Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 6: Mwana Ambote ye Wambi

Lusansu lwa 6: Mwana Ambote ye Wambi

TALA Kaini yo Abele ovava. Banungunukini e ntela. O Kaini se mvati a nsengo. Wakunanga masa, bundu ye nkovi.

Kaini ye Abele bena yoka tukau kwa Nzambi

Abele se mvungudi a mameme. Wazolanga lunga-lunga wan’a mameme. Mawokelanga. Ke kolo ko, Abele wakala y’ekambi dia mameme.

Lumbu kimosi, Kaini yo Abele bavana lukau kwa Nzambi. Kaini watwasa mbongo a kiana. Vo i Abele watwasa ememe disundidi owete. Yave wayangalela Abele yo lukau luandi. Kansi, kayangalela Kaini ko yo lukau luandi. Ng’ozeye ekuma?

Ke sia ko vo lukau lwa Abele lwasunda lwa Kaini o wete. Kansi, Abele muntu ambote kakala. Wazolanga Yave ye mpangi andi. O Kaini muntu ambi; kazolanga mpangi andi ko.

Nzambi, wavovesa Kaini kasoba fu yandi. Kansi, kanwila ko. Wafunga makasi wau vo Nzambi wazola Abele. Ikuma, wavovesa mpangi andi vo, “Twenda kuna kiana.” Una bakedi yau kaka muna kiana, o Kaini ovondele Abele wa mbunzi andi. Diambu diambi kikilu kavanga Kaini.

Kaini una tina wau kavondele Abele

Kana una vo Abele wafwa, Nzambi wakinu kunsungamena. Abele muntu ambote kakala, o Yave kevilakananga wantu ambote ko. Yave wa Nzambi ovutula Abele o moyo. Kefwa diaka ko. Ozinga ova ntoto yakwele mvu. Nga ke diambote ko dia zaya wantu nze Abele?

Nzambi keyangalelanga wantu nze Kaini ko. Ozevo, vava Kaini kavonda mbunzi andi, Nzambi wantumba. Wamvovesa vo kenda zingila kwa nda y’esi nzo andi. Vava kayenda zingila kwakaka wanata mpangi andi ankento, wakituka se nkaz’andi.

Kuna kwalanda, Kaini yo nkaz’andi bayantik’o wuta wana. Wana akaka amakala y’amakento a Adami yo Eva basompaziana yo wuta wana. Ke kolo ko wantu bayantika wokela ova ntoto. Tusinga zaya maka mambu mu kuma kiau.

Etuku 4:2-26; 1 Yoane 3:11, 12; Yoane 11:25.



Yuvu

  • Kaini yo Abele nkia salu basalanga?
  • Kaini yo Abele nkia mpila tukau bavana kwa Nzambi?
  • Ekuma Yave kayangalela lukau lwa Abele? Ekuma kalembi yangalela luna lwa Kaini?
  • O Kaini nkia mpila muntu kakala? O Yave aweyi kateza kunsingikila?
  • Adieyi kavanga Kaini una bakedi yau kaka muna kiana?
  • Yika dina diabwila Kaini vava kavonda mbunzi andi.

Yuvu yakaka

  • Tanga Etuku 4:2-26.

    O Yave aweyi kasongela vo o Kaini mu vonza kena? (Etu. 4:7)

    O Kaini aweyi kasongela makani ma ntim’andi? (Etu. 4:9)

    O Yave aweyi kebadikilanga evangu dia bungula menga makondwa kuma? (Etu. 4:10; Yes. 26:21)

  • Tanga 1 Yoane 3:11, 12.

    Ekuma Kaini kafungila makasi? Ediadi aweyi dinina se lulukisu kwa yeto o unu? (Etu. 4:4, 5; Nga. 14:30; 28:22)

    Nkand’a Nzambi aweyi usongelanga vo tulenda kala ye kwikizi kwa Nzambi kana nkutu yitu yeto yawonso yisidi Yave e kitantu? (Nku. 27:10; Mat. 10:21, 22)

  • Tanga Yoane 11:25.

    Nkia vuvu kiaziku kevananga Yave kw’awonso befwilanga mu kuma kia unsongi? (Yoa. 5:24)