Mavangu 17:1-34

  • Paulu yo Sila muna Tesalonika (1-9)

  • Paulu yo Sila muna Beroya (10-15)

  • Paulu muna Atenai (16-22a)

  • Longi dia Paulu vana Arèopàgo (22b-34)

17  Baviokele muna Amfipoli ye Apolonia, balueke kuna Tesalonika, kuna kukedi e sambilu dia Ayuda.  Wau vo i fu kiandi, Paulu okotele vana bena, omokene yau muna Sono mu lumbu tatu ya vundu,  osasidi yo songa muna sono vo mfunu kikilu diakala vo Kristu kamona e mpasi yo fuluka muna mafwa yo vova vo: “O Yesu ndioyo, ona ikunusamunwinanga, i Kristu.”  Muna kuma kiaki, akaka muna yau bakwikidi yo yikama Paulu yo Sila, diau adimosi mpe ye ndong’a Mingerekia ana basambilanga Nzambi kumosi y’akento ayingi akwa tunda.  Kansi Ayuda, wau bamwene kimpala, bakutakese yaka yimpumbulu ana bayungananga vana zandu, bakutakese ndonga, bayantikidi sia mavuanga muna mbanza. Babangwidi e nzo a Yaso yo vava twasa Paulu yo Sila kwa ndonga.  Wau balembele kubasolola, banete Yaso ye mpangi zankaka kwa mfumu za mbanza, bavovele muna nding’angolo vo: “Wantu ana betungianisanga* e nza yawonso, balueke mpe omwamu,  o Yaso ubatambwidi muna nzo andi. Wantu awaya awonso, nkanikinu mia Kaisa betelamenanga, edi bevovanga vo vena ye ntinu ankaka, Yesu.”  Vava bawidi mambu mama, e ndonga ye mfumu za mbanza batelamene mioyo;  vava batambwidi nzimbu* zafwana kwa Yaso ye akaka, babayambwidi benda kwau. 10  Muna fuku wauna, ampangi basindikidi Paulu yo Sila kuna Beroya. Vava balueke, bakotele muna sambilu dia Ayuda. 11  Ayuda kuna Beroya bakala ye tima dia longoka ke mun’awana bena muna Tesalonika ko, kadi batambulwila e diambu kuna mvevo a ntima yo toma fimpa e Sono lumbu yawonso, mu zaya kana vo mambu mama i una mena. 12  Dianu vo, ayingi muna yau bakwikidi, kumosi ye akento ayingi mpe a Mingerekia akwa zitu ye akala ankaka. 13  Kansi vava Ayuda kuna Tesalonika bazaya wo vo Paulu wasamunanga e diambu dia Nzambi kuna Beroya, bezidi ko, babendomwene nkangu yo tukisa nkindu. 14  Vana vau, ampangi basindikidi Paulu kuna mbu, kansi Sila yo Timoteo basidi kuna. 15  Awana bayenda yo Paulu, banluakisi kuna Atenai, vava batambula nkanikinu wa Paulu vo Sila yo Timoteo benda kwa yandi mu nzaki zawonso avo dilendakana, bavutukidi kwau. 16  Ekolo Paulu kabavingilanga kuna Atenai, wakendalala kikilu wau kamona e mbanza yazala ye teke. 17  Muna diadi, wayantika mokena ye Ayuda muna sambilu ye akaka ana basambilanga Nzambi, lumbu yawonso vana zandu wamokenanga mpe y’awana bakalanga vo. 18  Kansi, akaka muna ndongota za Ki-Epikuro ye Asetoa bamfidisi e mpaka, ankaka bavovele vo: “Nkwa mawulumuna ndioyo adieyi kazolele vova?” Akaka vo: “Una nze nteleki a nzambi za nzenza.” Ediadi diavangama wau vo nsangu zambote za Yesu ye lufuluku kasamunanga. 19  Muna kuma kiaki, bambakidi, banete vana Arèopàgo* yo vova vo: “Nga tulenda zaya e longi diadi diampa olonganga? 20  Kadi mambu manzenza okotesanga muna matu meto, tuzolele zaya e nsas’a mambu mama.” 21  Esi Atenai awonso ye nzenza zakala vo, baviokesanga kaka ntangw’au a vundu muna samuna yovo wá konso diambu diampa. 22  Paulu otelamene vana kati kwa Arèopàgo, ovovele vo: “Esi Atenai, mbwene vo muna mambu mawonso, nusundidi wantu akaka muna vumi wa zinzambi.* 23  Muna bong’e nona, ekolo yaviokelenge, mbwene lekwa ina nusambilanga, mbwene nkutu e ziku diasonama vo ‘Kuna kwa Nzambi Ilembi Zayakana.’ Dianu vo, ndiona nulembele zaya nusambilanga, i yandi ndioyu ikunusamunwinanga. 24  O Nzambi ona wavang’e nza ye lekwa yawonso ina mo, wau vo yandi i Mfumu a zulu ye nza, ke kalanga muna tempelo yatungilwa mu moko ko; 25  ngatu vava lusadisu lwa wantu nze yandi okondelo má, kadi yandi kibeni wavana moyo ye fulumwinu kwa wantu awonso ye lekwa yawonso. 26  Muna muntu mosi i kavangila zula yawonso, kimana bakala ova nza, wasikidisa e kolo yo sia nkendelo muna kalu ya wantu, 27  kimana bavava Nzambi, avo bekumbabata, bekunsolola, kana una vo kavavukidi konso muntu omu yeto ko. 28  Kadi muna yandi i twinina o moyo, diata yo zinga, wauna akaka muna asoneki eno bavova vo, ‘Kadi oyeto mpe tu wan’andi.’* 29  “Wau vo tu wan’a* Nzambi, ka tufwete yindula ko vo Nzambi una nze wolo, yovo palata, yovo tadi, nze lekwa kiavalwa yo sokwa kwa wantu. 30  Kieleka, o Nzambi wazima meso muna tandu kiokio kia bubu; kansi owau osamunanga kwa wantu awonso muna fulu yawonso vo bavilukw’e ntima. 31  Kadi wasikidisa e lumbu kina kefundisa e nza yawonso muna unsongi muna muntu ona kasola, wasonga e ziku kwa wantu awonso wau kamfula muna mafwa.” 32  Kansi, vava bawidi e diambu dia lufuluku lwa mafwa, ankaka bayantikidi o seva, ankaka bavovele vo: “Tusinga kuwá diaka muna diambu diadi.” 33  Paulu okatukidi vana bena, 34  kansi ankaka banlende yo kwikila. Akaka muna yau i Dionisio wa mfundisi kuna mbazi a nkanu a Arèopàgo, yo nkento mosi nkumbu andi Damari ye ankaka mpe.

Mvovo vana yand'a lukaya

Yovo “betwasanga mavuanga mu.”
Yovo “nsimbi.”
I sia vo, mongo wakala kuna Atenai yankulu, kuna mpe kwakutakenenanga mbazi a nkanu anene.
Yovo “nutoma kuyivananga mu mambu ma nsambila.”
Yovo “wutwa yandi.”
Yovo “wutwa ya.”