Roma 5:1-21

  • Vutulwisa ngwizani yo Nzambi muna Kristu (1-11)

  • Lufwa muna Adami, moyo muna Kristu (12-21)

    • Sumu yo lufwa lwasayana kw’awonso (12)

    • Vangu dimosi diansongi (18)

5  Dianu vo, wau tubadikilwa vo ansongi muna lukwikilu, yambula twakala yo ungudi yo Nzambi muna Yesu Kristu wa Mfumu eto,  muna yandi twinina yo nswa wa finama Nzambi muna lukwikilu yo tambula nsambu zina tuna zau owau; twayangalala mu kuma kia vuvu kia tambula nkembo a Nzambi.  Ke wau kaka ko, kansi yambula mpe twayangalala muna mpasi, kadi tuzeye wo vo e mpasi i zitwasa luzindalalu;  luzindalalu lutwasa e dienga dia Nzambi; e dienga dia Nzambi ditwasa e vuvu,  e vuvu ke kifusulwisa muntu nsoni ko; e kuma kadi o zola kwa Nzambi kwazadiswa muna ntima mieto muna mwand’avelela, una twavewa.  Kadi, ekolo twakala twatovoka, muna ntangwa yasikidiswa, Kristu wafwila mindembi-vumina Nzambi.  Diampasi kwa muntu kafwila muntu ansongi; nanga mu kuma kia muntu ambote, olenda kabuka o fwa.  Kansi Nzambi watusonga o zola kwandi wau kayambula vo Kristu katufwila ekolo twakala asumuki.  Vana ntandu, wau tubadikilu vo ansongi muna menga mandi, muna yandi mpe tuvuluzilwa muna makasi ma Nzambi. 10  Kadi vava twakala atantu, Nzambi wavutulwisa e ngwizani andi yo yeto muna lufwa lwa Mwan’andi, musungula wau kavutulwisa e ngwizani andi yo yeto, tuvuluzilwa muna moyo andi. 11  Ke wau kaka ko, kansi tuyangalelanga mpe muna Nzambi mu kuma kia Mfumu eto Yesu Kristu, muna yandi owau e ngwizani eto yo Nzambi yavutulwiswa. 12  I kuma vo, wauna e sumu diakotela ova nza muna muntu mosi, o lufwa mpe muna sumu, i nsayana lwasayana o lufwa kwa wantu awonso, e kuma kadi awonso basumuka—. 13  Kadi una ke kiaveno o Nsiku ko, e sumu diakikadila ova nza, kansi e sumu ke diatumbwanga ko, kadi ke vakala nsiku ko. 14  Lufwa lwayala nze ntinu tuka muna Adami yamuna Mose, kana nkutu kw’awana balembi sumuka wauna Adami kasumukina, ona wina vo i fwaniswa kia ndiona okwiza. 15  Kansi, o lukau lwa Nzambi lwaswaswana ye kuzuka. Kadi avo muna kuzuka dia muntu mosi mwafwila e ndonga, e nsambu za Nzambi yo lukau lwandi lwangovo muna nsambu za muntu mosi, Yesu Kristu, zisunda o wokela kuna kwa wantu ayingi. 16  Dina diayizila muna lukau lwa Nzambi diaswaswana ye dina diayizila muna sumu dia muntu mosi. Kadi e kuzuka dia muntu mosi diatwasa ngielele kwa wantu awonso, kansi ndonga balungisilwa muna lukau lwangovo luna lwayizila mu kuma kia makuzuka mayingi. 17  Wau vo muna kuzuka dia muntu mosi, o lufwa i lwayadila se ntinu muna muntu ndioyo, awana betambula ulolo wa nsambu yo lukau lwa ndungidi, beluta yala se atinu muna moyo muna muntu mosi, Yesu Kristu! 18  Ozevo, wau vo muna kuzuka dimosi, wantu a mpila zawonso bayeleswa, diau dimosi mpe muna vangu dimosi diansongi wantu a mpila zawonso belungisilwa muna vua o moyo. 19  Kadi wau vo muna ukolami wa muntu mosi, ndonga yakitulwa se asumuki, diau dimosi mpe muna lemvo wa muntu mosi, ndonga bekitulwa se ansongi. 20  O Nsiku wasiwa kimana e kuzuka diawokela. Kansi vana vawokela e sumu, e nkenda za Nzambi mpe i vana zawokelela. 21  Ekuma? E kuma kadi, wauna e sumu yo lufwa lwayadila se ntinu, i una mpe e nsambu za Nzambi ziyadila muna unsongi kimana zatwasa moyo a mvu ya mvu muna Yesu Kristu wa Mfumu eto.

Mvovo vana yand'a lukaya