Matai 18:1-35

  • Ndiona osundidi onene muna Kintinu (1-6)

  • Masakuba (7-11)

  • Kingana kia meme diavila (12-14)

  • Una olenda bakila mpangi aku (15-20)

  • Kingana kia ntaudi walembi loloka (21-35)

18  Muna ntangwa yayina alongoki bezidi kwa Yesu, banyuvuidi vo: “Nani kieleka osundidi onene muna Kintinu kia zulu?”  Obokele kingiana-ngiana, untelamese vana kati kwau,  ovovele vo: “Kieleka inuvovese wo vo, avo ke nuvilukidi* ko yo kituka nze yingiana-ngiana, muna Kintinu kia zulu ke nukota mo ko.  Dianu vo, konso ona okuyikulula nze kingiana-ngiana kiaki i yandi osundidi onene muna Kintinu kia zulu;  konso ona otambwidi kingiana-ngiana nze kiaki muna nkumbu ame, mono katambwidi.  Kansi, konso ona otesese sakuba kwa mosi mun’awaya andwelo bekwikilanga omu mono, diambote kavuikwa e tadi muna nsingu nze dina dizietomonwangwa kwa buluku yo dimunwa muna mbu.  “Tâtu kwa nza mu kuma kia masakuba! Kieleka, awana betesanga masakuba kwiza kaka bekwiza, kansi tâtu kwa ndiona masakuba mekwizila!  Avo koko kwaku yovo kulu kwaku kutesese sakuba, zenga ko, waveta ko; kadi diambote kwa ngeye wavua moyo ye koko yovo kulu kumosi, ke mu tubwa ko yo moko mole yovo malu mole vana tiya twa mvu ya mvu.  Avo disu diaku mpe ditesese sakuba, dunguna dio, waveta dio. Diambote kwa ngeye wavua moyo ye disu dimosi kaka, ke mu tubwa ko yo meso mole vana tiya twa Ngeena.* 10  Nuyikenga nwalembi veza mosi mun’awaya andwelo; kadi inuvovese vo e mbasi zau kuna zulu ntangwa zawonso zitalanga e ndose a Se diame una kuna zulu. 11  —— 12  “Adieyi nubenze? Avo muntu una ye 100 mameme, kavidisa dimosi, nga kesisa 99 ko vana miongo, kenda vavi dina divididi e? 13  Avo osolwele dio, kieleka inuvovese vo, otoma dio yangalela ke mu 99 ko lulembele vila. 14  Diau dimosi mpe, ke luzolo lwa Se diame* ko una kuna zulu vo vavila kana nkutu mosi mun’awaya andwelo. 15  “Kansi, avo mpangi aku usumukini, wenda kunsonga o bi* wandi vana va yeno wole kaka. Avo uwididi, obakidi mpangi aku. 16  Kansi avo kawididi ko, nata muntu mosi yovo nwole kimana muna kimbangi* kia wantu wole yovo atatu, mawonso malenda sikidiswa. 17  Avo kabawididi ko, vova kwa nkutakani. Avo kazolele nkutu wila nkutakani ko, yambula kakala kwa ngeye nze mwisi zula* ye mvakulwisi a mpaku. 18  “Kieleka inuvovese vo, konso mana nukanga ova ntoto mekangama mpe kuna zulu, konso mana nukutulula ova ntoto mekutululwa mpe kuna zulu. 19  Kieleka, inuvovese diaka vo, avo nwole muna yeno ova ntoto bawizanene muna konso diambu diamfunu belomba, o Se diame una kuna zulu okubavana dio. 20  Kadi vana vakutakene nwole yovo ntatu muna nkumbu ame, omono ngina vana.” 21  I bosi, Petelo ofinamene yo kunyuvula vo: “E Mfumu, o mpangi ame nkumbu kwa kafwete kunsumukina, omono yanloloka e? Yamuna nkumbu nsambwadi e?” 22  Yesu umvovese vo: “Kivovese ko vo yamuna nkumbu nsambwadi, kansi yamuna nkumbu 77. 23  “Muna kuma kiaki, e Kintinu kia zulu kilenda tezaneswa ye ntinu ozolele lomba e mfuka kwa ntaudi zandi. 24  Vava kayantikidi kubalomba e mfuka, bantwasidi muntu wandia e mfuka ya 10.000 ma talanta.* 25  Kansi, wau vo kakala ye kina kafuta ko, o mfumu andi okanikini vo katekwa, yo nkaz’andi yo wana, ye yawonso kakedi yau, kafuta e mfuka. 26  O ntaudi ofukamene yo kundodokela, oku vo, ‘Umpana e ntangwa, ikufuta yawonso.’ 27  O mfumu a ntaudi ndioyo, umfwididi e nkenda, unsindikidi kenda kwandi, unyambulwidi e mfuka. 28  O ntaudi ndioyo ovaikidi, owananene ye ntaudi wa nkw’andi ona wandia e mfuka ya 100 denali, umbakidi, unsimbinini vana laka, oku vo, ‘Futa e mfuk’ame yawonso.’ 29  Ozevo, o ntaudi wa nkw’andi ofukamene yo kundodokela, oku vo, ‘Umpana e ntangwa, ikufuta.’ 30  Kansi kazolele ko, wele kunsia muna pelezo yavana kefuta e mfuka. 31  Vava akw’andi ntaudi bamwene mana mavangamene, bakendalele kikilu, bele zayisa mawonso kwa mfumu au. 32  I bosi, o mfumu andi umbokelese yo kumvovesa vo: ‘Ntaudi ambi, omono yayambulwidi e mfuka yawonso wau wandodokele. 33  Ongeye, kulendi fwila ntaudi wa nkw’aku e nkenda ko nze una omono yafwila e nkenda?’ 34  Muna kuma kiaki, o mfumu andi ofungidi kikilu makasi, unyekwele kwa ayingidi a pelezo yavana kefuta mfuka yawonso. 35  O Se diame una kuna zulu i wau mpe kevanga kwa konso muntu mu yeno olembi loloka mpangi andi muna ntima.”

Mvovo vana yand'a lukaya

Yovo “soba e fu.”
Tala Nsas’a Mvovo.
Dilenda kala vo, “Se dieno.”
Sina, “kunsemba.”
Sina, “nua.”
Ndiona una vo ke Nyuda ko.
10.000 ma talanta i 60.000.000 ma denali.