Matai 5:1-48

  • LONGI DIA YESU VANA MONGO (1-48)

    • Yesu oyantikidi longa vana mongo (1, 2)

    • Mambu vua metwasanga kiese (3-12)

    • Mungwa yo ntemo (13-16)

    • Yesu olunganese o Nsiku (17-20)

    • Longi mu kuma kia makasi (21-26), zumba (27-30), vonda longo (31,32), dia ndofi (33-37), landa kunda (38-42), zola mbeni (43-48)

5  Vava kamwene ndonga, otombokele vana mongo, ofongele, alongoki andi bezidi kwa yandi.  I bosi, oyantikidi kubalonga, oku vo:  “Kiese kw’awana bazeye nsatu zau za kimwanda,* kadi e Kintinu kia zulu i kiau.  “Kiese kw’awana bena ye ntantu, kadi befiaulwiswa.  “Kiese kw’alembami, kadi yau bevua e nza.  “Kiese kw’awana bena ye nzala ye vuina dia unsongi, kadi beyukuta.  “Kiese kw’awana bena ye nkenda, kadi befwilw’e nkenda.  “Kiese kw’awana bavelela muna ntima, kadi bemona Nzambi.  “Kiese kw’avangi a luvuvamu,* kadi beyikilwa vo wan’a Nzambi. 10  “Kiese kw’awana bebangikwanga mu kuma kia unsongi, kadi e Kintinu kia zulu i kiau. 11  “Nukala ye kiese, vava wantu bekunuveza yo kunubangika yo kunuyikila e mbi yawonso kuna luvunu mu kuma kiame. 12  Numona kiese yo yangalala, kadi o nsendo eno wanene kuna zulu, kadi i wau babangikila angunza ana banuvita. 13  “Yeno nu mungwa a nza, kansi avo mungwa ukatukidi o nzenzo andi, aweyi uzenzeselwa? Ke una diaka mfunu ko, vetwa uvetwa kuna mbazi wadiatakeswa kwa wantu. 14  “Yeno nu ntemo a nza. E mbanza ina vana mongo ka ilendi swekama ko. 15  Vava wantu bekwikanga mini ke besianga kio kuna nsi a mbangu* ko, kansi vana fulu kiazanguka kaka, kimana kiaminika awonso bena muna nzo. 16  Diau dimosi mpe, yambula o ntemo eno watemena vana vena wantu, kimana bamona mavangu meno mambote, bakembelela Se dieno una kuna zulu. 17  “Ke nuyindula ko vo Nsiku yovo Angunza ngizidi fwasa. Kizidi fwasa ko, lunganesa ngizidi lunganesa. 18  Kieleka inuvovese wo vo, e zulu ye nza ilenda vioka, kansi kana nkutu fisono fimosi muna Nsiku ke fikatulwa ko, yavana mambu mama mawonso melungana. 19  Dianu vo, konso ona okulula una usundidi o keva muna nkanikinu miami yo longa ankaka bavanga diau dimosi, oyikilwa vo nkè muna Kintinu kia zulu. Kansi konso ona olunda mio yo longa mio, yandi oyikilwa vo nene muna Kintinu kia zulu. 20  Kadi inuvovese wo vo, avo unsongi weno ke uwokele ko yo sunda owu wa asoneki ye Afarisi, ke nukota ko muna Kintinu kia zulu. 21  “Nuwidi dio dina diavovua kw’akulu vo: ‘Kuvondi ko, ona ovonda ofundiswa kuna mbazi a nkanu.’ 22  Kansi, omono inuvovese vo konso ona olundila mpangi andi makasi, kuna mbazi a nkanu kefundisilwa; ona oyikila mpangi andi muna mvovo mialuvezo, kuna Mbazi a Nkanu Anene kefundisilwa; ona ovova vo, ‘Ongeye u zowa!’ otubwa vana tiya twa Ngeena.* 23  “Kansi, avo se tambika o lukau lwaku vana ziku, vana vau osungamene vo mpangi aku diambu kabakidi, 24  sisa o lukau lwaku vana ndambu a ziku. Wenda teka wizana yo mpangi aku, vava ovutuka, tambika o lukau lwaku. 25  “Singika-singika mambu yo ntantu ufundidi kuna mbazi a nkanu ekolo una yandi muna nzila, kimana kalembi kuyekola kwa mfundisi, o mfundisi kayekola kwa nyingidi, wasiwa muna pelezo. 26  Kieleka, ivovese vo, kuvaika mo nkutu ko yavana ofuta e mpata wansuka.* 27  “Nuwidi dio dina diavovua vo: ‘Kute zumba ko.’ 28  Kansi, omono inuvovese vo konso ona otungununanga nkento yo kunlengokela o moyo, zumba katele yandi muna ntima. 29  Avo disu diaku dialunene ditesese sakuba, dunguna dio yo veta dio. Kadi diambote kwa ngeye wavidisa kimosi muna yîkwa yaku ke mu nitu aku yawonso ko yatubwa kuna Ngeena.* 30  Diau dimosi mpe, avo koko kwaku kwalunene kutesese sakuba, zenga ko yo veta ko. Kadi diambote kwa ngeye wavidisa kimosi muna yîkwa yaku ke mu nitu aku yawonso ko yatubwa kuna Ngeena.* 31  “Diavovua diaka vo: ‘Konso yakala ovonda longo yo nkaz’andi, yambula kamvana nkanda wa vondela longo.’ 32  Kansi, omono inuvovese vo konso yakala ovonda longo yo nkaz’andi avo ke mu kuma kia zumba* ko, unsidi mu vonza kia tá zumba, konso ona osompa nkento wavonda longo, zumba katele. 33  “Nuwidi dio diaka dina diavovua kwa akulu vo: ‘Kudie ndofi a luvunu ko, ofwete lungisa e ndofi aku kuna kwa Yave.’ 34  Kansi, omono inuvovese vo: Ke nudie nkutu ndofi ko, kana kuna zulu, kadi i kunda kia Nzambi; 35  ngatu ova ntoto, kadi i nsikinw’a tambi yandi; yovo kuna Yerusaleme, kadi i mbanz’a Ntinu anene. 36  Kudila ntu aku e ndofi ko, kadi kulendi kitula kana lusuki lumosi ko se lwa mpembe yovo lwa ndombe. 37  Yambula e mpov’eno ‘Elo’ yakala elo, ‘Ve,’ ve, kadi konso dina dikulamene, kwa ndiona wambi ditukidi. 38  “Nuwidi dio dina diavovua vo: ‘Disu mu disu ye dinu mu dinu.’ 39  Kansi, omono inuvovese vo: Kutelamena muntu ambi ko, konso ona okuwanda e mbata vana bundi dialunene, umvana diaka e bundi diankaka. 40  Avo muntu ozolele kunata kuna mbazi a nkanu yo bonga e kinkutu kiaku, unyambula mpe kabonga e yunga kiaku; 41  avo nkwa wisa ozolele vo wenda yandi kilometa mosi, wenda yandi kilometa zole. 42  Vana kwa ndiona ulombele, kukangi moko ko kwa ndiona ozolele vo wansompeka.* 43  “Nuwidi dio dina diavovua vo: ‘Zola nkw’aku, menga mbeni aku.’ 44  Kansi, omono inuvovese vo: Nuzolanga mbeni zeno, yo samba mu kuma kia awana bekunubangikanga, 45  kimana nwasonga vo nu wan’a Se dieno wina kuna zulu, kadi ovaikisanga ntangw’andi vana vena wantu ambi yo wantu ambote yo nokesa e mvula vana vena wantu ansongi ye awana balembi songa. 46  Kadi avo nuzolele kaka ana bekunuzolanga, nkia nsendo nuna wau? Nga ke diau dimosi ko bevanganga avakulwisi a mpaku e? 47  Avo nukayisi kaka mpangi zeno, nga diambu diampwena nuvangidi e? Ke diau dimosi mpe ko bevanganga esi zula* e? 48  Muna kuma kiaki, nukala nwalunga nze Se dieno kuna zulu kenena walunga.

Mvovo vana yand'a lukaya

Yovo “awana bazeye vo mambu ma Nzambi bavuidi o mfunu.”
Yovo “akwa luvuvamu.”
Yovo “kitunga.”
Fuku dia yokelwang’e titi kuna mbazi a mbanz’a Yerusaleme. Tala Nsas’a Mvovo.
Sina, “yavana ofuta quadrans yansuka.”
Tala Nsas’a Mvovo.
Tala Nsas’a Mvovo.
Muna Kingerekia, por·neiʹa. Tala Nsas’a Mvovo.
I sia vo, sompeka lembi vava nluta.
Awana bena vo ke Ayuda ko.