Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 3: Yakala yo Nkento Antete

Lusansu lwa 3: Yakala yo Nkento Antete

NKIA nswaswani omwene mu fwaniswa kiaki? Wantu bena vo. I yakala yo nkento antete. Nani wabavanga? Nzambi. Ng’ozeye nkumbu andi? Yave. O Yakala yo nkento antete bayikilwanga vo Adami yo Eva.

Adami yo Eva muna mpatu a Edene

Tala una Yave wa Nzambi kavangila Adami. Wabonga mbundukutu a ntoto, yo vanga muntu. Umvumunwini muna mazunu, o Adami okitukidi se wamoyo.

Yave wa Nzambi wavana salu kwa Adami. Wamvovesa vo kavana bulu yawonso e nkumbu. Nanga, ntangwa diavava kwa Adami muna talanga e bulu yo vava nkumbu zambote za kubayikila. Ekolo kabavananga e nkumbu diambu kayantik’o mona. Ng’ozeye kana nkia diambu?

Bulu yawonso nwole nwole yakala, ekoko ye nkento. Vakala ese ye ngudi a nzau, ese ye ngudi a nkosi. Kansi, Adami kakala ye nkento ko. Ozevo, o Yave olekese Adami wosola kia tulu, obongele luvati lwa mpati zandi. Vo i luvati luna kakatwidi muna Adami, o Yave i kavangidi nkento. Okitukidi se nkaz’andi.

O Adami kiese kiayingi kamona. Eva kiese mpe kamona mu zingila muna mpatu yoyo yambote. Badi wuta wana yo zingila kumosi mu kiese.

O Yave wazola vo Adami yo Eva bazinga yakwele mvu. Wazola vo bakitula ntoto wawonso se fulu kiambote nze mpatu a Edene. Adami yo Eva bayangalala kikilu vava bavoveswa mu vanga wo. Nga wadi yangalela kitula ntoto se mpatu ambote? Kansi, e kiese kia Adami yo Eva ke kiazingila ko. Tutala kana nkia kuma.

Nkunga 83:18; Etuku 1:26-31; 2:7-25.



Yuvu

  • E fwaniswa kia Lusansu lwa 3 aweyi kiaswaswanena ye kia Lusansu lwa 2?
  • Nani wavanga yakala diantete? Nkumbu andi nani?
  • Nkia salu kavan’o Nzambi kwa Adami?
  • Ekuma Nzambi kalekesela Adami ku wosola kia tulu?
  • Adami yo Eva kolo kwa badi zinga? Nkia salu kabavana o Yave?

Yuvu yakaka

  • Tanga Nkunga 83:18.

    O Nzambi nkumbu andi nani? Nki’etunda kavwidi muna nsema wawonso? (Yer. 16:21; Dan. 4:17)

  • Tanga Etuku 1:26-31.

    Aki nani kavanga o Nzambi muna lumbu kiesambanu kia sema? Aweyi baswaswanena ye bulu? (Etu. 1:26)

    O Nzambi nki kakubika muna dikila muntu ye bulu? (Etu. 1:30)

  • Tanga Etuku 2:7-25.

    E salu kavewa Adami kia vana e nkumbu kwa bulu adieyi kiavavanga? (Etu. 2:19)

    Esono ki’Etuku 2:24 aweyi kikutusadisilanga mu zaya e nyindu a Yave mu kuma kia longo, luvambanu lwa yakala yo nkento yo vambana kwa longo? (Mat. 19:4-6, 9)