Mavangu 3:1-26

  • Petelo owukidi mbevo a malu walombanga (1-10)

  • Longi dia Petelo vana Veta kia Solomo (11-26)

    • “Lekwa yawonso yivutulwa una yakala” (21)

    • Ngunza nze Mose (22)

3  Petelo yo Yoane vava batombokelenge kuna tempelo muna ntangw’a sambu, muna ola ina yevua,*  bamwene muntu wanatwanga, mbevo a malu tuka kawutukila. Lumbu yawonso wasiwanga vana ndambu a vitu dia tempelo diayikilwanga vo Vitu Diambote, kimana kalomba tukau twa nkenda kwa awana bekotanga muna tempelo.  Vava kamwene Petelo yo Yoane bekotanga muna tempelo, ubalombele lukau lwa nkenda.  Kansi Petelo yo Yoane bantungunwini, i bosi Petelo ovovele vo: “Ututala.”  Ubatadidi ye vuvu kia tambula má kwa yau.  Kansi, Petelo ovovele vo: “Kina ye palata ko ngatu wolo, kansi ikuvana kina ngina kiau. Muna nkumbu a Yesu Kristu wa mwisi Nazarete, diata!”  Unsimbidi muna koko kwalunene, untelamese. Vana vau, e tambi ye yinkoso yandi yikumamene;  otakukidi, oyantikidi diata, okotele yau muna tempelo, odiete yo takuka yo sanisina Nzambi.  Wantu awonso bamwene ekolo kediatanga yo sanisina Nzambi. 10  Bayantikidi sungamena vo i yandi ndiona wavuendenge vana Vitu Diambote dia tempelo mu lomba tukau twa nkenda. Basivikidi kikilu dina divangamene muna yandi. 11  Ekolo muntu ndioyo kasimbinina Petelo yo Yoane, wantu awonso balundumukini kwa yau vana Veta kia Solomo, basivikidi kikilu. 12  Petelo vava kamwene wo, ovovese nkangu vo: “Esi Isaele, ekuma nusivikilanga e diambu diadi? Ekuma nukututadilanga, vika sia vo mu nkuma wa yeto kibeni yovo mu vumi weto kuna kwa Nzambi tudiatisidi muntu ndioyu? 13  O Nzambi a Abarayama yo Isaki yo Yakobo, Nzambi a mase meto, okembese Selo kiandi, Yesu ona nwayekola yo bembola vana ndose a Pilato, kana una vo wazola kunyambula. 14  Elo, nwabembola mveledi ndioyo wa nsongi yo lomba kwa Pilato kanuyambulwila muntu wakala vo mvondi a wantu, 15  nwavonda o Mfumu a Moyo.* Kansi Nzambi wamfula muna mafwa, tu mbangi za diambu diadi. 16  Muna nkumbu andi ye lukwikilu lweto muna nkumbu andi, i kakumamene muntu ndioyu numwene yo zaya. O lukwikilu lweto muna Yesu i luwukidi muntu ndioyu vana ndose a yeno awonso. 17  Ampangi, owau nzeye wo vo ku bubu nwavangila wo, wauna mpe wavanga akuluntu eno. 18  Kansi muna mpila yayi, Nzambi olunganese mana kateka samuna muna nua mia ngunza zawonso vo, o Kristu mpasi kemona. 19  “Dianu vo, nuvilukw’e ntima, nuvutuka kwa Nzambi, o masumu meno mavunzunwa kimana ziza e nsungi za vutulwisa moyo zituka kwa Yave,* 20  katuma mpe Kristu ona kanusolela, Yesu. 21  E zulu difwete simbinina muntu ndioyo yavana e lekwa yawonso yivutulwa una yakala, ina Nzambi kayika muna nua mia ngunza zandi zavelela kuna nz’ankulu. 22  Kieleka, Mose wavova vo: ‘Yave wa Nzambi eno okunuvaikisila ngunza nze mono vana vena mpangi zeno. Nufwete winikina mawonso kekunuvovesa. 23  Konso muntu* olembi wila Ngunza ndioyo ofwaswa emvimba vana vena o nkangu.’ 24  Ngunza zawonso, tuka muna Samuele ye awana balanda, awonso ana basakula, basamuna mpe e lumbu yayi. 25  Oyeno nu wan’angunza ye wana e kangu dina Nzambi kakanga yo mase meno, vava kavovesa Abarayama vo: ‘Makanda mawonso ma nza mesambulwilwa muna mbongo aku.’ 26  O Nzambi vava kasola Selo kiandi, kwa yeno kateka kuntuma kimana kanusambula muna vilula konso muntu muna mavangu mandi mambi.”

Mvovo vana yand'a lukaya

I sia vo, tezo kia ola ya 15.
Yovo “ndiona wasolwa mu vana moyo.”
Sina, “zituka vana ndose a Yave.”
Yovo “konso moyo.”