Roma 12:1-21

  • Nutambika nitu zeno se kimenga kiamoyo (1, 2)

  • Tukau twaswaswana kansi nitu mosi (3-8)

  • Malongi kwa Akristu akieleka (9-21)

12  Dianu vo, ampangi, inuwondelele muna nkenda za Nzambi nwatambika e nitu zeno se kimenga kiamoyo, kiavauka, kiatondakana kwa Nzambi, se salu kieno kiavauka muna nyindu asikila.  Nuyambula kuyisi’e fwani-fwani ye tandu* kiaki, kansi nuvanguluka muna soba nyindu mieno, kimana nwazaya* owu wina luzolo lwa Nzambi, lwambote, lwatondakana ye lwalunga.  Kadi muna nsambu za Nzambi zina yavewa, i mpovele kwa konso muntu vovo nwina vo, kayiyindulwila e ngindula isundidi ina kafwete yindula ko, kansi kayindula kaka e ngindul’ansongi, mun’owu wa tezo kia lukwikilu kavana o Nzambi kwa konso muntu.  Kadi wauna twinina ye yîkwa yayingi muna nitu mosi, kansi konso kîkwa ye mfunu andi,  i twina mpe oyeto, kana una vo ayingi twina, tu nitu mosi kaka muna Kristu, kadi tu yîkwa yayikakiana muntu yo nkw’andi.  Dianu vo, wau tuna ye tukau twaswaswana mun’owu wa nsambu za Nzambi zina twavewa, avo lukau lwa sakula, yambula twasakula mun’owu wa tezo kia lukwikilu twavewa;  avo uselo, yambula twayivana muna uselo weto; ndiona olonganga, yambula kayivana muna longa;  ndiona okasakesanga,* yambula kakwamanana kasakesa;* ndiona okayanga, yambula kakayila kuna mvevo; ndiona ovitang’o ntu, yambula kavangila wo ye fululu kiawonso; ndiona osonganga nkenda, yambula kavangila wo kuna kiese.  O zola kweno yambula kwakondwa kivunina. Numwena dina diambi e ngemi; nutatidila dina diambote. 10  Muna zola kwa kimpangi, nusongaziana walakazi. Nuvitang’o ntu muna zitisa muntu yo nkw’andi. 11  Nukala akwa fululu,* ke nukadi miolo ko. Nuyambula mwand’avelela wanusadisa nwakala yo vema. Nusadila Yave nze ntaudi. 12  Nuyangalala muna vuvu. Nuzizila muna mpasi. Nukwaminina muna sambu. 13  Nukayila aveledi mun’owu wa nsatu zau. Nukala ye fu kia tambula nzenza. 14  Nusambula awana bekunubangikanga; nusambula, ke nusibi ko. 15  Nukembesa awana bekembanga; nudidisa awana bedilanga. 16  Nubadikila ankaka nze una nukuyibadikilanga; ke nuyindulanga oma manene ko, kansi nuyindulanga kaka oma masakelele. Ke nuyibadikila akwa ngangu ko. 17  Ke nuvutula muntu mbi muna mbi ko. Nusia kaka e sungididi mun’oma mansongi mezolakana kwa* wantu awonso. 18  Avo dilendakana, kuna dieno sambu, nukadila kuna luvuvamu yo wantu awonso. 19  Azolwa, ke nulandi kunda ko, kansi nusisila kaka o makasi* e nzila; kadi diasonama vo: “‘Diame dia landa e kunda; mono kwame nsenda,’ u kavovele o Yave.” 20  Kansi, “avo ntantu aku nzala kefwa, umvana kia dia; avo vuina kemona, umvana kia nua; kadi muna vanga owau osia makala ma tiya vana ntu andi.”* 21  Kusundwa kwa bi ko, kansi sunda kaka o bi muna wete.

Mvovo vana yand'a lukaya

Tala Nsas’a Mvovo.
Yovo “nwatonta.”
Yovo “owondelelanga.”
Yovo “wondelela.”
Yovo “vema.”
Yovo “vana ndose a.”
I sia vo, makasi ma Nzambi.
I sia vo, lembeka muntu yo zezesa bala kwandi kwa ntima.