Mavangu 8:1-40

  • Saulu wa mbangiki (1-3)

  • Salu kia Filipo kitwese nluta muna Samaria (4-13)

  • Petelo yo Yoane batuminu kuna Samaria (14-17)

  • Simone ovavidi sumba mwand’avelela (18-25)

  • Nzimba wa mwisi Etiopia (26-40)

8  O Saulu watambulwila mpe vo Setefano kavondwa. Muna lumbu kiakina mubundumukini lubangamu lwangolo muna nkutakani yakala muna Yerusaleme; katula kaka antumwa, yau awonso bamwanganeswa muna zunga ya Yuda ye Samaria.  Kansi, wantu ana bavuminanga Nzambi babongele Setefano kimana banzika yo kundila dilu kiayingi.  Saulu oyantikidi fukisa nkutakani. Wele muna nzo ye nzo, obakidi akala ye akento, ubayekwele muna pelezo.  Kansi, ana bamwanganeswa muna nsi, bele samuning’e nsangu zambote za diambu dia Nzambi.  Filipo okulumukini kuna mbanz’a Samaria, oyantikidi kubasamunwina oma ma Kristu.  E ndonga yawonso yasianga sungididi mu mana Filipo kavovanga ekolo bawanga yo mona e sinsu ina kavanganga.  E kuma kadi, ayingi bakala ye mianda mia usafu, miakaza mu nding’a ngolo yo vaika. Akwa mavola ayingi ye mbevo za malu mpe, bawukwa.  Kiese kiayingi kiakala muna mbanza yayina.  Muna mbanza mwakala muntu mosi, nkumbu andi Simone, ona wateka kala ngang’a mpandu yo sivikisa e zula kia Samaria, wakiyikilanga vo wanene. 10  Yau awonso, tuka muna nleke yamuna mbuta bansiang’e sungididi yo vova vo: “O muntu ndioyu i Nkum’a Nzambi, uyikilwanga vo Wanene.” 11  Batoma kunsiang’e sungididi, kadi tuka kolo kabasivikisanga muna mpandu zandi. 12  Kansi, vava bakwikidi Filipo ona wasamunang’e nsangu zambote za Kintinu kia Nzambi ye nkumbu a Yesu Kristu, akala ye akento bavubwa. 13  Simone mpe okwikidi, una kavubwa okedi kaka yo Filipo; watoma sivika wau kamona sinsu ye mavangu mankuma mavangamanga. 14  Antumwa kuna Yerusaleme vava bawidi vo esi Samaria batambulwidi diambu dia Nzambi, babatumìni Petelo yo Yoane; 15  awaya bakulumukini yo samba kimana batambula o mwand’avelela. 16  Kadi ke mosi ko muna yau wateka tambula mwand’avelela, muna nkumbu a Mfumu Yesu kaka bavubilwa. 17  Babatensekele moko, bayantikidi tambula mwand’avelela. 18  O Simone vava kamwene vo mwanda uvewanga muna ntensekwa moko ma antumwa, ubavene nzimbu, 19  ovovele vo: “Numpana mpe e wisa kiaki, kimana konso muntu ona itenseka moko katambula mwand’avelela.” 20  Kansi, Petelo umvovese vo: “Yambula wafwa ye palata aku, kadi edi obenze vo olenda tambula lukau lwangovo lwa Nzambi muna nzimbu. 21  Kuna ye kunku ko muna diambu diadi, kadi o ntim’aku ke wasikila ko vana meso ma Nzambi. 22  I kuma vo, viluk’o ntima muna bi waku yo dodokela Yave, avo dilendakana kaloloka makani mambi ma ntim’aku; 23  kadi mbwene wo vo u ndudi a mpondi,* ozele yo vilwa.” 24  Simone ubavutwidi vo: “Nudodokela Yave mu kuma kiame kimana mawonso nuvovele malembi kumbwila.” 25  Vava batoma sila umbangi yo samun’e diambu dia Yave, bavutukidi kuna Yerusaleme, bele samuning’e nsangu zambote muna mavata mayingi ma esi Samaria. 26  Kansi, mbasi a Yave ovovele kwa Filipo, oku vo: “Telama, wenda kuna sude muna nzila ituka kuna Yerusaleme yakuna Ngaza.” (E nzila yayi ya makanga.) 27  Muna diadi otelamene, wele, owawanene yo nzimba mosi wa Ntiopia, nkwa wisa muna lûmbu lwa Kandaki wa ntinu ankento a Etiopia, yandi walunga-lunganga lusalu lwandi lwawonso. Otukidi kuna Yerusaleme mu sambila Nzambi, 28  wau kavutukanga muna kalu diandi, watanganga mu nding’angolo nkand’a Yesaya wa ngunza. 29  O mwanda uvovese Filipo vo: “Wenda finama e kalu diodio.” 30  Filipo wele ntinu, ofinamene vana ndambu, unwidi wau ketanganga mu nding’angolo nkand’a Yesaya wa ngunza, unyuvuidi vo: “Nga ozeye* mana otanganga?” 31  Ovutwidi vo: “Aweyi ndenda mo zayila, wau vo ke vena muntu ko olenda mo kunsasila?” Ododokele Filipo kamanta muna kalu, kavuanda yandi. 32  E kono dia Sono kina katangidinge i kiaki: “Nze meme wanatwa kuna vondelo, nze mwan’a meme obutamene wau kesakwang’e mika, kabatwini nu’andi ko. 33  E ndungidi yakatulwa muna yandi ekolo kavezwanga. Nani ozingula oma ma mbandu andi? Kadi o moyo andi ukatwilu ova nza.” 34  O nzimba ovovese Filipo vo: “Idodokele, unzayisa, o ngunza nani keyikanga muna mvovo miami? Yandi kibeni yovo muntu ankaka?” 35  Filipo oyantikidi vova, tuka muna sono kiaki, unsamunwini nsangu zambote mu kuma kia Yesu. 36  Ekolo bayendanga muna nzila, balueke vana maza, o nzimba ovovele vo: “Tala! O maza i mama; adieyi dinsimbidi muna vubwa?” 37  —— 38  Muna diadi olombele vo e kalu dianingama, Filipo ye nzimba bakulumukini muna maza, umvubidi. 39  Una bavaikidi muna maza, vana vau o mwand’a Yave uzavuini Filipo, o nzimba kamwene diaka ko, wele muna nzil’andi ye kiese. 40  Kansi Filipo olueke kuna Asedode, wele samuning’e nsangu zambote muna mavata mawonso yavana kaluaka kuna Kaisaria.

Mvovo vana yand'a lukaya

Sina, “mbilubisu.”
Yovo “obakwidi.”