AVO olwakilu kwa muntu anda olwakanga yamu nludi a nzo aku aweyi okumbadikila? Muntu ndioyo ndangula. Vakala ye ntangwa andangula bazingilanga ova nza. Nkand’a Nzambi uvovanga vo mase mau mbasi z’ezulu. Aweyi diavangamena ediadi?

Andangula

Sungamena dio vo Satana wa mbasi ambi wakwamanan’o vang’o bi. Wavukumuna nkutu mbasi za Nzambi bavanga o bi. Kuna kwalanda, akaka muna mbasi zazi bayantik’o wila Satana. Bayambula salu kabavan’o Nzambi kun’ezulu. Bakulumuka ova ntoto, yo vwata nitu za wantu. Ng’ozeye ekuma?

Nkand’a Nzambi uvovanga vo wana awaya a Nzambi miote mi’akento bamona ova ntoto yo zola zinga yau entwadi. Ozevo, bakulumuka va ntoto yo sompa akento awaya. Nkand’a Nzambi uvovanga vo evangu diadi diambi kikilu diakala, kadi Nzambi kavanga mbasi mu zingila va ntoto ko.

Vava bayantik’o wuta, wan’au baswaswana bakala. Kuna lubantiku nanga ke vakalanga nswaswani beni ko. Kansi, bakulanga kwayingi yo kumama yavana bakituka s’andangula.

Andangula wantu ambi bakala. Wau vo basunda vonga, ntela ye ngolo babangikanga akaka. Bavukumunanga wantu mu vanga mambi nze yau.

Kanoke, wafwa, kansi vakala ye muntu akaka ova ntoto wavanganga mambu mambote. Nkumbu andi Noa. Wavanganga mana kazola o Nzambi.

Lumbu kimosi Nzambi wavovesa Noa vo e ntangwa yafwasa yimpumbulu yawonso ifwene. Kansi, ovuluza Noa, y’esi nzo andi ye bulu. Yambula twatala una kavangila wo o Nzambi.

Etuku 6:1-8; Yuda 6.



Yuvu

  • Adieyi diabwa vava ambasi zakaka za Nzambi bayantik’o wila Satana?
  • Ambasi zakaka nkia kuma bayambulwila salu kabavan’o Nzambi kun’ezulu yo kulumuka ova ntoto?
  • Evangu dia ambasi, dia kulumuka ova ntoto yo vwata nitu za wantu nkia kuma diakadila diambi?
  • Nkia nswaswani yamoneka muna wana bawutwa kwa ambasi?
  • Nze una omwene muna fwaniswa, nkia mambu bavanga o wan’ambasi vava bakituka andangula?
  • O Kanoke vava kafwa, nkia muntu ambote wakala ova ntoto? Ekuma Nzambi kanzolelanga?

Yuvu yakaka

  • Tanga Etuku 6:1-8.

    Esono ki’Etuku 6:6 aweyi kisongelanga vo mavangu meto malenda mwesesa Yave e ntantu? (Nku. 78:40, 41; Nga. 27:11)

  • Tanga Yuda 6.

    Ambasi zina ‘zalembi lund’e fulu kiau’ muna lumbu ya Noa aweyi benena se lulukisu mu lumbu yeto? (1 Kor. 3:5-9; 2 Pet. 2:4, 9, 10)