Mavangu 25:1-27

  • Paulu ofundisu vana ndose a Feseto (1-12)

    • “Ndombele vo yafundiswa kwa Kaisa!” (11)

  • Feseto omokene yo Ntinu Angeripa (13-22)

  • Paulu vana ndose a Angeripa (23-27)

25  Vava Feseto kalueke muna mvivu yo yantika yala, vioka lumbu tatu, otombokele kuna Yerusaleme tuka kuna Kaisaria.  Nganga zambuta ye akuluntu a Ayuda bafundidi Paulu. Badodokele Feseto  kabasong’e ngemba muna bokelesa Paulu keza kuna Yerusaleme. Kansi, bakala ye kani dia swekamena Paulu muna nzila kimana bamvonda.  Kansi, Feseto ovutwidi vo Paulu okwamanana kuna Kaisaria, yandi kibeni kuna kevutuka ke kolo ko.  Ovovele vo: “Awana bena ye wisa vovo nwina yambula bakulumuka yame, bamfunda, avo diambu diambi kavangidi.”  Vava kalungisa lumbu nana yovo kumi muna Yerusaleme, okulumukini kuna Kaisaria. Muna lumbu kialanda, ovuende vana kunda kia lufundisu, olombele vo batwasa Paulu.  Vava kalueke, Ayuda ana batuka kuna Yerusaleme banzietele, bamfundidi muna mambu mayingi ye manene, mana ke balendele songa ziku ko.  Kansi, Paulu muna kuyitanina ovovele vo: “Kisumukini Nsiku a Ayuda ko yovo tempelo ngatu sumukina Kaisa.”  Feseto wau kazolele kala ye dienga kwa Ayuda, oyuvuidi Paulu vo: “Nga ozolele tomboka kuna Yerusaleme, wafundisilwa vana ndose ame mu kuma kia mambu mama?” 10  Kansi Paulu ovutwidi vo: “Ntelamene va kunda kia lufundisu kia Kaisa, i vava mfwete fundisilwa. Kivangidi diambu diambi ko kwa Ayuda nze una ozayidi wo ngeye kibeni. 11  Avo i kimpumbulu, yovo diambu mpangidi difwanukini lufwa, kitinini lufwa ko; kansi, avo ke vena diambu dialudi ko muna mana bamfundidi, ke muntu ko una yo nswa wa kungiekola kwa yau. Ndombele vo yafundiswa kwa Kaisa!” 12  I bosi, vava Feseto kamokene ye aludiki, ovovele vo: “Wau vo Kaisa olombele; kwa Kaisa mpe okwenda.” 13  Ke vavioka lumbu yayingi ko, o ntinu Angeripa yo Beniki balueke muna Kaisaria mu kingula Feseto. 14  Wau banangini mo lumbu yayingi, Feseto osunzwidi e diambu dia Paulu kwa ntinu, ovovele vo: “Vena ye mbakami mosi wasiswa kwa Feleka. 15  Vava yakala kuna Yerusaleme, nganga zambuta ye akuluntu a Ayuda bamfunda yo lomba vo kayeleswa. 16  Kansi, yabavutula vo ke fu kia esi Roma ko kia yekola muntu ofundilu, avo katelamene ko ye afundi andi kimana kayivovela muna dina bamfundidi. 17  Dianu vo, vava baluaka kwaku, kiaviokesa ntangwa ko, muna lumbu kialanda, yavuanda vana kunda kia lufundisu yo kanikina vo katwaswa. 18  Vava afundi andi batelama, ke bavova mambu mambi ko mana yayindulanga mu kuma kiandi. 19  Diambu dia sambila nzambi au* kaka bafilanena yandi e mpaka ye mu kuma kia ndiona oyikilwanga vo Yesu, ona wafwa, kansi Paulu ovovanga vo una moyo. 20  Wau kialenda zenga diambu diadi ko, yanyuvula kana vo ozolele kwenda kuna Yerusaleme, kafundisilwa kûna mu kuma kia mambu mama. 21  Kansi, vava Paulu kalomba vo kalundwa muna pelezo ekolo tuvingilang’e nzengo za Auguseto Wantete,* yakanikina vo katoma lundwa yavana ikumfila kwa Kaisa.” 22  I bosi, Angeripa ovovese Feseto vo: “Omono mpe nzolele wá muntu ndioyo.” Umvutwidi vo: “Mbazi okunwá.” 23  Dianu vo, muna lumbu kialanda, Angeripa yo Beniki bezidi ye nkembo ayingi, bakotele muna mbazi a nkanu kumosi ye mbuta za makesa y’akwa zitu muna mbanza; vava Feseto kavana nswa, Paulu watwaswa. 24  Feseto ovovele vo: “E Ntinu Angeripa yo yeno awonso nwina yeto ovava, o muntu ndioyu numwene, Ayuda awonso balomba kwa mono, tuka kuna Yerusaleme yo kwaku mpe, bakazanga vo kafwene diaka zinga ko. 25  Kansi, yabakula vo kavangidi diambu ko dimfwanukini lufwa. Dianu vo, vava yandi kibeni kalomba vo kenda kuna kwa Auguseto Wantete,* yabak’e nzengo za kunsindika. 26  Kina ye diambu dia soneka ko kwa Mfumu ame mu kuma kiandi. Dianu intwasidi ova ndose a yeno awonso, musungula ova ndose aku, e Ntinu Angeripa, kimana vava kefimpwa, yakala ye diambu dia soneka. 27  Kadi mbwene vo dia uzowa mu sindika mbakami yo lembi songa mambu mana kafundilu.”

Mvovo vana yand'a lukaya

Yovo “nsambila au.”
Zina dia Ntinu a Roma.
Zina dia Ntinu a Roma.