Mavangu 23:1-35

  • Paulu ovovele muna Mbazi a Nkanu (1-10)

  • Paulu okumikinu kwa Mfumu (11)

  • Bavuende mfulu mu vonda Paulu (12-22)

  • Paulu ofidilu kuna Kaisaria (23-35)

23  Paulu otadidi Mbazi a Nkanu,* ovovele vo: “Ampangi, ngina ye ntona zambote vana ndose a Nzambi yamu unu.”  Muna diadi, Ananiya wa ngang’ambuta okanikini awana batelamene vana kena banwanda muna nua.  I bosi, Paulu umvovese vo: “O Nzambi wanda kekuwanda, ongeye yaka kiapembeswa.* Ovuende wamfundisila mun’owu wa Nsiku, ekolo okulwidi o Nsiku wau okanikini vo yawandwa?”  Awana batelama vo, bavovele vo: “Ongeye ngang’ambuta a Nzambi olevolang’e?”  Paulu ovutwidi vo: “Ampangi, kizeye wo kwame ko vo yandi i ngang’ambuta. Kadi diasonama vo, ‘Kufwete tianguna nkuluntu a nkangu aku ko.’”  Paulu vava kamwene vo oku sambu edi Asaduki ye kuna sambu diankaka Afarisi, okazidi muna Mbazi a Nkanu:* “Ampangi, omono i Mfarisi, i mwan’a Mfarisi. Muna kuma kia vuvu kia lufuluku lwa mafwa ifundisilwanga.”  Wau kavovele ediadi, ntantani zibwidi vana vena Afarisi ye Asaduki, e ndonga ivambanini.  Kadi Asaduki bevovanga vo ke vena lufuluku ko yovo mbasi ngatu mwanda, kansi Afarisi bekwikilanga mawonso mama.  Mavuanga mangolo makotele, asoneki ankaka kuna sambu dia Afarisi batelamene, bayantikidi tantana, oku vo: “Ke tumwene diambu diambi ko muna muntu ndioyu, kansi avo mwanda yovo mbasi omokene yandi—.” 10  Vava ntantani ziwokele, o mbut’a makesa omwene wonga vo balenda vonda Paulu, otumini makesa makulumuka kimana bankatula vana bena yo kunata muna lûmbu* lwa makesa. 11  Kansi, muna fuku walanda o Mfumu watelama vana kakala yo vova vo: “Kala ye unkabu! Kadi wauna otomene kunsila umbangi omu Yerusaleme, i una mpe ofwete kunsila umbangi muna Roma.” 12  Vava kuma kwakia, Ayuda bavuende mfulu yo dia ndofi vo ke bedia ko ngatu nua yavana bevonda Paulu. 13  Vioka wantu 40 badia ndofi yayi. 14  Wantu awaya bele kwa nganga zambuta ye akuluntu, bavovele vo: “Yeto kibeni tudidi e ndofi vo ke tudia má ko yavana tuvonda Paulu. 15  Owau oyeno kumosi ye Mbazi a Nkanu* nufwete zayisa kwa mbut’a makesa bantwasa kwa yeno, nze vika sia vo nuzolele toma fimpa e diambu diandi. Kansi vitila kalwaka, oyeto tukubama twamvonda.” 16  Kansi, mwan’a nkazi a Paulu vava kawa dina bakubikanga, okotele muna lûmbu* lwa makesa, osamwini dio kwa Paulu. 17  I bosi, Paulu obokele mfidi mosi a makesa, umvovese vo: “Nata toko diadi kwa mbut’a makesa, kadi diambu kena diau mu kunzayisa.” 18  Umbongele yo kunata kwa mbut’a makesa, ovovele vo: “Paulu wa mbakami umbokele, undombele vo yatwasa toko diadi kwa ngeye, kadi diambu kena diau mu kuzayisa.” 19  O mbut’a makesa unsimbidi muna koko, unete va fulu kia yau kaka, unyuvuidi vo: “Nkia diambu ozolele kunzayisa?” 20  Ovovele vo: “Ayuda bawizanene vo balomba Paulu kwa ngeye kimana o mbazi bakulumuka yandi kuna Mbazi a Nkanu,* nze yau bazolele zaya diaka mayingi mu kuma kia diambu diandi. 21  Kansi, kubakwikila ko, kadi vioka wantu 40 muna yau bekwenda kunswamina muna nzila, badidi e ndofi vo ke bedia ko ngatu nua yavana bekumvonda; bakubamene, nsilu aku bevingilanga.” 22  O mbut’a makesa osindidiki e toko, unkanikini vo: “Kusamuna kwa muntu ko dina unzayisi.” 23  Obokele afidi wole a makesa, ubavovese vo: “Nukubika 200 za makesa, 70 lwa akwa mvalu ye 200 za akwa maswanga, benda kuna Kaisaria muna ola ina ya tatu ya fuku.* 24  Nukubikila mpe Paulu mabuluku kamanta katoma luaka kwa Feleka wa nguvulu.” 25  Osonekene nkanda, oku vo: 26  “Mono Kelodio Lusia, kuna kwa Nguvulu Feleka: Mavimpi! 27  O muntu ndioyu wabakwa kwa Ayuda ye wadi vondwa, kansi wau yazaya wo vo mwisi Roma, kuna nzaki zawonso yaluaka yo makesa, inkutumwini. 28  Muna vava zaya e kuma bamfundila, yankulumuna kuna Mbazi a Nkanu* au. 29  Yabakula vo mu kuma kia Nsiku au bamfundila, kansi kafundilwa kana diambu dimosi ko dimfwanukini lufwa yovo siwa mu pelezo. 30  Kansi wau banzayisi e mfulu bavangidi muntu ndioyo, dianu intumini kwa ngeye kimana afundi andi basonga dina kavangidi vana ndose aku.” 31  Makesa babongele Paulu wauna bakanikinu, banète mu fuku kuna Antipateri. 32  Muna lumbu kialanda, bayambwidi vo akwa mvalu benda yandi, i bosi bavutukidi muna lûmbu* lwa makesa. 33  Akwa mvalu bakotele muna Kaisaria, batambikidi o nkanda kwa nguvulu, basunzwidi mpe Paulu kwa yandi. 34  Otangidi wo, oyuvuidi mvivu una katuka, obakwidi wo vo mwisi Kilikia. 35  Ovovele vo: “Itoma wá e diambu diaku vava afundi aku beluaka.” I bosi, okanikini vo katoma lundwa muna lûmbu lwa Erodi.

Mvovo vana yand'a lukaya

Sina, “Sanedina.” Tala Nsas’a Mvovo.
I sia vo, nkwa disu kunsi a lukaya.
Sina, “Sanedina.” Tala Nsas’a Mvovo.
Yovo “mbongi.”
Sina, “Sanedina.” Tala Nsas’a Mvovo.
Yovo “mbongi.”
Sina, “Sanedina.” Tala Nsas’a Mvovo.
I sia vo, tezo kia ola 21.
Sina, “Sanedina.” Tala Nsas’a Mvovo.
Yovo “mbongi.”