Matai 3:1-17

  • Yoane wa Mvubi oyantikidi longa (1-12)

  • Luvubu lwa Yesu (13-17)

3  Muna lumbu yayina, Yoane wa Mvubi wizidi alonginge muna makanga ma Yuda,  oku vo: “Nuviluk’o ntima, kadi e Kintinu kia zulu kifinamene.”  Kieleka, Yoane yandi oyikwanga muna Yesaya wa ngunza vo: “Nding’a muntu obokanga muna makanga, oku vo: ‘Nukubika nzil’a Yave! Nusingika nzila zandi.’”  Yoane wavuatanga mvuatu a mika mia samo* ye mpond’a nkand’a bulu muna luketo lwandi. O madia mandi, makonko yo wiki.  I bosi, o nkangu a Yerusaleme ye Yuda yawonso ye zunga kiawonso kia Yodani bezidi kwa yandi,  bafungwini masumu mau, ubavubidi* muna Nkoko a Yodani.  Vava kamwene vo Afarisi ye Asaduki ayingi bezidi kuna luvubu, ubavovese vo: “Yeno wan’a mpidi, nani unulukisi nwatina o makasi mekwiza?  Nusonga mavangu ma luviluku lwa ntima.  Ke nuvovi muna ntima mieno ko vo, ‘Tuna yo Abarayama wa se dieto.’ Kadi inuvovese wo vo, Nzambi wafwana vaikisila Abarayama o wana muna matadi mama. 10  Sengele kisilu kala vana sina dia nti. Ozevo, konso nti ulembi yima bundu yambote, keswa ukeswa yo tubwa vana tiya. 11  Omono inuvubidi muna maza mu kuma kia luviluku lweno lwa ntima, kansi ndiona okwiz’andandi unsundidi o nkuma, kilendi nkutu vula nsampatu zandi ko. Yandi okunuvubila muna mwand’avelela yo muna tiya. 12  Una ye vevelwa vana moko mandi, ovelelesa bundilu diandi yo sia masa mandi muna lundilu, kansi oyoka e titi vana tiya ke tuzimanga ko.” 13  I bosi, o Yesu otukidi kuna Ngalili, olueke kuna Yodani kwa Yoane kimana kavubwa kwa yandi. 14  Kansi Yoane ovavidi kunsima, oku vo: “Omono kwa ngeye mfwete vubwa, owau ongeye kwa mono okwizange?” 15  Yesu umvutwidi vo: “Yambula diavangama owau, kadi mu mpila yayi i tulungisila mawonso mansongi.” I bosi oyambwidi kunsima. 16  Vava kavubilu, Yesu vana vau otombokele muna maza, e zulu diziukidi, omwene mwand’a Nzambi unkulumukini nze yembe. 17  I bosi, e ndinga itukidi kuna zulu, oku vo: “Ndioyo i Mwan’ame anzolwa, ona iyangalelanga.”

Mvovo vana yand'a lukaya

Yovo “kamelo.”
Yovo “dimunwa muna maza.”