu muna sungamesa nsilu andi kwa wantu vo kefwasa diaka nza mu kizalu ko. Ng’ozeye sinsu kavana muna kubasungamesa? Nkongolo.

Noa ye esi nzo andi

E nkongolo imonekanga kun’ezulu vava mwini ubayanga kunima mvula. Ina ye se yayingi yambote. Nga wamona yo kala? Ng’omwene yo muna fwaniswa kiaki?

Owu kavov’o Nzambi: ‘Wantu awonso ye bulu ke befwaswa diaka kwa maza ma kizalu ko. Nsidi nkongolo ame mun’etuti. Vava nkongolo imoneka, nsungamena nsilu ame.’

Ozevo, vava omonanga nkongolo, adieyi ofwete sungamena? Elo, Nzambi wasia nsilu vo kefwasa diaka nza mu kizalu kiampwena ko.

Etuku 8:18-22; 9:9-17.



Yuvu

  • Nze una usonganga e fwaniswa, nkia diambu dantete kavang’o Noa vava kavaika muna nzaza?
  • O Nzambi nkia nkanikinu kavana kwa Noa y’esi nzo andi kuna nima Kizalu?
  • Nkia nsilu kasil’o Nzambi?
  • Adieyi tufwete sungamenanga vava tumonanga e nkongolo?

Yuvu yakaka

  • Tanga Etuku 8:18-22.

    Aweyi tulenda tambikila Yave lukau lwa “nsunga zambote” o unu? (Etu. 8:21; Ayib. 13:15, 16)

    Adieyi kavova o Yave mu kuma kia ntim’a muntu? Muna kuma kiaki, aweyi tufwete kuyikengela? (Etu. 8:21; Mat. 15:18, 19)

  • Tanga Etuku 9:9-17.

    Nki’ekangu kakanga o Nzambi ye ma yawonso yamoyo? (Etu. 9:10, 11)

    Ekangu dia nkongolo dia kolo kwa? (Etu. 9:16)