Matai 2:1-23

  • Nkingula ya afimpi a ntetembwa (1-12)

  • Yosefe otinini kuna Engipito (13-15)

  • Erodi ovondese wan’amakala (16-18)

  • Yosefe ovutukidi kuna Nazarete (19-23)

2  O Yesu vava kawutuka muna Beteleme a Yuda muna lumbu ya Erodi* wa Ntinu, afimpi* a ntetembwa batukidi kuna Este bezidi ku Yerusaleme,  oku vo: “Akweyi kena o ntinu a Yuda ona owutukidi? Kadi tumwene ntetembw’andi vava tukedi kuna Este, twizidi twankunda.”  Vava kawidi e diadi, Erodi wa Ntinu otelamene o ntima, yandi ye nkangu wawonso a Yerusaleme;  okutakese nganga zambuta zawonso ye asoneki* a nkangu, oyantikidi kubayuvula kana akweyi kewutukila o Kristu.*  Bamvovese vo: “Muna Beteleme a Yuda, kadi i diau diasonekwa muna ngunza:  ‘Ongeye, Beteleme a nsi a Yuda, ku mbanza yakete ko vana vena ayadi a Yuda, kadi omo ngeye mu vaikila nyadi, ona ovungula nkangu ame Isaele.’”  I bosi, Erodi obokele afimpi a ntetembwa kuna sweki, otomene kubayuvula kana nkia ntangwa imonekene ntetembwa.  Ubatumini kuna Beteleme, oku vo: “Nwenda toma vava e kingiana-ngiana, avo nunsolwele, nwiza kunsamunwina, kimana omono mpe ngienda, yankunda.”  Vava bawidi dina kavovele o ntinu, basimbidi e nzila, e ntetembwa ina bamona vava bakala kuna Este ibavitidi kuna ntwala, yavana yayenda telama vana vakala kingiana-ngiana. 10  Vava bamwene ntetembwa, bayangalele kikilu. 11  Vava bakotele muna nzo, bamwene kingiana-ngiana yo Maria wa ngudi andi, bafukamene, bankundidi. Bavaikisi tusalu twau yo kumvana tukau—wolo, ndumbu a dimbu ye mô.* 12  Kansi, wau balukisu kwa Nzambi muna ndozi balembi vutuka kwa Erodi, bele kuna nsi au mu nzila yankaka. 13  Una bavutuka, mbasi a Yave omonekene kwa Yosefe muna ndozi, oku vo: “Telama, bonga e kingiana-ngiana yo ngudi andi yo tinina kuna Engipito, kala kuna yavana ikuvovesa e diambu, kadi Erodi ovavanga kingiana-ngiana kamvonda.” 14  Yosefe otelamene muna fuku, obongele kingiana-ngiana yo ngudi andi, wele kuna Engipito. 15  Okedi kuna yavana kiafwa Erodi, dialungana dina diavovua kwa Yave muna ngunz’andi, oku vo: “Muna Engipito mbokele mwan’ame.” 16  I bosi, Erodi vava kamwene vo afimpi a ntetembwa bamvunini, ofungidi kikilu makasi, okanikini vo wan’amakala awonso muna Beteleme ye muna mavata mandi mawonso bavondwa, tuka ana bena ye mvu miole ye awana ke balungisi mio ko, mun’owu wa ntangwa ina katoma fimpa afimpi a ntetembwa. 17  I bosi, dialungana dina diasakulwa muna Yeremiya wa ngunza, ona wavova vo: 18  “E ndinga yawakana muna Rama, dilu ye mbembo. Rakele wadilanga wan’andi, kazola fiaulwiswa ko, kadi ke bena vo diaka ko.” 19  Vava Erodi kafwa, mbasi a Yave imonekene kwa Yosefe muna ndozi kuna Engipito, 20  oku vo: “Telama, bong’e kingiana-ngiana yo ngudi andi, wenda kuna nsi a Isaele, kadi awana bavavanga moyo a kingiana-ngiana, bamene fwa.” 21  Otelamene, obongele kingiana-ngiana yo ngudi andi, wizidi ku nsi a Isaele. 22  Kansi, vava kawidi vo Ankelao oyadidi muna Yuda vana fulu kia Erodi wa se diandi, omwene wonga wa kwenda ko. Kansi, wau kalukiswa kwa Nzambi muna ndozi, wele muna zunga kia Ngalili. 23  Wele zingila muna mbanz’a Nazarete, kimana dialungana dina diavovua kwa angunza: “Oyikilwa vo mwisi Nazarete.”*

Mvovo vana yand'a lukaya

Tala Nsas’a Mvovo.
Yovo “nganga.”
Asoneki yau babandulanga e Sono, kansi muna lumbu ya Yesu, yau batoma zaya Nsiku yo longa wo kw’akaka.
Yovo “Masia; Kuswa.”
Ndumbu a dimbu ye mô, i lekwa yansunga.
Nanga mu mvovo a Kiyibere usekolwanga vo “ntombo” yatuka.