Matai 7:1-29

  • LONGI DIA YESU VANA MONGO (1-27)

    • Yambula fundisa (1-6)

    • Kwamanana lomba, vava, dodela (7-11)

    • Vanga kw’akaka mana ozolele vo bavanga kwa ngeye (12)

    • Mwelo ambatakani (13,14)

    • Bezayilwa muna mbongo au (15-23)

    • Nzo vana nsenzele, nzo vana senge (24-27)

  • Ndonga isivikidi malongi ma Yesu (28,29)

7  “Nuyambula fundisa kimana nwalembi fundiswa,  kadi muna mfundisa ina nufundisila i nufundisilwa mpe, muna nzongo una nuzongela i nuzongelwa mpe.  Ozevo, aweyi omwenene titi kina muna disu dia mpangi aku, kansi kumwene mwangu una omo disu diaku ko?  Aweyi olenda vovesela mpangi aku vo, ‘Yambula yakatula e titi kina omo disu diaku,’ ekolo mu disu dia ngeye kibeni muna yo mwangu?  Mpuki! Teka katula o mwangu una omo disu diaku, i bosi otoma mona una olenda katulwila e titi kina muna disu dia mpangi aku.  “Ke nuvani eyi yavauka kwa mbwa ko, ngatu tuba pelola zeno vana vena ngulu kimana zalembi diatakeswa kunansi a kole yau yo viluka, zanutatika.  “Nukwamanana lomba, ozevo nuvewa; nukwamanana vava, ozevo nusolola; nukwamanana dodela, ozevo nuziulwilwa;  kadi konso ona okwamanana lomba ovewa, konso ona okwamanana vava osolola, konso ona okwamanana dodela, oziulwilwa.  Ozevo, nani vovo nwina, avo mwan’andi unlombele mbolo, kamvana e tadi? 10  Avo unlombele mbizi a maza, kamvana e nioka e? 11  I kuma vo, oyeno nuna yo bi, avo nuzeye vana tukau twambote kwa wan’eno, o Se dieno wina kuna zulu nkia nduta keluta vana lekwa yambote kwa awana bekunlombanga! 12  “Ozevo, mawonso nuzolele vo wantu banuvanga, i mau mpe nufwete vanga kwa yau. Kieleka, ediadi i diambu diasina dilongwanga muna Nsiku ye Angunza. 13  “Nukotela muna mwelo ambatakani, kadi o mwelo wampwena ye nzila yasanzuka i yau ifilanga kuna lufwasu, ndonga bena ana bekotelanga mo; 14  kuna diak’e sambu, o mwelo ye nzila ambatakani, i yau ifilanga ku moyo, ye akete kaka bena ana besololanga yo. 15  “Nuyikenga mu kuma kia ngunza zaluvunu zina zikwiza kwa yeno ye mvuatu mia mameme, kansi muna kati mevua mansita. 16  Muna mbongo au i nukubazayila. Nga wantu balenda vela uva muna nsende yovo bundu ya nsanda muna nkeka za mfinda e? 17  Diau dimosi mpe, konso nti ambote mbongo ambote uyimanga, kansi konso nti ambi mbongo ambi uyimanga. 18  O nti ambote ke ulendi yima mbongo ambi ko, ngatu nti ambi wayima mbongo ambote. 19  Konso nti ke uyimanga mbongo ambote ko, keswa ukeswanga yo tubwa vana tiya. 20  Kieleka, muna mbongo au i nuzayila wantu awaya. 21  “Ke awonso ko bekumpovesanga vo, ‘E Mfumu, e Mfumu,’ i bekota muna Kintinu kia zulu, kansi awana kaka bevanganga luzolo lwa Se diame wina kuna zulu. 22  Ndonga bekumpovesa muna lumbu kiakina vo: ‘E Mfumu, e Mfumu, ke yeto ko twasakula muna nkumbu aku, ye muna nkumbu aku twavaikisila nkuya ye muna nkumbu aku twavangila mavangu mayingi mankuma e?’ 23  I bosi, ikubavovesa vo: ‘Kinuzeye nkutu ko! Nukatuka ova ngina, yeno avangi a umpumbulu!’ 24  “I kuma vo, konso ona owidi mambu mame mama yo sadila mo, olenda tezaneswa yo muntu walungalala ona otungidi e nzo andi vana nsenzele. 25  E mvula inokene, e kizalu kizidi ye tembwa kinikukini yo wandama muna nzo, kansi ke ibwidi ko, kadi e nkubilwa yatoma siamiswa vana nsenzele. 26  Kuna diak’e sambu, konso ona owidi mambu mame mama yo lembi mo sadila, olenda tezaneswa ye zowa dia muntu otungidi e nzo andi vana senge. 27  E mvula inokene, e kizalu kizidi ye tembwa kinikukini yo wandama muna nzo, e nzo ibwidi yo banguka emvimba.” 28  Vava Yesu kamene vova mambu mama, e ndonga isivikidi e mpil’andi ya longela, 29  kadi wabalonga nze nkwa wisa,* ke nze asoneki* au ko.

Mvovo vana yand'a lukaya

I sia vo, mana kabalonganga kwa Nzambi matuka
Tala Nsas’a Mvovo.