Tala mambu

Tala ntu mia mambu

Mbangi za Yave

Sola ndinga Kikongo

Lusansu lwa 10: Kizalu Kiampwena

Lusansu lwa 10: Kizalu Kiampwena

WANTU bakwamanana yo mavangu mau kuna mbazi a nzaza. Yamu wau ke bakwikidi ko vo e Kizalu kikwiza. Bawokesa tusevo, kansi, ke kolo ko beyambul’o seva.

Wantu ambi ye bulu izungilu kwa maza ma kizalu

Kuna kinsalukisa, matonsi mayantikidi bwa tuka kun’ezulu. O Noa olungidi kwandi. Kansi, e ntangwa yakiviokela kwa konso muntu mu kota muna nzaza. Yave wazika e kielo.

Ke kolo ko ntoto wawonso uzele yo maza. Makitukidi nze nzadi ampwena. Mabwisa nti yo kindula matadi mampwena, mazu mayingi masia. Wantu bamwene wonga. Batinini muna miongo mia nda. Ekwe, kala vo bawila Noa yo kota muna nzaza ekolo kielo kiakala kiaziuka! Kansi, owau e ntangwa isakidi.

O maza masakidi wokela. E mvula inokene mini makumaya yo mafuku makumaya. O maza matombokele vana miongo, ye miongo mianda nkutu milangilu yo maza. Ozevo, wantu awonso ye bulu kuna mbazi a nzaza bafwa, nze una kavova o Nzambi. Kansi, awonso bakala muna nzaza bavuluka.

O Noa ye nzo andi salu kiambote basala wau batunga e nzaza. Maza mazangwidi e nzaza, yele akukula vana ntandu a maza. Vava mvula yamanisa o noka, mwini ubayidi. Nkia mpil’esivi! Mwawonso mwakituka se mbu ampwena. Nzaza kaka yamonekanga, yayangama vana ntandu a maza.

E nzaza vana ntandu a maza

Andangula bavididi. Ke bemwesa diaka wantu mpasi ko. Yau awonso bafwidi kumosi ye ngudi zau ye wantu akaka ambi. Kansi, adieyi diabwila mase mau?

Mase m’andangula ke wantu nze yeto ko. Mbasi z’ezulu bakala, bayiza zingila nze wantu ova ntoto. Ozevo, ke bafwa kumosi ye wantu akaka ambi ko vava kiayiza Kizalu. Basisa nitu za wantu yo vutuka kun’ezulu nze mbasi. Kansi, ke bayambulwa ko bayikana diaka ye mbasi za Nzambi. Bakitukidi se mbasi za Satana. Muna Nkand’a Nzambi beyikilwanga vo nkwiya.

Nzambi ovevomwene tembwa. Maza ma kizalu mayantikidi o kuluka. Vioka ngonde tanu e nzaza ivwende van’ebata dia mongo. Vioka lumbu, awana bakala muna nzaza batalanga kuna mbazi yo mona mabata ma miongo. O maza makulukang’aka.

O Noa ovaikisi ngono muna nzaza. Wele atilumukanga, kansi kasolwele fulu kia vundila ko. Watilumukanga tuk’oku yakuna nkumbu miayingi, kansi, wavutukang’aka muna nzaza.

E yembe

Noa ozolele zaya kana vo maza mayumini ova ntoto. Ovaikisi eyembe muna nzaza. Oyandi mpe ovutukidi kadi kasolwele evundilu ko. Noa unsindikidi nkumbu ezole, e yembe wizidi kota muna kena yo lukaya lua olive muna zozo. O Noa i nzaya kazaya wo vo o maza makulukidi. Osindikidi diaka yembe nkumbu atatu, osolwele fulu kiayuma kasidi vutuka ko.

O Nzambi ovovese Noa vo: ‘Vaika mu nzaza, ye nzo aku yawonso ye bulu.’ Vioka mvu amvimba bakala muna nzaza. Tulenda yindula e mpila kiese bamona mu sala yo moyo yo vaika diaka kumbazi?

Etuku 7:10-24; 8:1-17; 1 Petelo 3:19, 20.



Yuvu

  • Ekuma ke vakadila muntu mosi ko walenda kota muna nzaza vava kiayantika noka e mvula?
  • O Yave mini kwa ye mafuku makwa kanokesa mvula? Yamu nkia tezo malwaka o maza?
  • Adieyi diabwila e nzaza vava ntoto wazalanga yo maza?
  • Andangula nga bavuluka muna Kizalu? Adieyi diabwila mase m’andangula?
  • Adieyi diabwila e nzaza vioka ngonde tanu?
  • Ekuma Noa kavaikisila ngono muna nzaza?
  • Aweyi kazayila Noa vo maza mayantikidi kuluka ova ntoto?
  • O Nzambi adieyi kavovesa Noa y’esi nzo andi vioka mvu amvimba bakala muna nzaza?

Yuvu yakaka

  • Tanga Etuku 7:10-24.

    Nkia mpila lufwasu lwakala ova ntoto? (Etu. 7:23)

    Kolo kwa mazingila maza ma Kizalu muna kuluka? (Etu. 7:24)

  • Tanga Etuku 8:1-17.

    Esono ki’Etuku 8:17 aweyi kisongelanga vo ekani diantete dia Yave mu kuma kia ntoto ke diasoba ko? (Etu. 1:22)

  • Tanga 1 Petelo 3:19, 20.
  • Nkia nzengo batambula ambasi zakolama vava bavutuka kun’ezulu? (Yuda 6)

    Mana mabwila Noa y’esi nzo andi aweyi malenda siamisina e vuvu kieto muna nkum’a Nzambi wa vuluza nkangu andi? (2 Pet. 2:9)