Matai 28:1-20

  • Yesu ofulukidi (1-10)

  • Makesa bakomekeno mu vuna (11-15)

  • Nkanikinu wa kitula wantu se alongoki (16-20)

28  E lumbu kia Vundu vava kiavioka, o kuma una se kukianga muna lumbu kiantete kia lumingu, Maria Mandala yo waka Maria, bezidi tala e ziami.  Vakedi nzakam’angolo a ntoto, kadi mbasi a Yave okulumukini kuna zulu, wizidi nengomona e tadi, ovuandidi dio.  E mpw’andi nze nsemo, e mvuatu andi wampembe nze mvul’ampembe.  Muna kuma kia wonga wandi, ayingidi bazakamene yo kituka nze wantu afwa.  Kansi, o mbasi ovovese akento vo: “Ke numoni wonga ko, kadi nzeye wo vo Yesu ona wavondelo vana nti nuvavanga.  Kena mo ko, kadi ofulukidi kwandi nze una kavova. Nwiza tala e fulu kalekeswa.  Nwenda nswalu yo zayisa kw’alongoki andi vo ofulukidi muna mafwa, kadi vita kekunuvita kuna Ngalili. Kuna nukumwena. Nusungamena dina yanuvovesa.”  Bakatukidi mu nswalu vana ziami, kuna wonga ye kiese kiayingi balundumukini benda zayisa e nsangu kw’alongoki andi.  Yesu owananene yau, oku vo: “Kiambote kieno!” Bamfinamene yo simbinina malu mandi, bankundidi.* 10  I bosi, Yesu ubavovese vo: “Ke numoni wonga ko! Nwenda zayisa mpangi zame kimana benda kuna Ngalili, i kuna bekumbwena.” 11  Una bekwendanga, ankaka muna ayingidi bele muna mbanza yo zayisa kwa nganga zambuta mawonso mabwidi. 12  Balungalakene ye akuluntu, bavuende mfulu, bavene palata zayingi kwa makesa, 13  oku vo: “Nuvova vo, ‘Alongoki andi bezidi kunyiya muna fuku, wau tulele.’ 14  Ke nutokani ko, avo e diadi diwakanene kwa nguvulu, tunkusasila dio.”* 15  Batambwidi e palata, bavangidi una bavoveso, lusansu lwalu lumwanganene vana vena Ayuda yamu unu kiaki. 16  Vo i alongoki 11, bele kuna Ngalili, kuna mongo una o Yesu kabakanikina vo i kuna bewawanena. 17  Vava bamwene, bankundidi, kansi ankaka bakatikisi. 18  Yesu ubafinamene, ubavovese vo: “E wisa kiawonso kia zulu ye nza kiveno kwa mono. 19  Dianu vo, nwenda, nwakitula wantu a zula yawonso se alongoki, nwabavubila muna nkumbu a Se yo Mwana yo mwand’avelela, 20  nubalonga balunda mambu mawonso inukanikini. Tala, ngina yeno e lumbu yawonso yakuna nsuk’a tandu.”*

Mvovo vana yand'a lukaya

Yovo “bafukamene.”
Yovo “tunkukwikidisa.”
Tala Nsas’a Mvovo.